Machyu 11:1-30
11 Afta Jeezas don tel ih 12 disaipl dehn weh fi du, ih gaan da di siti dehn weh mi deh kloas bai fi teech ahn preech.
2 Wail Jan mi deh da jayl, ih mi geh fi hyaa bowt aal di tingz dehn weh Krais mi-di du, soh ih sen fi hihn disaipl dehn
3 fi aks Jeezas: “Yoo da di wan weh wi di wayt fa, er wee fi ekspek wahn difrent persn?”
4 Jeezas ansa dehn: “Unu goh ahn tel Jan bowt weh unu di hyaa ahn si:
5 Peepl weh mi blain ku si now ahn peepl weh mi kripl ku waak now. Peepl weh mi ga leprosi geh heel ahn peepl weh mi def ku hyaa now. Di ded kohn bak tu laif ahn di poa peepl di hyaa di gud nyooz.
6 Di persn weh noh fain no reezn fi dowt da hoo mee* wahn bee hapi.”
7 Wail dehn mi-di goh bak, Jeezas staat taak tu di krowd bowt Jan. Ih aks dehn: “Da hoo unu mi gaahn fi si eena di wildanes? Wahn persn weh da laik wahn plaant* weh di sway bowt eena di breez? No.
8 Da hoo den? Wahn man weh mi jres op eena ekspensiv kloaz? No. Kaaz onli peepl weh wayr ekspensiv kloaz liv eena palis.
9 Soh, da wai unu mi gaahn tu di wildanes? Fi si wahn prafit? Yes, Ai di tel unu, hihn da wahn prafit, ahn faar moa impoatant dan di ada prafit dehn.
10 Dis da di wan weh di Skripchaz mi rait bowt: ‘Ai di sen mi mesinja heda yu,* ahn hihn wahn pripyaa di way fi yu!’
11 Ah di tel unu, op tu now, nobadi pahn ert grayta dan Jan di Baptis, bot eevn wahn persn weh noh ga wahn hai pozishan eena di Kingdom a hevn grayta dan hihn.
12 Bot fahn di dayz a Jan di Baptis, peepl di chrai get eena di Kingdom a hevn, ahn di wan dehn weh chrai haad get een.
13 Dat da wai di Prafit Dehn ahn di Laa mi prafesai til di taim a Jan.
14 Soh weda er nat unu waahn bileev it, hihn da ‘Ilaija, di wan weh di prafit dehn mi seh fi kom.’
15 Di wan weh ga ayz, lisn gud.
16 “Da hoo dis jenarayshan stan laik? Dehn da laik yong chiljren weh di sidong eena di maakit plays dehn ahn di hala owt tu wan anada;
17 dehn di seh: ‘Wee mi play di floot fi unu, bot unu neva daans; wee mi sing sohn sad sang fi unu, bot unu neva shoa dat unu mi sad.’*
18 Jan yoostu faas ahn noh jrink no wain, ahn peepl seh, ‘Hihn ga wahn deemon eena ahn.’
19 Di Son a man di eet ahn jrink wain, ahn stilyet peepl seh, ‘Hihn eet ahn jrink tu moch, hihn da frenz wid di taks kalekta ahn di sina dehn.’ Bot, di raichos tingz weh wahn persn du wahn proov dat ih waiz.”
20 Den Jeezas staat tu lekcha di peepl eena di siti dehn wehpaat ih mi du moas a ih mirakl dehn,* kaaz dehn neva did ripent.
21 Ih tel dehn: “Ih wahn bee chrobl fi unu peepl a Korayzin! An ih wahn bee chrobl fi unu peepl a Betsayda! Kaaz if di peepl a Taiya ahn Saidan mi si aala di miraklz weh unu mi si, dehn wuda mi ripent lang taim; dehn wuda mi put aan sak klaat* ahn sidong eena ashiz.
22 Bot Ah di tel unu, ih wahn bee eeziya fi di peepl a Taiya ahn Saidan pahn Jojment Day dan fi unu.
23 An az fi yoo, Kapernyam, yu tink Gaad wahn lif yu op tu hevn? No! Hihn wahn kehr yu schrayt dong tu di Grayv.* Bikaaz if Ai mi du dehndeh saym mirakl da Sadam laik weh Ai mi du fi yoo, da siti wuda mi stil deh ya tudeh.
24 Bot Ah di tel unu, ih wahn bee eeziya fi di peepl a Sadam dan fi yoo pahn Jojment Day.”
25 Den Jeezas seh: “Faada, Laad a hevn an ert, Ai di prayz yu fronta evribadi, kaaz yu haid dehnya tingz fahn di ejukaytid ahn waiz peepl ahn shoa dehn tu di hombl wan dehn weh da laik smaal chiljren.
26 Yes, Oa Faada, bikaaz dis da di way yoo mi waahn mek ih bee.
27 Mai Faada han oava evriting tu mee, ahn nobadi noa di Son eksep di Faada, ahn nobadi noa di Faada gud eksep di Son; nobadi noa di Faada anles di Son wilin fi teech dehn bowt hihn.
28 Evribadi weh taiyad ahn di kehr wahn hevi load, unu kohn tu mee, an Ai wahn rifresh unu.
29 Unu tek mai yoak ahn put it pahn fi unu shoalda ahn laan fahn mi, kaaz Ai kain ahn hombl, an unu wahn fain res fi unu soal.*
30 Kaaz mai yoak eezi fi kehr, ahn mi load noh hevi fi bak ataal.”
Futnoat
^ Er “fain no reezn fi stombl sayka mee.”
^ Lit., “reed.” Wahn kaina taal graas weh groa eena swampi ayrya.
^ Lit., “fronta yu fays.”
^ Er “neva beet unu ches fi shoa unu sadnis.”
^ Er “ih powaful werks.”
^ Si di Glasari, “Sak klaat.”
^ Er “Haydeez,” weh da di grayv. Si di Glasari, “Grayv.”
^ Er “fi unuself.”
