Niadtong Enero 1, 2020, ang pamilyang Bethel sa Britain misugod pagbalhin sa bag-ong pasilidad niini duol sa Chelmsford, Essex. Gidahom nga sa Marso 2020, ang tanang bug-os panahong boluntaryo nagpuyo ug nagtrabaho na sa bag-ong sangang buhatan.

Sukad niadtong 1959, ang sangang buhatan sa Britain naa sa Mill Hill, London. Dihang miuswag ang buluhatong pagsangyaw ug nagkadaghan ang trabaho, ang sangang buhatan mipalit ug mga bilding sa lainlaing lokasyon sa London. Tungod niini, daghang bilding ang kinahanglang mentinahon ug ang mga Bethelite kinahanglang mobiyahe aron makaabot sa lainlaing bilding. Kaniadto, ang sangang buhatan nag-imprenta sab ug mga publikasyon, ug may panahon nga nag-imprenta nig kapin sa 10 porsiyento sa mga publikasyon sa tibuok kalibotan. Pero niadtong Marso 2018, human sa 92 ka tuig nga pag-imprenta, gihunong kini ug gibaligya ang mga printing press. *

Miabot ug lima ka tuig ang pagtukod sa bag-ong sangang buhatan sa Britain. Kay ang tanang departamento sa Bethel naa na sa usa ka lugar, mas paspas na ang trabaho ug madaginot sab ang mga donasyon. Ang bag-ong pasilidad naay duha ka production building, mga opisina, ug unom ka residence building nga puwedeng kapuy-an sa kapig 400 ka tawo. Usa ka multipurpose nga building ang puwedeng gamiton ingong auditorium, dining room, ug para sa ubang okasyon.

Sa pagkakaron, ang sangang buhatan sa Britain mao ang nagdumala sa buluhatong pagsangyaw sa lainlaing teritoryo, apil ang Falkland Islands, Guernsey, Ireland, Isle of Man, Jersey, ug Malta. Ang bag-ong sangang buhatan magpokus sa paghimog mga audio, video, ug digital nga mga publikasyon. Dugang pa, kini magpadayon sa pagdumala sa espirituwal nga mga kalihokan sa kapig 150,000 ka magmamantala, nga nag-alagad sa kapig 1,800 ka kongregasyon.

Ang mga tour sa bag-ong Bethel magsugod sa Abril 6, 2020. Ang mga bisita malingaw gyod sa mga eksibit sama sa kasaysayan sa Bibliya sa Britain ug Ireland ug sa papel sa Bethel sa paspas nga pag-uswag sa organisasyon ni Jehova.

Si Brader Stephen Hardy, membro sa Komite sa Sangang Buhatan sa Britain, apil sa maong proyekto sukad sa pagsugod niini. Iyang gisulti ang gibati sa daghang igsoon: “Gipalihok gyod ni Jehova ang mga igsoon sa Britain ug sa ubang nasod nga moboluntaryo niini nga proyekto. Ang resulta labaw pa kay sa among gidahom, ug nahimaya gyod si Jehova.”—Efeso 3:20.