Mabungahon kaayo ang pagsangyaw ngadto sa mga nagsultig Kinatsila. Pero paglabay sa panahon, daghang tawo nga lahig pinulongan ang mibalhin sa nasod ug midawat sa mensahe sa Gingharian. Sa silingang nasod nga Haiti, ang pangunang pinulongan maoy Haitian Creole. May mga panahon nga dili maayo ang relasyon sa Dominican Republic ug Haiti. Bisan pa niana, libolibong taga-Haiti ang nanarbaho sa Dominican Republic, ug midaghan pa sila karon.

Kaniadto, ang mga interesado nga nagsultig Haitian Creole patambongon sa Spanish nga mga kongregasyon aron matabangan. Apan sa 1993, aron mas maatiman ang ilang espirituwalidad, giinstruksiyonan sa Nagamandong Lawas ang branch sa Guadeloupe nga awhagon ang mga espesyal payunir sa ilang teritoryo nga moboluntaryo sa Haitian Creole nga teritoryo sa Dominican Republic. Apil si Barnabé ug Germaine Biabiany sa tulo ka magtiayon nga miboluntaryo. Si Barnabé miingon: “Sa sinugdan, duha ra ang among Haitian Creole nga brosyur. Ang tanang ubang literatura pulos French, busa kinahanglan namo kining hubaron ngadto sa Haitian Creole.”

Sa Enero 1996, may siyam ka magmamantala sa Higüey ug napulo sa Santo Domingo nga andam mosuporta sa Haitian Creole nga grupo. Busa naporma ang duha  ka grupo, usa sa Higüey ug usa sa Santo Domingo. Wala madugay, ang maong mga grupo nahimong kongregasyon. Pero na-dissolve ang maong mga kongregasyon kay daghang taga-Haiti ang mas gustong magtuon ug Kinatsila, busa didto sila motambong sa kongregasyon nga naggamit niini nga pinulongan. Si Barnabé miingon, “Nakigkita mi sa mga brader sa Service Department, ug nadesisyonan nga mas maayong ihunong una ang Haitian Creole nga pagsangyaw.”

Sa 2003, giasayn sa Nagamandong Lawas ang magtiayong misyonaryo nga si Dong ug Gladys Bark sa pag-atiman sa Haitian Creole nga teritoryo sa Dominican Republic. Duha ka tuig silang nagsangyaw sa Higüey ug nakita nila ang maayong mga resulta. Sa Hunyo 1, 2005, naporma ang usa ka Haitian Creole nga kongregasyon. Si Dong Bark, Barnabé Biabiany, ug ang misyonaryo nga si Steven Rogers, makugihong nagbiyahe sa tibuok nasod sa pag-atiman sa Haitian Creole nga teritoryo.

Miuswag pag-ayo ang buluhaton, ug daghang kongregasyon ang naporma. Sa Septiyembre 1, 2006, naporma ang unang Haitian Creole nga sirkito. Dihay pito ka kongregasyon ug duha ka grupo, ug si Barnabé Biabiany ang circuit overseer.

Sa misunod nga mga tuig, daghan pang misyonaryo ang giasayn sa Dominican Republic sa pagtabang sa Haitian Creole nga teritoryo. Daghan sab ang nangabot gikan sa Canada, Europe, United States, ug ubang nasod aron motabang. Usa ka grupo sa kuwalipikadong mga brader ang giasayn sa pag-andam ug leksiyon sa pagtuon ug Haitian Creole para sa langyaw ug lokal nga mga igsoon.

 Dako gayod ug epekto sa mga taga-Haiti ang paningkamot sa daghang taga-Dominican Republic nga mokat-on ug Haitian Creole. Dihang sila magsangyaw niini nga pinulongan, ang mga taga-Haiti dili mataha ug mas daling estoryahon bahin sa mensahe sa Gingharian. Daghan kaayong igsoon ang nakakat-on sa maong pinulongan. Gani, ang makamaog Haitian Creole nga dili taga-Haiti sagad maalaan nga Saksi ni Jehova.

Maayo kaayog epekto ang pagpakitag interes ngadto sa mga tawo nga lahig kultura. Tagda ang kasinatian sa payunir nga sister nga taga-Dominican Republic. Apil siya sa mga nagtuon ug Haitian Creole. Samtang nagsangyaw, nakaplagan sa sister ang interesadong magtiayon nga taga-Haiti. Iya kining gibalikduaw aron sugdan ug Bible study. Siya miingon, “Pag-abot nako, akong gitimbaya ang asawa pinaagi sa paghalok sa aping, nga kostumbre sa mga babaye sa Dominican Republic. Siya mihilak. Ako siyang gipangutana, ‘Nganong mihilak man ka?’ Siya mitubag, ‘Dugay na kong nagpuyo dinhi, pero karon pa gyod ko gitimbaya pinaagig halok.’”

Ang pagpanalangin ni Jehova sa paningkamot sa mga igsoon miresultag dakong pag-uswag. Sa Septiyembre 1, 2009, diha nay 23 ka Haitian Creole nga kongregasyon ug 20 ka grupo, busa naporma ang ikaduhang sirkito. Gipakita sa gidaghanon sa mitambong sa Memoryal sa 2011 nga may posibilidad sa pag-uswag sa umaabot. Pananglitan, ang 11 ka magmamantala sa gamayng lungsod sa Río Limpio nalipay nga 594 ang mitambong sa ilang Memoryal. Ug dihang gipahigayon  ang Memoryal sa Las Yayas de Viajama, diin wala pay magmamantala, 170 ang mitambong. Sa Septiyembre 2011, diha nay 33 ka kongregasyon ug 21 ka grupo sa Haitian Creole nga pinulongan. Busa, naporma ang lain pang sirkito sa 2012.

Ang branch sa Dominican Republic ug ang branch sa Haiti nagtinabangay sa pagbansay ug mga igsoon gikan niining duha ka nasod. Lima ka klase sa Bible School for Single Brothers ug upat ka klase sa Bible School for Christian Couples ang gipahigayon sa Haitian Creole nga pinulongan.