Filipiyanz 4:1-23
4 Soh, mi dyaa bradaz ahn sistaz, stan op schrang az falowaz a di Laad jos laik weh Ah mi tel unu. Ah lov unu an Ah kyaahn wayt fi si unu, an unu da mi jai ahn krong.
2 Ah bayg Yoadya an Ah bayg Sintiki fi tink eena di saym way, bikaaz dehn da wan wid di Laad.
3 An Ah di bayg yoo tu, weh mi werk lang wid mi, fi kantinyu fi help dehndeh laydi. Kaaz di too a dehn, lang wid Klement ahn di res a di peepl, mi werk haad wid mi fi preech di gud nyooz, ahn dehn naym deh eena di buk a laif.
4 Unu fi rijais aal di taim bikaaz a di Laad. Ah wahn tel unu agen, Rijais!
5 Evribadi fi si dat unu noh aalwayz waahn unu oan way. Memba, di Laad deh kloas.
6 Unu noh fi wori bowt notn, bot eena evriting unu mos pray an aks Gaad fi help; bayg ahn wid aala unu haat, ahn giv ahn tanks tu.
7 Den Gaad wahn giv unu wahn kaina pees weh peepl kyaahn andastan. Eena da way, hihn wahn di protek unu haat ahn main* chroo Krais Jeezas.
8 Soh den, mi bradaz ahn sistaz, unu fi aalwayz tink bowt* tingz weh chroo, tingz weh seeryos, tingz weh raichos, tingz weh pyoar, tingz weh moov peepl fi lov, tingz weh dizerv aana, tingz weh gud, ahn tingz weh dizerv prayz.
9 Praktis di tingz weh unu mi laan fahn mee an weh unu mi aksep, ahn di tingz weh unu mi hyaa ahn si fahn mee, ahn di Gaad a pees wahn deh wid unu.
10 Az wahn servant a di Laad, Ah soh hapi dat unu fainali staat tu shoa kansaan fi mi agen. Eevn doa unu mi kansaan bowt mi bifoa, unu neva ga di chaans fi shoa it.
11 Ah noh di seh dat bikaaz Ah need eniting, kaaz Ah don laan how fi bee satisfai,* noh mata wat da mi sichuwayshan.
12 Ah noa how fi liv wid lee bit ahn how fi liv wid plenti. Ah don laan di seekrit a how fi bee satisfai wid eniting an eena evri sichuwayshan, weda Ah ful er hongri, weda Ah ga lat er Ah noh ga notn.
13 Ah geh di schrent fi fays evriting bikaaz a di wan weh gi mi powa.
14 Bot ih gud dat unu mi help mi eena mi chribyulayshan.
15 In fak, unu Filipiyanz noa dat afta unu mi laan di gud nyooz fi di fers taim, nat wahn nada kangrigayshan mi help mi ner aksep help fahn mi wen Ah lef Masidoanya, onli unu.
16 Bikaaz wen Ah mi deh da Tesalonaika, too taim unu mi sen help fi mi wen Ah mi need it.
17 Ah noh di luk fi wahn gif, bot Ah waahn di gud tingz weh unu du bring unu moa prafit.
18 Ah ga evriting weh Ah need ahn moa. Now dat Epafrodaitos don gi mi weh unu sen, Ah ga moa dan inof. Da mi wahn sakrifais weh smel sweet ahn weh pleez Gaad.
19 Bikaaz a dat, mai Gaad weh ga lata tingz wahn yooz Krais Jeezas fi giv unu evriting weh unu need.
20 Aal gloari bilangz tu Gaad wi Faada fareva an eva. Aymen.
21 Tel aala di hoali peepl weh da wan wid Krais Jeezas heloa fi mi. Di bradaz weh deh wid mi seh fi tel unu heloa tu.
22 Aala di hoali peepl, espeshali dehn wan weh liv eena Seeza hows, seh fi tel unu heloa.
23 Ah pray dat di Laad Jeezas Krais bles di spirit weh unu shoa wid ih grayt kainis.*
Futnoat
^ Er “an unu tinkin.”
^ Er “aalwayz meditayt pahn.”
^ Er “bee kantentid.”
^ Si di Glasari, “Grayt kainis.”
