Saam 40:1-17
Dis da fi di dairekta. Dis da Dayvid sang.
40 Ah put aala mi hoap eena Jehoava,*An ih bring ih ayz kloas tu mi ahn lisn* tu mi wen Ah krai owt tu ahn fi help.
2 Hihn bring mi owta wahn deep dich weh gat een waata weh di floa faas,Fahn owta wahn modi swamp.
An ih set mi fut dehn pahn wahn rak;Hihn mek Ah stan op pahn salid grong.
3 Den ih put wahn nyoo sang eena mi mowt,Wahn sang weh wahn prayz wi Gaad.
Lata peepl wahn si weh Gaad mi du ahn see’t az sohnting amayzin,Ahn dehn wahn put dehn chros eena Jehoava.
4 Wahn persn weh put dehn chros eena Jehoava wahn bee hapiAn ih wahn bee hapi wen ih noh goh tu dehn wan weh laik ribel er tu dehn wan weh laiyad.
5 Yu du wahn lata wandaful tingz,Oa Jehoava mi Gaad,Di tingz weh yu du wandaful ahn yu tink bowt lata tingz weh benifit wi.
Nobadi noh deh weh da laik yoo;If Ah wuda chrai tel adaz er taak bowt weh yu du,Ih wuda bee tu moch fi mek Ah shayr!
6 Yu neva di luk fi wahn aafrin er wahn sakrifais,Bot yu oapm mi ayz fi hyaa.
Yu neva aks fi wahn bon aafrin* er wahn sin aafrin.
7 Den Ah seh: “Si mi ya,Jos laik weh deh rait dong eena di skroal bowt mi.
8 Oa mi Gaad, ih mek Ah feel hapi fi du weh yoo waahn,Ahn yu laa deh deep dong eena mi haat.
9 Ah anonks di gud nyooz a raichosnis eena di big kangrigayshan.*
Oa Jehoava, yoo noa dat Ah noh hoal bak fahn taak bowt it.
10 Ah neva haid di raichos tingz weh yu mi du eena mi haat.
Ah mek evribadi noa bowt yu faytfulnis ahn yu salvayshan.
Ah neva haid yu lov* ahn yu chroot fronta di big kangrigayshan.”
11 Oa Jehoava, noh hoal bak fahn shoa mi mersi.
Mek yu lov* ahn yu chroot aalwayz protek mi.
12 Ah ga soh moch chrobl rong mi dat Ah kyaahn konk dehn.
Mi mistayk dehn da soh moch dat dehn pail op an Ah kyaahn si mi way;Dehn moa dan di hyaa weh Ah ga pahn mi hed,An Ah feel diskorij.
13 Oa Jehoava, pleez sayv mi bikaaz yu waahn sayv mi.
Pleez hori kohn help mi, Oa Jehoava.
14 Mek aala dehn wan weh di chrai kil mi* luk shaym.
Mek dehn wan weh rijais bikaaz Ah di sofa feel shaym ahn ron weh.
15 Mek dehn wan weh di tel mi: “Ahaahn! Gud fi yu!”
Deh eena shak bikaaz a dehn oan shaym.
16 Mek dehn wan weh di saach fi yooFeel jai ahn rijais sayka yoo.
Mek dehn wan weh waahn salvayshan fahn yoo seh:
“Prayz Jehoava.”
17 Bot Ah poa ahn nobadi deh fi help mi;Ah hoap Jehoava pay atenshan tu mi.
Yoo da di wan weh wahn help mi ahn reskyu mi;Mi Gaad, pleez noh bee layt.
Futnoat
^ Er “Ah mi-di wayt pahn Jehoava wid payshens.”
^ Er “ben dong fi lisn.”
^ Si di Glasari, “Bon aafrin.”
^ Si di Glasari, “Kangrigayshan.”
^ Er “laayal lov.” Si di Glasari, “Laayal lov.”
^ Er “laayal lov.”
^ Er “mi soal.” Si di Glasari, “Soal.”
