Ikaduhang Samuel 1:1-27
1 Human sa kamatayon ni Saul, dihang nakabalik na si David gikan sa pagpildi* sa mga Amalekanhon, si David miestar sa Ziklag+ ug duha ka adlaw.
2 Sa ikatulo ka adlaw, dihay tawong miabot gikan sa kampo ni Saul nga gisi ug besti ug may yuta sa iyang ulo. Pagduol niya kang David, siya miyukbo ug mihapa.
3 Si David nangutana kaniya: “Diin ka gikan?” Siya mitubag: “Nakaikyas ko gikan sa kampo sa Israel.”
4 Si David nangutana: “Unsay nahitabo? Palihog, sultihi ko.” Siya mitubag: “Ang mga sundalo nangalagiw gikan sa gubat ug daghan ang nangapukan ug nangamatay. Bisan si Saul ug ang iyang anak nga si Jonatan namatay sab.”+
5 Unya gipangutana ni David ang batan-ong lalaki nga nagbalita kaniya: “Giunsa nimo pagkahibalo nga patay na si Saul ug ang iyang anak nga si Jonatan?”
6 Ang batan-ong lalaki mitubag: “Didto ko sa Bukid sa Gilboa+ niadtong panahona, ug unya nakita nako si Saul nga nanukod sa iyang bangkaw, ug hapit na siya maapsi sa mga karo ug sa mga mangangabayo.+
7 Paglingi niya sa iyang luyo, iya kong nakita. Unya iya kong gitawag, ug miingon ko, ‘Ania ko!’
8 Gipangutana ko niya, ‘Kinsa man ka?’ Mitubag ko, ‘Amalekanhon ko.’+
9 Dayon siya miingon, ‘Palihog, dali ngari ug patya ko, kay grabe ang akong pag-antos apan buhi pa ko.’
10 Busa mitindog ko tapad niya ug gipatay nako siya,+ kay nasayod ko nga dili na siya mabuhi human siya masamdi. Unya akong gikuha ang korona* nga diha sa iyang ulo ug ang pulseras nga diha sa iyang bukton, ug ako kining gidala dinhi sa akong ginoo.”
11 Tungod niini, gigisi ni David ang iyang besti, ug kana usab ang gibuhat sa tanang tawo nga kauban niya.
12 Ug sila nagminatay ug nanghilak ug nagpuasa+ hangtod sa pagkagabii kay si Saul, ang iyang anak nga si Jonatan, ang katawhan ni Jehova, ug ang daghang Israelinhon+ nangamatay pinaagig espada.
13 Gipangutana ni David ang batan-ong lalaki nga nagbalita kaniya: “Taga-asa man ka?” Siya mitubag: “Anak ko sa usa ka Amalekanhon, usa ka langyaw nga nagpuyo sa Israel.”
14 Unya si David miingon kaniya: “Nganong wala ka mahadlok sa pagpatay sa dinihogan* ni Jehova?”+
15 Busa gitawag ni David ang usa sa mga batan-ong lalaki ug giingnan: “Duol ngari. Patya siya.” Ug iyang gipatay siya.+
16 Si David miingon: “Ikaw ang responsable sa imong kamatayon,* kay ang imo mismong baba ang misaksi batok kanimo, nga nag-ingon, ‘Akong gipatay ang dinihogan ni Jehova.’”+
17 Unya si David miawit niining awit sa pagbangotan alang kang Saul ug sa iyang anak nga si Jonatan+
18 ug miingon nga ang katawhan sa Juda kinahanglang tudloan niining awit nga gitawag ug “Ang Pana,” nga nasulat sa basahon ni Jasar:+
19 “Ang imong katahom, Oh Israel, gipatay ibabaw sa imong tag-as nga dapit.+
Nangapukan gayod ang mga tawong gamhanan!
20 Ayaw ninyo kini isugilon sa Gat;+Ayaw kini ipahibalo sa kadalanan sa Askelon,Kay basin magsadya unya ang mga anak nga babaye sa mga Filistehanon,Kay basin maghugyaw ang mga anak nga babaye sa mga dili tinuli.
21 Kamong kabukiran sa Gilboa,+Wala untay yamog o ulan nga modangat kaninyo,Wala untay kaumahan nga magpatunghag mga bunga nga ikahalad sa Diyos,+Kay didto nahugawan ang taming sa mga gamhanan,Ang taming ni Saul wala na madihogi ug lana.
22 Ang pana ni Jonatan ug ang espada ni Saul wala mobalik+Nga wala makaulag dugo ug wala makatigbas sa unod sa mga gamhanan.Wala kini mapakyas.+
23 Si Saul ug Jonatan+ gimahal ug gipabilhan* sa buhi pa sila,Bisan sa kamatayon sila wala magkabulag.+
Sila mas tulin kay sa mga agila,+Mas kusgan kay sa mga leyon.+
24 Oh mga anak nga babaye sa Israel, panghilak mo tungod kang Saul,Kinsa nagbesti kaninyo ug hayag-pula nga besti nga gidekorasyonan,Kinsa nagbutang sa inyong mga sinina ug bulawang mga pahiyas.
25 Ang mga gamhanan nangapukan gayod sa gubat!
Si Jonatan gipatay ibabaw sa tag-as nga dapit!+
26 Naguol kaayo ko nga wala na ka, igsoon kong Jonatan;Duol kaayo ka sa akong dughan.+
Ang imong gugma kanako mas labaw pa kay sa gugma sa kababayen-an.+
27 Ang mga gamhanan nangapukan gayodUg ang mga hinagiban sa gubat nangahanaw!”
