1 Korintyanz 9:1-27
9 Soh weh unu tink? Ai da noh wahn free man? Ai da noh wahn apasl? Ai neva si wi Laad Jeezas? Unu da noh di rizolt a mi werk eena di Laad?
2 Eevn if ada peepl noh tink dat Ai da wahn apasl, fi shoar Ai da wahn apasl tu unu! Bikaaz unu da di proof weh shoa dat Ai da wahn apasl a di Laad.
3 Dis da how Ai ansa enibadi weh joj mee:
4 Unu noh tink wi ga di rait* fi eet ahn jrink?
5 Unu noh tink wi ga di rait fi mek wi waif weh da wahn bileeva* goh lang wid wi, jos laik weh di res a di apasl dehn, di Laad breda dehn, ahn Seefas* du?
6 Er da onli mee ahn Baarnabas noh ga di rait fi noh werk fi wahn livin?
7 Wich soalja eva werk ahn den pay evriting fi ihself? Hoo plaant grayp ahn den noh eet di froot aafa di vain? Er hoo shepad wahn flak a sheep ahn den noh jrink som a di milk fahn di sheep?
8 Unu tink dat Ah di seh dehndeh ting bays pahn how peepl tink? Di Laa noh seh di saym ting?
9 Bikaaz da jos laik weh rait dong eena di Laa a Moaziz: “Yu noh fi kova wahn bul mowt soh ih kyaahn eet wen ih di chrash owt di grayn.” Unu tink da di bul Gaad mi-di tink bowt?
10 Er da fi wee hihn seh dat? Reeli da fi wee, bikaaz enibadi weh plow er enibadi weh chrash owt di grayn hoap fi geh wahn shayr a di grayn tu.
11 Wee mi plaant spirichwal tingz monks unu. Soh unu tink wi di aks fi tu moch if wi reep mateeryal sopoat fahn unu?
12 If ada peepl ga di rait fi aksep sopoat fahn unu, wee noh ga di rait moch moa dan dehn? Eevn doa wi ga di rait,* wi neva aks unu fi notn. Wi gaahn chroo aal kaina ting soh dat wi noh stap di gud nyooz bowt di Krais eena eni kaina way.
13 Unu noh noa dat di peepl weh du hoali werk eena di templ geh dehn food fahn di templ? Ahn dat di peepl weh werk da di alta geh wahn shayr a di sakrifais weh geh aafa op pahn di alta?
14 Eena da saym way, di Laad koman evribadi weh taak bowt di gud nyooz fi geh weh dehn need fi liv fahn di gud nyooz tu.
15 Bot Ai neva mek yoos a eni a dehndeh provizhan. An Ah neva rait tu unu soh dat unu wuda du dehndeh ting fi mi needa. Ah wuda rada ded fers dan mek sombadi tek weh mai reezn fi boas!
16 Now, if Ah di preech di gud nyooz, dat da noh no reezn fi mek Ah boas, kaaz Ah haftu preech di gud nyooz. Reeli, ih wuda ton owt bad fi mi if Ah noh preech di gud nyooz!
17 If Ah wilin fi du dat, Ah wahn geh wahn riwaad. Bot eevn if Ah noh waahn du it, Gaad stil chros mi fi du dis werk.
18 Soh, wat da mai riwaad den? Dat wen Ah preech di gud nyooz, Ah ku aafa di gud nyooz widowt kaas, soh dat Ah noh abyooz di atariti* weh Ah geh fahn di gud nyooz.
19 Eevn doa Ah free fahn aal peepl, Ah mek miself bee evribadi slayv, soh dat Ah ku win oava az moch peepl az pasabl.
20 Wen Ah deh monks di Jooz dehn, Ah liv laik di Jooz dehn, soh dat Ah ku win di Jooz dehn oava tu di way a Krais. Wen Ah deh monks peepl weh fala Moaziz Laa, Ai fala da Laa, eevn doa Ah noh haftu fala da Laa. Ah du dat soh Ah ku win peepl weh fala di Laa oava tu di way a Krais.
21 Wen Ah deh monks peepl weh noh fala Moaziz Laa, Ai liv laik Ah noh fala da Laa, bikaaz Ah waahn help dehn, eevn doa mee miself fala di laa a Gaad ahn di laa a Krais.
22 Wen Ah deh monks peepl weh week, Ai week tu, soh dat Ah ku win dehn oava tu di way a Krais. Ah du evriting weh Ah kud fi help aal kaina peepl, soh dat if pasabl, Ah ku sayv som a dehn.
23 Bot Ah du evriting fi di sayk a di gud nyooz, soh dat Ah ku shayr it wid adaz.
24 Unu noh noa dat owta evribadi weh ron eena wahn rays, onli wan wahn win di praiz? Ron eena soch a way dat unu win it.
25 Now evribadi weh kompeet eena wahn kantes haftu shoa self-kanchroal eena evriting. Af koars, dehn du dat fi geh wahn krong weh mek owta leef ahn weh noh laas lang, bot wee du it fi wahn krong weh wahn laas fareva.
26 Dat da wai Ai noh ron laik if Ah noh noa weh Ah gwehn. Ai da laik wahn baksa weh aym ih ponch gud soh dat ih noh ponch loan breez.
27 Bot Ah ponish* mi badi ahn kanchroal it laik wahn slayv. If Ah noh du dat, mee miself ku geh diskwalifai afta Ah don preech tu ada peepl.
Futnoat
^ Lit., “atariti.”
^ Er “sista.”
^ Seefas da wahn nada naym fi Peeta.
^ Lit., “atariti.”
^ Er “raits.”
^ Lit., “beet.”
