Jeremias 52:1-34
52 Si Zedekias+ 21 anyos dihang nahimo siyang hari, ug siya nagmando sa Jerusalem sulod sa 11 ka tuig. Ang iyang inahan mao si Hamutal+ nga anak ni Jeremias nga taga-Libna.
2 Siya nagpadayon sa pagbuhat kon unsay daotan sa mga mata ni Jehova, sumala sa tanang gibuhat ni Jehoiakim.+
3 Nahitabo kini tungod sa kasuko ni Jehova sa Jerusalem ug Juda, hangtod nga iyang giwagtang sila sa iyang panan-aw.+ Ug si Zedekias mirebelde sa hari sa Babilonya.+
4 Sa ikasiyam nga tuig sa pagmando ni Zedekias, sa ika-10 nga adlaw sa ika-10 nga bulan, si Haring Nabucodonosor* sa Babilonya misulong sa Jerusalem uban ang tibuok niyang kasundalohan. Sila nagkampo batok niini ug nagtukod ug paril libot niini.+
5 Ug ang siyudad gilikosan hangtod sa ika-11 nga tuig sa pagmando ni Haring Zedekias.
6 Sa ikasiyam nga adlaw sa ikaupat nga bulan,+ grabe ang gutom sa siyudad ug walay pagkaon alang sa katawhan sa yuta.+
7 Giguba ang usa ka bahin sa paril sa siyudad, ug pagkagabii ang tanang sundalo mikalagiw gikan sa siyudad agi sa ganghaan taliwala sa duha ka paril duol sa tanaman sa hari, samtang ang mga Caldeanhon naglibot sa siyudad; ug sila miagi sa dalan paingon sa Araba.+
8 Apan ang hari gigukod sa kasundalohan sa mga Caldeanhon, ug ilang naapsan si Zedekias+ didto sa desyertong kapatagan sa Jerico, ug ang tanan niyang kasundalohan nagkatibulaag.
9 Unya ilang gidakop ang hari ug gidala siya ngadto sa hari sa Babilonya didto sa Ribla sa yuta sa Hamat, ug iyang gisentensiyahan siya.
10 Ug gipatay sa hari sa Babilonya ang mga anak nga lalaki ni Zedekias sa iyang atubangan, ug gipatay usab niya sa Ribla ang tanang prinsipe sa Juda.
11 Unya gibutaan sa hari sa Babilonya si Zedekias,+ gigapos siyag tumbaga nga kadena, gidala siya sa Babilonya, ug gibilanggo siya hangtod sa adlaw sa iyang kamatayon.
12 Sa ika-10 nga adlaw sa ikalimang bulan sa ika-19 nga tuig sa pagmando ni Haring Nabucodonosor* sa Babilonya, si Nebuzaradan nga pangulo sa mga bantay, nga tig-alagad sa hari sa Babilonya, miabot sa Jerusalem.+
13 Iyang gisunog ang balay ni Jehova,+ ang balay* sa hari, ug ang tanang balay sa Jerusalem; gisunog usab niya ang matag dakong balay.
14 Ug ang mga paril palibot sa Jerusalem gitumpag sa tibuok Caldeanhong kasundalohan nga kauban sa pangulo sa mga bantay.+
15 Gidestiyero ni Nebuzaradan nga pangulo sa mga bantay ang pipila sa ubos nga mga tawo ug ang katawhan nga nahibilin sa siyudad. Gidestiyero usab niya ang mga mibiya aron modapig sa hari sa Babilonya ingon man ang uban pa sa mga batid nga artesano.*+
16 Apan gibilin ni Nebuzaradan nga pangulo sa mga bantay ang pipila sa kinapobrehan sa yuta ingong tig-atiman sa mga ubasan ug ingong mag-uuma nga gipugos sa pagtrabaho.+
17 Ug gidugmok sa mga Caldeanhon ang mga haligi+ nga tumbaga sa balay ni Jehova ug ang mga kareton+ ug ang Dagatdagat nga tumbaga+ nga didto sa balay ni Jehova, ug ilang gidala ang tanang tumbaga ngadto sa Babilonya.+
18 Gipanguha usab nila ang mga sudlanag abo, pala, pangpalong, panaksan,+ kopa,+ ug ang tanang galamiton nga tumbaga nga gigamit sa pag-alagad sa templo.
19 Gikuha sa pangulo sa mga bantay ang mga kawakawa,+ insensaryo, panaksan, sudlanag abo, tangkawan,*+ kopa, ug mga panaksan nga gama sa lunsayng bulawan ug plata.+
20 Kon bahin sa duha ka haligi, sa Dagatdagat, sa 12 ka torong baka+ nga tumbaga ilalom sa Dagatdagat, ug sa mga kareton nga gihimo ni Haring Solomon alang sa balay ni Jehova, ang tumbaga niini daghan kaayo nga kini dili na matimbang.
21 Kon bahin sa mga haligi, ang matag usa 18 ka maniko* ang gihabogon ug malibot sa usa ka pisi nga 12 ka maniko;+ ang gibag-on niini upat ka tudlo,* ug haw-ang ang sulod niini.
22 Ug ang uloulo niini maoy tumbaga; ug ang gihabogon sa usa ka uloulo lima ka maniko;+ ug ang ginambat ug ang mga disenyo nga pormag prutas nga granada sa palibot sa uloulo gama sa tumbaga. Ingon usab niana ang ikaduhang haligi ug ang mga granada.
23 Dihay 96 ka granada sa palibot niini; tanantanan, dihay 100 ka granada sa palibot sa ginambat.+
24 Gidala usab sa pangulo sa mga bantay si Seraias+ nga pangulong saserdote, si Sofonias+ nga ikaduhang saserdote, ug ang tulo ka magbalantay sa pultahan.+
25 Ug iyang gikuha gikan sa siyudad ang usa ka opisyal sa palasyo nga nangulo sa mga sundalo, ang pito ka suod nga kauban sa hari nga didto sa siyudad, ingon man ang sekretaryo sa pangulo sa kasundalohan nga nagtigom sa katawhan sa yuta ug ang 60 ka lalaki gikan sa katawhan sa yuta nga didto sa siyudad.
26 Gidala sila ni Nebuzaradan nga pangulo sa mga bantay ngadto sa hari sa Babilonya didto sa Ribla.
27 Sila gipamatay sa hari sa Babilonya didto sa Ribla+ sa yuta sa Hamat. Busa ang Juda gidestiyero gikan sa yuta niini.+
28 Kini ang katawhan nga gidestiyero ni Nabucodonosor:* sa ikapitong tuig sa iyang pagmando, 3,023 ka Hudiyo.+
29 Sa ika-18 nga tuig sa pagmando ni Nabucodonosor,*+ 832 ka tawo ang gidestiyero gikan sa Jerusalem.
30 Sa ika-23 nga tuig sa pagmando ni Nabucodonosor,* gidestiyero ni Nebuzaradan nga pangulo sa mga bantay ang mga Hudiyo, 745 ka tawo.+
Tanantanan, 4,600 ka tawo ang gidestiyero.
31 Unya sa ika-37 nga tuig sa pagkadestiyero ni Haring Jehoiakin+ sa Juda, si Evil-merodak nahimong hari sa Babilonya. Sa ika-25 nga adlaw sa ika-12 nga bulan sa maong tuig, iyang gipagula si* Haring Jehoiakin sa Juda sa bilanggoan.+
32 Maayo ang iyang pagtratar kaniya ug iyang gihatagan siyag posisyon* nga labaw pa sa ubang mga hari nga kauban niya sa Babilonya.
33 Busa gihukas ni Jehoiakin ang iyang mga besti sa pagkabinilanggo, ug siya magkan-anan na uban sa hari sa tanang adlaw sa iyang kinabuhi.
34 Adlaw-adlaw siyang ginahatagan sa hari sa Babilonya ug pagkaon hangtod sa adlaw sa iyang kamatayon, sa tanang adlaw sa iyang kinabuhi.
Mga Footnote
^ Literal, “Nabucodorosor,” lahi nga espeling.
^ Literal, “Nabucodorosor,” lahi nga espeling.
^ “palasyo.”
^ Hanas sa paghimog mga butang.
^ Iningles, lampstand.
^ Ang usa ka maniko katumbas sa 44.5 sentimetros (17.5 pulgadas). Tan-awa ang Apendise B14.
^ Ang usa ka tudlo katumbas sa 1.85 sentimetros (0.73 pulgadas). Tan-awa ang Apendise B14.
^ Literal, “Nabucodorosor,” lahi nga espeling.
^ Literal, “Nabucodorosor,” lahi nga espeling.
^ Literal, “Nabucodorosor,” lahi nga espeling.
^ Literal, “giisa ang ulo ni.”
^ O “gibayaw ang trono niini.”
