NAGDAKO ko sa pamilya nga debotadong Katoliko ug gusto nilang magpari ko. Mao nga sa nag-edad kog 12, nagkuha kog tulo ka subject ug lainlaing pari ang nagtudlo nako. Dayon sa 1990, dihang 14 anyos ko, gitanyagan ko nga moeskuyla sa usa sa kinamaayohang mga seminaryo sa nasod.

Kusog ang akong pag-uswag ug giingnan ko nga posibleng mahimo kong obispo kon ako ning ipadayon. Pero nadismaya ko kay imbes magtuon ug Bibliya, pilosopiya na man hinuon ang among gitun-an. Imoral sab kaayo ang mga pari. Ug dihang ako nay ilang gibiktima, nawad-an kog gana sa pag-alagad sa Diyos.

Nianang panahona, usa ka magtiayong misyonaryo ang miduaw sa accountant sa seminaryo. Gihatagan nila siyag librong Mga Pangutanang Gisukna sa mga Batan-on—Mga Tubag nga Mosaler. Gihulam nako ang libro ug gihurot kinig  basa. Nakaingon kong, ‘Mao ni ang akong gipangita.’ Mihawa ko sa seminaryo, nag-Bible study uban sa mga Saksi, ug misugod ug tambong sa mga tigom. Walo ka bulan sa ulahi, sa Hulyo 1991, nabawtismohan ko. Nagregular payunir ko ug sa ulahi naminyo kang María, nga usa pod ka payunir. Sukad sa 2006, kami nag-alagad ingong espesyal payunir. Imbes moundang ug alagad sa Diyos, malipayon ko karon nga nagtabang sa mga tawong giuhaw sa kamatuoran nga mahimong iyang alagad.