Niining panahon sa teknolohiya, ang imong boss, mga kauban sa trabaho, o mga kliyente magdahom tingali nga makontak ka nila 24-7, maong lisod ang pagbahin sa panahon nga imong gamiton sa trabaho ug sa ubang bahin sa kinabuhi, apil na sa imong kaminyoon, ug ang paghatag ug prayoridad sa mas importanteng mga butang.

•  Ang angay nimong mahibaloan

•  Mga tip sa pagbahin sa imong panahon

•  Ang giingon sa mga magtiayon

•  Giya sa panag-estorya

•   Tungod sa teknolohiya, posible nga dili na matarong ug bahin ang panahon tali sa imong trabaho ug sa imong kaminyoon. Ingong resulta, bation tingali nimo nga ang mga tawag, e-mail, o text nga imong madawat human sa trabaho kinahanglan dayong atimanon.

   “Naandan na nga inig-uli nato gikan sa trabaho, makagahin na tag panahon sa atong pamilya. Pero karon morag imposible na nâ, kay kon makadawat kag e-mail ug tawag bahin sa trabaho, magpokus ka na niini imbes sa imong kapikas.”—Jeanette.

•   Aron mahatagan nimog saktong panahon ang imong trabaho ug pamilya, kinahanglan nga duna kay himoon. Kon dili ka magplano, makuha sa trabaho ang panahon nga para sa imong kapikas.

   “Sagad ang imong kapikas ang una nimong mapasagdan kay maghunahuna ka, ‘Ah, makasabot ra nâ siya. Mopasensiya ra nâ siya. Mag-uban lang mi unya.’”—Holly.

•   Unaha ang imong kaminyoon. Ang Bibliya nag-ingon: “Kon unsay gihiusa sa Diyos dili angayng bulagon sa tawo.” (Mateo 19:6) Kon dili ka mosugot nga ikaw ug ang imong kapikas “bulagon” sa laing tawo, dili sab nimo angayng tugotan ang trabaho sa pagbulag ninyo.

   “Ang pipila ka kliyente maghunahuna nga kay gibayran ka nila, kinahanglan ka nilang makontak bisag kanus-a nga gusto nila. Kay mas importante nako ang akong kaminyoon, ako silang sultihan nga dili ko available sa akong day-off, pero mokontak ko nila kon puwede na.”—Mark.

   Pangutan-a ang kaugalingon, ‘Gipakita ba sa akong mga buhat nga mas importante nako ang akong kaminyoon kay sa akong trabaho?’

•   Balibari ang trabaho kon gikinahanglan. Ang Bibliya nag-ingon: “Ang kaalam naa sa mga mapainubsanon [o, niadtong miila sa ilang limitasyon].” (Proverbio 11:2) Kon giila nimo ang imong limitasyon, maayong balibaran o idelegar nimo ang ubang trabaho.

   “Tubero ko, busa kon dunay manginahanglag dinaliang tabang, natural nga ma-stress ang maong tawo. Kon dili nako mahimo dayon ang iyang gipahimo, ako siyang i-refer sa laing tubero.”—Christopher.

   Pangutan-a ang kaugalingon: ‘Andam ba nakong balibaran ang ekstra nga trabaho kon mobati ang akong kapikas nga napasagdan na siya? Unsa may ikaingon sa akong kapikas?’

•   Pag-eskedyul ug panahon nga magkauban mo. Ang Bibliya nag-ingon: “Dunay gitakdang panahon alang sa tanang butang.” (Ecclesiastes 3:1) Kon busy kaayo ka sa trabaho, ilabinang importante nga mag-eskedyul kag panahon uban sa imong kapikas, ug seguroa nga masunod kana.

   “Sagad, kon busy gyod kaayo, magsabot mig oras nga magkauban mi—bisag mangaon lang o maglakawlakaw sa baybayon—nga walay makabalda namo.”—Deborah.

   Pangutan-a ang kaugalingon: ‘Nag-eskedyul ba kog panahon nga makauban nako ang akong kapikas nga walay makabalda namo? Unsa may ikaingon sa akong kapikas?’

•   Palonga ang imong gadyet. Ang Bibliya nag-ingon: ‘Seguroa ninyo ang mas importanteng mga butang.’ (Filipos 1:10) Puwede nimong palongon usahay ang imong gadyet aron dili ka madisturbo sa mga tawag o text bahin sa trabaho.

   “Naningkamot gyod ko nga dili na mohimog trabaho human sa akong gitakda nga panahon. Nianang panahona, akong i-off ang mga notification sa akong cellphone.”—Jeremy.

   Pangutan-a ang kaugalingon: ‘Gibati ba nako nga kinahanglan kong makontak enkaso nga naay tuyo ang akong boss o kliyente? Unsa may ikaingon sa akong kapikas?’

•   Magmakataronganon. Ang Bibliya nag-ingon: “Ipakita sa tanan ang inyong pagkamakataronganon.” (Filipos 4:5) Sa tinuod lang, may mga higayon nga makuha sa trabaho ang panahon nga para unta kanimo. Pananglitan, tungod sa klase sa trabaho sa imong kapikas, kinahanglan tingali siyang makontak human sa office hours. Ayaw pagdahom ug labaw pa kay sa mahimo sa imong kapikas.

   “Ang akong bana dunay gamayng negosyo, ug sagad duna siyay kinahanglang atimanon human sa office hours. Usahay, maglagot ko, pero kay mogahin man gihapon siyag daghang panahon para nako, okey ra ko.”—Beverly.

   Pangutan-a ang kaugalingon: ‘Gipakita ba nako sa akong kapikas nga nakasabot ko nga busy kaayo siya, maong dili ko mangayog panahon o atensiyon nga labaw sa iyang mahatag? Unsa may ikaingon sa akong kapikas?’

 Una, puwede mong magtinagsa sa pagkonsiderar sa mosunod nga mga pangutana, dayon hisgoti ninyo ang inyong mga tubag.

•   May higayon ba nga mireklamo ang imong kapikas nga nagadala kag trabaho sa balay? Kon mao, mouyon ka ba?

•   Sa imong hunahuna, unsa pay imong mahimo aron matarong nimog bahin ang imong panahon?

•   Naghunahuna ka ba nga ang imong kapikas dili makabilin sa iyang trabaho “sa trabahoan”? Kon mao, unsa nga mga higayon ang imong mahinumdoman?

•   Unsang mga kausaban, kon duna man, ang gusto nimong himoon sa imong kapikas maylabot sa pagbahin sa iyang panahon?