Weh di Baibl Seh Bowt Siknis ahn Pandemik?
Weh di Baibl seh
Di Baibl mi prafesai dat aal kaina dizeez, inkloodin difrent pandemik, wuda deh aal oava di ert joorin di laas dayz. (Look 21:11) Dehndeh pandemik da noh ponishment fahn Gaad. In fak, soon Gaad wahn yooz ih Kingdom fi geh rid a aal helt prablemz, inkloodin di difrent kaina pandemik.
Weh Baibl prafesi ga fi seh bowt siknis ahn pandemik?
Di Baibl noh seh notn bowt eni spesifik pandemik er dizeez, laik COVID-19, AIDS, er di Spanish floo. Bot ih doo prafesai dat wahn taim mi wahn kohn wen wi mi wahn ga lata “dizeez,” eevn sohn dedli wan. (Look 21:11; Revilayshan 6:8) Dehnya dizeez da paat a di sain a “di laas dayz,” weh di Baibl aalso kaal di “en a di sistem a tingz.”—2 Timoti 3:1; Machyu 24:3.
Yu tink Gaad eva yooz siknis fi ponish peepl?
Di Baibl seh dat wahn fyoo taimz Gaad mi yooz siknis fi ponish peepl. Fi egzampl, hihn mi mek sohn peepl kech leprosi. (Numbers 12:1-16; 2 Kings 5:20-27; 2 Chronicles 26:16-21) Bot di fyoo taimz wen Gaad mi du dat, di siknis mi onli afek di peepl weh mi ribel gens hihn, noh inosent peepl.
Yu tink di pandemik dehn weh di spred rong di werl tudeh da ponishment fahn Gaad?
No. Sohn peepl klaym seh dat Gaad di yooz pandemik ahn dizeez fi ponish peepl tudeh. Bot di Baibl shoa wi dat dat da noh chroo. Weh di Baibl teech?
Som a Gaad peepl, eena di paas ahn tudeh day, sofa wid difrent siknis. Fi egzampl, di faytful man Timoti mi geh sik wahn lat. (1 Timoti 5:23) Bot di Baibl noh seh dat da mi bikaaz Gaad neva pleez wid ahn. Sayhn way tudeh, som a Gaad peepl geh sik er kech dizeez. Ahn lata taim, da onli bikaaz dehn mi deh eena di rang plays at di rang taim.—Ecclesiastes 9:11.
Di Baibl aalso teech dat di taim noh kohn yet fi mek Gaad ponish wikid peepl. Rada, di Baibl seh dat wi di liv eena “di day a salvayshan,” wahn taim weh Gaad di invait aal hyoomanz fi jraa kloas tu hihn ahn geh sayv. (2 Korintyanz 6:2) Wan way how hihn invait peepl da chroo di pazitiv mesij weh fi hihn peepl di preech aal oava di werl—di “gud nyooz bowt di Kingdom.”—Machyu 24:14.
Yu tink siknis ahn dizeez wahn laas fareva?
No. Di Baibl pramis dat wahn taim soon kohn wen nobadi wahn geh sik. Anda Gaad Kingdom, Gaad wahn kyoar aal helt prablemz. (Isaiah 33:24; 35:5, 6) Hihn wahn geh rid a sofarin, payn, ahn det. (Revilayshan 21:4) Ahn hihn wahn rezorek peepl weh ded soh dat dehn ku injai gud helt rait ya pahn di ert eena Paradais.—Psalm 37:29; Aks 24:15.
Wat da sohn Baibl vers weh taak bowt siknis?
Machyu 4:23: “[Jeezas] gaahn chroo di hoal a Gyalilee, di teech eena aala di sinagag dehn ahn preech di gud nyooz a di Kingdom. Ih mi-di kyoar peepl weh mi-di sofa fahn aal kaina siknis ahn dizeez.”
Weh ih meen: Di mirakl dehn weh Jeezas mi du da jos wahn lee egzampl a weh Gaad Kingdom wahn soon du fi aal hyoomanz.
Look 21:11: “Aal kaina dizeez wahn deh.”
Weh ih meen: Paat a di sain a di laas dayz inklood helt prablemz aal oava di werl.
Revilayshan 6:8: “Ah si wahn payl-kala haas, ahn di naym a di persn weh mi-di raid it da-mi Det. Ahn di Grayv mi-di fala rait bihain ahn. Ahn di too a dehn mi geh di atariti fi kil wahn kwaata a di peepl pahn di ert wid . . . dedli dizeez.”
Weh ih meen: Di prafesi bowt di foa haasman eena di buk a Revilayshan shoa dat wi wuda ga pandemik eena fi wee taim.
Yu Mait Aalso Laik
DI WACHTOWA
Sofarin—Yu Tink Sofarin da Ponishment Fahn Gaad?
Gaad yooz tingz laik siknis er ada bad tingz fi ponish peepl fi dehn sinz?
ESSENTIAL BIBLE TEACHINGS
Wai Gaad Talarayt Sofarin?
Di Baibl eksplayn it eena wahn way weh satisfai wi ahn gi wi komfert.
DI WACHTOWA
Weh Jeezas Mi Seh Bowt Wen di En Wahn Kohn?
Yu si dehnya ting weh Jeezas mi taak bowt di hapm rait now?
ANSAZ TU KWESCHANZ BOWT DI BAIBL
Wat Da di Sain a “di Laas Dayz,” er “di Taim a di En”?
Di Baibl prafesai bowt wahn lata tingz weh wahn hapm at di saym taim bifoa di en a dis sistem.
