Si apostol Pablo misulat: “Dihang buot nakong buhaton ang maayo, ang daotan ania kanako.” (Roma 7:21) Mibati ba pod ka ana? Kon mao, kini nga artikulo makatabang nimo nga masuklan ang tentasyon sa pagbuhat ug daotan.

•  Ang angay nimong mahibaloan

•  Ang imong mahimo

•  Ang giingon sa ubang batan-on

 Sagad, matental ka sa pagbuhat ug daotan kon presyuron ka sa uban. Gani, ang Bibliya nag-ingon nga “ang daotang pakig-uban makadaot sa mapuslanong pamatasan.” (1 Corinto 15:33) Ang presyur gikan sa uban o sa media magpatunghag mga tinguha sa imong kasingkasing nga magtental nimo sa pagbuhat ug dili maayo ug “mosunod sa panon sa katawhan [o, sa kadaghanan] alang sa daotang katuyoan.”​—Exodo 23:2.

 “Ang presyur nga maangayan ug dawaton sa uban makatental nimo sa pagsundog sa ilang ginahimo, aron lang ganahan sila nimo.”​—Jeremy.

 Hunahunaa: Nganong mas lisod suklan ang tentasyon kon sobra kang mabalaka kon unsay hunahunaon sa uban kanimo?​—Proverbio 29:25.

 Ang punto: Ayaw ikompromiso ang imong baroganan tungod sa presyur gikan sa imong mga kaedad.

 Seguroa nga kombinsido ka sa imong baroganan. Kon dili ka segurado sa imong gituohan, puwede kang kontrolahon sa uban nga samag puppet. Mas maayong sundon ang tambag sa Bibliya: “Tinoa ang tanang butang; pangupti pag-ayo ang maayo.” (1 Tesalonica 5:21) Kon kombinsido ka sa imong gituohan, mas sayon para nimo ang pagsunod niana ug ang pagsukol sa tentasyon.

 Hunahunaa: Nganong nagtuo ka nga ang moral nga mga sukdanan sa Diyos maoy para sa imong kaayohan?

 “Akong namatikdan nga dihang akong barogan ang akong gituohan ug dili magpadala sa tentasyon, mas tahoron ko sa uban.”​—Kimberly.

 Maayong ehemplo sa Bibliya: Daniel. Bisag batan-on pa, “gihukom ni Daniel sa iyang kasingkasing” nga sundon ang mga balaod sa Diyos.​—Daniel 1:8.

 Sayra ang imong mga kahuyangan. Ang Bibliya naghisgot bahin sa “mga tinguha nga iya sa pagkabatan-on”​—mga tinguha nga kusog kaayo panahon sa pagkabatan-on. (2 Timoteo 2:22) Wala lang ni maglakip sa seksuwal nga gana kondili apil pod ang tinguha nga dawaton sa uban ug magkinabuhing independente bisag dili pa ka andam.

 Hunahunaa: Ang Bibliya nag-ingon nga “ang matag usa masulayan pinaagi sa . . . pagkahaylo sa iyang kaugalingong tinguha.” (Santiago 1:14) Unsang tinguha ang makapatental kaayo nimo?

 “Magmatinud-anon sa imong kaugalingon kon unsang mga tentasyon ang dali kang matental. Pag-research kon unsaon pagsukol sa maong mga tentasyon, ug isulat ang mga punto nga imong magamit aron mahibalo na ka kon unsaon pagsukol niana.”​—Sylvia.

 Maayong ehemplo sa Bibliya: David. Dihay mga panahon nga nagpadaog siya sa presyur sa uban ug bisan sa iyang kaugalingong mga tinguha. Pero nakakat-on si David sa iyang mga sayop ug naningkamot nga dili na magpadala sa maong mga tentasyon. “Buhati ako ug putli nga kasingkasing,” miampo siya kang Jehova, “ug ibutang sa akong kahiladman ang usa ka bag-ong espiritu, usa nga malig-on.”​—Salmo 51:10.

 Ayaw padala sa tentasyon. Ang Bibliya nag-ingon: “Ayaw pagpadaog sa daotan.” (Roma 12:21) Kana nagpasabot nga makasukol ka sa tentasyon. Makapili ka sa pagbuhat kon unsay maayo.

 Hunahunaa: Sa unsang paagi nimo masuklan ang tentasyon ug maseguro nga dili ka makahimog daotan?

 “Akong hunahunaon kon unsay akong bation kon magpadala ko sa tentasyon. Malipay ba ko? Tingali, pero kadiyot ra. Mao ba gihapon nay akong bation sa ulahi? Dili, magmahay lang ko ug maguol. Sulit ba gyod ni? Dili!”​—Sophia.

 Maayong ehemplo sa Bibliya: Pablo. Bisag miangkon siya nga duna siyay dili maayong mga tinguha, wala magpadala si Pablo niini. Siya misulat: “Ako nagmakmak sa akong lawas ug naghimo niini nga samag ulipon.”​—1 Corinto 9:27.

 Ang punto: Ikaw ang makabuot kon unsaon nimo pag-atubang ang tentasyon.

 Hinumdomi nga temporaryo ra ang mga tentasyon. “Daghan sa mga butang nga makapatental kaayo niadtong hayskul pa ko ang dili na importante karon,” miingon ang 20 anyos nga si Melissa. “Ang paghunahuna niini nagpasalig nako nga molabay ra ang mga tentasyon karon, ug sa umaabot makita nako nga maayo ra gyod nga wala ko magpadaog niana.”