1 Korintyanz 11:1-34
11 Unu fi fala mai egzampl, jos laik how Ai fala Krais egzampl.
2 Unu di du gud bikaaz unu memba mi eena evriting an unu kip aan di fala di teechin dehn weh Ah mi paas aan tu unu.
3 Bot Ah waahn unu noa dat Krais da di hed a evri man, ahn di man da di hed a di uman, ahn Gaad da di hed a di Krais.
4 Evri man weh pray er prafesai wid sohnting pan ih hed shaym ih hed.
5 Bot evri uman weh pray er prafesai widowt kova ih hed, shaym ih hed. Dat wuda bee jos laik if shee shayv ih oan hed.
6 Kaaz if wahn uman noh kova ih hed, den ih shuda kot aaf ih hyaa. Bot if da wahn shaym fi mek ih kot aaf ih hyaa er shayv ih hed, den ih shuda kova ih hed.
7 Wahn man noh fi kova ih hed, kaaz Gaad mek di man eena fi hihn imij ahn di man bring aana tu Gaad, bot di uman bring aana tu di man.
8 Kaaz man neva kohn fahn di uman, bot di uman kohn fahn di man.
9 Ahn pahn tap a dat, Gaad neva mek di man fi di uman, bot ih mi mek di uman fi di man.
10 Sayka dat, ahn bikaaz a di aynjel dehn, di uman fi wayr sohnting pan ih hed fi shoa dat ih rispek ih hozban atariti.
11 Pahn tap a dat, eena di kangrigayshan a di Laad, di uman kyaahn egzis widowt di man ahn di man kyaahn egzis widowt di uman.
12 Gaad mek di uman fahn di man, ahn di man baan fahn di uman, bot stilyet, da Gaad mek evriting.
13 Unu shuda joj fi unu oanself: Ih rait fi mek wahn uman pray tu Gaad widowt kova ih hed?
14 Unu noh laan fahn naycha dat da wahn shaym fi mek wahn man ga lang hyaa?
15 Bot if wahn uman ga lang hyaa, dat bring gloari tu shee. Kaaz Gaad gi shee hyaa insteda wahn kovarin.
16 Bot if enibadi noh gree wid dat ahn dehn waahn fala eni ada kostom, Ah waahn mek unu noa dat wi noh ga no ada kostom, ahn no ada kostom deh eena Gaad kangrigayshan dehn needa.
17 Bot wail Ah di giv unu dehnya inschrokshanz Ah noh di prayz unu, bikaaz wen unu meet tugeda, ih du unu moa bad dan gud.
18 Fers ting, Ah hyaa dat wen unu kohn tugeda eena di kangrigayshan, unu ga divizhan monks unuself, an Ah bileev it.
19 Fi shoar divizhan wahn deh monks unu, soh dat evribadi wahn noa hoo Gaad pleez wid.
20 Wen unu kohn tugeda, unu noh reeli kohn fi eet Krais* Eevnin Meel.
21 Kaaz wen di taim kohn fi mek unu eet it, som a unu don eet unu oan eevnin meel heda taim. Sayka dat, som a unu hongri ahn som a unu jronk.
22 Unu noh ga wahn hows wehpaat unu ku eet ahn jrink? Unu noh ga no rispek fi Gaad kangrigayshan? Wai unu di shaym dehn peepl weh noh ga notn? Weh Ah shuda seh? Ah shuda prayz unu? Non ataal!
23 Ah di teech unu weh di Laad mi teech mee, dat pahn di nait wen dehn bichray di Laad Jeezas, ih mi tek di bred,
24 an afta ih gi tanks, ih brok it ahn seh: “Dis stan fi mai badi, weh Ah wahn giv op fi unu. Kip aan di du dis fi memba mi.”
25 Hihn mi du di saym ting wid di kop. Afta dehn mi eet di eevnin meel, ih seh: “Dis kop stan fi di nyoo kovenant weh wahn staat wen Ah poar owt mi blod fi unu. Kip aan di du dis, ahn memba mi enitaim unu jrink dis wain.”
26 Bikaaz enitaim unu eet dis bred ahn jrink dis wain, unu di mek peepl noa dat di Laad ded fi wi, an unu fi du dat til hihn kohn bak.
27 Soh den, if enibadi eet di bred er jrink fahn di kop a di Laad ahn dehn no dizerv it, den dehn di sin gens di badi ahn di blod a di Laad.
28 Fers, eech persn haftu chek ihself gud fi mek shoar dat ih di du weh rait. If ih noh du dat, den ih noh fi eet di bred ahn jrink fahn di kop.
29 Enibadi weh eet ahn jrink widowt andastan weh di badi stan fa di bring jojment pahn dehnself.
30 Dat da wai lata unu week ahn sik, ahn som a unu don ded.*
31 Bot if wi reeli andastan weh kaina persn wee, den nobadi wahn joj wi.
32 Bot wen Jehoava joj wi, ih disiplin wi soh dat wi noh geh kandem lang wid di werl.
33 Soh den, mi bradaz, wen unu kohn tugeda fi eet da meel, wayt fi wan anada.
34 If enibadi hongri, mek dehn eet hoam, soh dat wen unu kohn tugeda nobadi noh wahn joj unu. Bot az fi di ada mataz, Ah wahn setl dehn wen Ah get deh.
