“Di Witnisiz mi kain tu evribadi, eevn tu mi daag dehn. Ahn wan day, wahn laydi weh naym Elaine, weh mi-di stan op neks tu di lichricha kyaat, gi mi daag dehn sohn chreet. Afta dat, weneva wi wuda goh kloas tu di kyaat, mi daag dehn mi aalwayz waahn goh tu di Witnisiz fi geh dehn lee chreet.

“Sohn monts mi paas, ahn weneva wi wuda goh wehpaat di Witnisiz deh, mi daag dehn mi geh fi injai dehn lee chreet, an Ai mi geh fi injai di kanvasayshan dehn weh Ah mi ga wid dehn. Bot Ah stil neva waahn taak tu dehn tu moch. Ah mi oava 70 yaaz oal, an Ah neva shoar weh di Witnisiz mi bileev eena. Eena di paas, wahn lata di cherch dehn mi disapoint mi. Soh Ah mi disaid dat ih bes fi mek Ah stodi di Baibl pahn mi oan.

“Rong dis sayhn taim, Ah mi si sohn ada Witnisiz di stan op neks tu dehn kyaat eena difrent ayryaz a di siti. Dehn mi frenli tu, ahn dehn mi aalwayz yooz di Baibl fi ansa mi kweschanz. Bikaaz a dat, Ah mi staat tu chros dehn moa.

“Wan day, Elaine aks mi: ‘Yoo bileev dat animalz da wahn gif fahn Gaad?ʼ Ai mi tel ahn: ‘Yes, af koars!ʼ Den Elaine mi reed tu mi Isaiah 11:6-9. Afta dat, Ah mi waahn laan moa bowt di Baibl. Bot Ah stil neva waahn aksep eni lichricha fahn di Witnisiz.

“Afta sohn dayz mi paas, Ah mi stil injai sohn nais ahn shaat kanvasayshanz wid Elaine an ih hozban, Brent. Dehn inkorij mi fi reed di buk a Machyu tu di buk a Aks soh dat Ah kuda andastan weh ih reeli meen fi bee wahn chroo Kristyan. Soh dat da weh Ah mi du. Ahn noh tu lang afta dat, Ah mi aksep wahn Baibl stodi wid Brent an Elaine. Dat da-mi rong di midl a 2016.

“Ah mi luk faawod fi stodi di Baibl evri week an fi goh da di meetin dehn da di Kingdom Haal. Ah mi hapi bowt weh Ah mi-di laan fahn di Baibl, an Ah mi seeʼt az wahn blesin. Bowt wahn yaa layta, Ah mi geh baptaiz az wan a Jehoava Witnisiz. Now Ah 79 yaaz oal, an Ah soh tankful dat Ah fain di chroo rilijan. Ai da paat a wahn big spirichwal famili weh mek op a peepl fahn aal oava di werl. Dat da wahn amayzin blesin fahn Jehoava.”