Look 18:1-43
18 Den ih tel dehn wahn iloschrayshan bowt wai ih impoatant fi aalwayz pray ahn fi neva giv op;
2 ih seh: “Eena wahn siti, dehn mi ga wahn joj weh neva ga no rispek fi Gaad* ner fi eni man.
3 Wahn wido mi deh eena da siti tu, ahn shee mi stay di goh tu hihn ahn seh, ‘Ser, Ah ga wahn kays da koat, soh pleez mek shoar dat Ai geh jostis gens mi enimi.’
4 Wel, fi wahn lang taim hihn mi rifyooz fi help di laydi, bot aftawodz ih seh tu ihself, ‘Eevn doa Ah noh ga no rispek fi Gaad* ner man,
5 bikaaz dis wido kip aan di bada mi, Ah wahn si tu it dat shee get di jostis weh ih di aks fa soh dat shee noh kip aan di kohn bak ahn wayr mi owt, kaaz Ah kyaahn tek it nohmoh.’”
6 Den di Laad seh: “Eevn doa da joj wikid, unu mi hyaa weh ih seh?
7 Soh if hihn anaal ku gi jostis, den how bowt Gaad? Fi shoar hihn wahn gi jostis tu di wan dehn weh hihn chooz, di wan dehn weh krai owt tu hihn day ahn nait, an ih wahn payshent wid dehn tu.
8 Ah di tel unu, hihn wahn mek shoar dat dehn geh jostis rait away. Bot wen di Son a man kom, yu tink hihn reeli wahn fain dis kaina fayt pahn di ert?”
9 Soh ih gi wahn neks iloschrayshan fi di wan dehn weh tink dat dehn soh raichos ahn weh luk dong pahn ada peepl:
10 “Wahn Farisee ahn wahn taks kalekta gaan eena di templ fi pray.
11 Di Farisee stan op ahn staat pray eena ih haat, di seh, ‘Oa Gaad, Ah waahn tank yu dat Ai difrent fahn evribadi els; Ai noh stan laik dehn wan weh teef, dehn wan weh laiyad, ahn dehn wan weh komit adolchri, er eevn laik disya taks kalekta.
12 Ai faas too taimz fi di week, an Ah gi ten persent a evriting weh Ah mek.’
13 Bot di taks kalekta mi-di stan op way da bak, an ih neva eevn waahn lif op ih hed fi luk da hevn, bot hihn mi kip aan di beet ih ches, di seh, ‘Oa Gaad, pleez ga mersi pahn mi; Ai da wahn sina.’
14 Ah di tel unu, wen dis man lef fahn di templ, eena Gaad sait hihn mi moa raichos dan di Farisee. Bikaaz Gaad wahn hombl evribadi weh tink tu moch a dehnself, bot ih wahn prayz op di wan weh hombl ihself.”
15 Now peepl staat tu bring dehn chiljren fi mek Jeezas bles dehn,* bot wen di disaipl dehn si dat, dehn skoal dehn op.
16 Bot Jeezas kaal di chiljren dehn tu ahn, an seh: “Noh chrai stap di yong chiljren; mek dehn kohn tu mi, kaaz peepl weh da laik chiljren wahn geh fi bee paat a di Kingdom a Gaad.
17 Bileev mi, enibadi weh noh aksep di Kingdom a Gaad di way wahn yong chail aksep tingz wahn neva geh fi goh eena di Kingdom.”
18 Den wan a di Jooish leeda dehn aks Jeezas wahn kweschan; ih seh: “Gud Teecha, weh Ah need fi du fi get evalastin laif?”
19 Jeezas tel ahn: “Wai yoo di kaal mee Gud Teecha? Nobadi gud; onli Gaad gud.
20 Ah noa dat yoo noa di komanment dehn: ‘Yu noh fi komit adolchri, yu noh fi merda, yu noh fi teef, yu noh fi tel lai, ahn yu fi aana yu ma ahn yu pa.’”
21 Den di man seh: “Teecha, Ai di kip aala dehndeh komanment fan Ah smaal.”
22 Wen Jeezas hyaa weh ih seh, ih tel ahn, “Yu ga wan moa ting weh yu need fi du: Sel aala yu tingz ahn gi di moni tu poa peepl, ahn yu wahn ga chrezha da hevn; den kohn bee mi disaipl.”
23 Wen di yong man hyaa dat, ih geh sad, kaaz ih mi rich rich.
24 Jeezas luk pan ahn, an seh: “Ih wahn bee haad fi mek peepl wid lata moni get eena di Kingdom a Gaad!
25 In fak, ih wuda bee eeziya fi mek wahn kyamil paas chroo di aiy a wahn needl dan fi mek wahn rich persn get eena di Kingdom a Gaad.”
26 Den di peepl dehn weh mi hyaa dat seh: “Wel if da soh, den da hoo ku geh sayv?”
27 Jeezas seh: “Di tingz weh pasabl fi Gaad, noh pasabl fi hyoomanz.”
28 Den Peeta seh: “Bot memba, wee lef evriting weh wi mi oan ahn fala yoo.”
29 Ih tel dehn: “Bileev mi, enibadi weh lef dehn hows, waif, breda, payrents, er chiljren fi di sayk a di Kingdom a Gaad
30 wahn geh way moa tingz now dan weh dehn mi lef bihain, an eena di neks sistem a tingz,* dehn wahn get evalastin laif.”
31 Den ih kehr di 12 apasl dehn wan said ahn tel dehn: “Wi gwehn da Jeroosalem, an evriting weh di prafit dehn mi rait bowt di Son a man wahn kohn chroo.
32 Fi egzampl, dehn wahn han ahn oava tu peepl fahn ada nayshanz ahn dehn wahn mak ahn; dehn wahn insolt op ahn an spit pan ahn.
33 An afta dehn wip* ahn, dehn wahn kil ahn, bot pahn di terd day ih wahn rayz op bak fahn di ded.”
34 Bot dehn neva andastan weh dehnya tingz mi meen, kaaz di meenin mi haid fahn dehn. Dehn jos neva andastan weh ih mi-di seh.
35 Az Jeezas mi-di get kloas tu Jeriko, wahn blain man mi-di sidong pahn di said a di road di bayg.
36 Wen ih hyaa wahn krowd di paas, ih staat tu aks da weh di goh aan.
37 Dehn tel ahn: “Jeezas di Nazareen di kom!”
38 Wel, di blain man hala owt: “Jeezas, Son a Dayvid, ga mersi pahn mi!”
39 Den di peepl weh mi deh da front a di krowd staat tu skoal ahn op; dehn tel ahn fi kip kwaiyet, bot ih hala owt haada: “Son a Dayvid, ga mersi pahn mi!”
40 Soh Jeezas stap an aada dehn fi bring di blain man tu ahn. Wen ih get kloas, Jeezas aks ahn:
41 “Da weh yu waahn mek Ah du fi yu?” Ih seh: “Laad, pleez mek Ah get bak mi sait.”
42 Soh Jeezas tel ahn: “Get bak yu sait; yu fayt heel yu.”
43 Ahn rait away ih get bak ih sait, an ih staat tu fala Jeezas ahn prayz Gaad. Wen di peepl si dat, dehn staat tu prayz Gaad tu.
Futnoat
^ Er “no fyaa a Gaad.”
^ Er “no fyaa a Gaad.”
^ Er “Jeezas lay ih han pahn dehn.”
^ Si di Glasari, “Sistem a tingz.”
^ Si di Glasari, “Wip.”
