SA 1970, ako nagtrabaho sa usa ka British nga kompaniya sa minahan sa Tongo Fields, lugar nga daghag diamante amihanan sa Kenema. Nangita sab kog mga diamante sa libre nakong panahon. Dihang makakita ko, mag-isputing ko ug moadto sa Kenema aron kana ibaligya ug maghapihapi na ko.

Sa 1972, nakahimamat kog mga Saksi ni Jehova ug nagpa-Bible study. Human sa lima ka bulan, kuwalipikado na ko sa bawtismo. Kay wala nay bakasyon, akong gihangyo ang kauban nako sa trabaho sa pagrelibo kanako para makatambong ko sa distritong kombensiyon ug mabawtismohan. Siya misugot pero sa kondisyon nga ihatag nako niya ang baleg usa ka semanang suweldo. Mas importante nako ang akong bawtismo kay sa kuwarta, busa miuyon dayon ko. Pag-uli nako, wala niya dawata ang akong suweldo kay matod  niya husto ang akong gibuhat sa pag-alagad sa Diyos. Unom ka bulan sa ulahi, mihunong ko sa akong trabaho nga dakog suweldo aron magtigom ug bahandi sa langit ingong espesyal payunir.​—Mat. 6:19, 20.

Sulod sa 18 ka tuig, ako nag-alagad ingong espesyal payunir ug magtatan-aw sa sirkito sa lainlaing bahin sa nasod. Naminyo sab ko kang Christiana, maunongon ug mapinasakopong kapikas, ug may anak ming babaye, si Lynette.

Panahon sa giyera sa Sierra Leone, kami ni Christiana nagpayunir sa Bo, laing dakong lugar nga minahag diamante. Didto, nakakita mig espirituwal nga “mga diamante”—tinuod nga Kristohanong mga tinun-an. Sa upat ka tuig, ang among kongregasyon miuswag ug kapig 60 porsiyento. Ang Bo karon dunay tulo ka mauswagong kongregasyon.

Sa 2002, ako gidapit nga mahimong membro sa Branch Committee sa Sierra Leone. Kami ni Christiana nagpuyo duol sa Bethel. Kada adlaw, ako motrabaho sa Bethel samtang si Christiana nag-alagad ingong espesyal payunir. Si Lynette nagtrabaho sa Bethel ingong maghuhubad sa pinulongang Krio.

Kaniadto, nangandoy kog literal nga mga diamante, pero mas bililhon pa ang akong nakaplagan—espirituwal nga mga bahandi. Nakakubkob sab kog 18 ka espirituwal nga “diamante,” o tinuod nga Kristohanong mga tinun-an. Dili gyod maihap ang mga panalangin ni Jehova kanako.