Si Juana Ventura nagsugod ug Bible study sa panahong gidili ang buluhatong pagsangyaw, ug nabawtismohan niadtong 1960 sa Ozama River. Dihay higayon nga gusto siyang ipapriso sa pastor sa Protestante kay iya kunong “giilog ang mga membro niini.” Aron mapamatud-ang bakakon ang mga Saksi ni Jehova ug mapakaulawan si Juana, gidapit siya sa pastor nga moadto sa simbahan aron sukitsukiton bahin sa iyang bag-ong tinuohan.

“May tulo siya ka pangutana,” matod ni Juana, “‘Nganong dili man mo mobotar? Nganong dili man mo moapil sa giyera? Nganong gitawag man mog Saksi ni Jehova?’ Samtang akong gitubag ang matag pangutana gamit ang Bibliya, gibasa sab sa iyang mga membro ang mga teksto diha sa ilang Bibliya ug nakurat sila sa ilang nabasa.  Daghan ang nakombinsir nga ilang nakaplagan ang kamatuoran. Ang tibuok grupo nagpa-Bible study, ug wala madugay 25 kanila ang nabawtismohan.” Kining talagsaong hitabo nakapauswag sa buluhaton sa Santo Domingo.

Ang pagpatay kang Trujillo miresultag dakong kagubot sa politika. Ang 1963 Yearbook miingon: ‘Daghan kaayog sundalo sa karsada, ug kada adlaw dunay mga welga ug panag-away.’ Bisan pa sa kagubot sa politika, ang buluhatong pagsangyaw ug paghimog tinun-an miuswag, ug sa hinapos sa 1963 nga tuig sa pag-alagad, nakab-ot ang kinatas-ang ihap nga 1,155 ka magmamantala.

Sa 1962, si Nathan Knorr nga gikan sa world headquarters miduaw sa Dominican Republic. Iyang gihikay nga makapalit ug lote aron tukoran ug mas dagkong pasilidad nga magamit sa paspas nga pag-uswag sa buluhatong pagsangyaw. Usa ka bilding nga dos andanas ug usa ka Kingdom Hall ang natukod. Sa Sabado, Oktubre 12, 1963, si Frederick Franz, laing bisita gikan sa world headquarters, mipakigpulong para sa dedikasyon sa bag-ong mga pasilidad. Klaro nga gusto sa mga Saksi ni Jehova nga magpabilin sa Dominican Republic. Wala madugay human sa dedikasyon, miabot si Harry ug Paquita Duffield, ang kataposang mga misyonaryo nga Saksi nga gipapahawa sa Cuba.

Sa Abril 24, 1965, mibuto ang rebolusyon. Nianang malisod nga mga panahon, ang katawhan ni Jehova padayong miuswag. Pagka-1970, diha nay 3,378 ka magmamantala sa 63 ka kongregasyon. Kapig katunga ang midangop sa organisasyon ni Jehova sulod lang sa lima ka  tuig. Ang 1972 Yearbook miingon: “Lainlain silag kahimtang sa kinabuhi: Mga mekaniko, mag-uuma, drayber, accountant, panday, abogado, dentista, ug bisag kanhing mga politiko; silang tanan nahiusa tungod sa ilang gugma kang Jehova ug sa kamatuoran.”