Ñwaʼni Nsi num ntshob nu mfà num kum Benkristô bàa tse bo be mfaʼ ndà ntseʼde là​—“ghakwé mbwe boa nkwébu tshobe.” (Filipi 1:1, MN.) Ntùm mbemi, tshen fètfèt là num njàme ntùm mba zit ndà ntseʼde lo. Ba nkwébu ghakwé mbwe nke mfaʼ à ke num neywimde ben à?

Bo num njwimde kum ghakwé mbwe. Ba nkwébu ghakwé mbwe bʼa benntùn ndù bo kuʼ num bag ywèle, nke mbam faʼ mfaʼa, mbèn mbe ben netsine. Tsemoʼ bʼa ghuan benntùn, tsemoʼ tènde ntùm nguʼnjù. Bo num njwimde ntùm mfaʼ mbu nzenze tse mebwô zʼa tshwèt mbètte neghù kà ndà ntseʼde zin mebwô là. Yennà ghù a fiag ghakwé mbwe neyab ngelañ num ntswide bo sub faʼ ngabéb njùmbwe.

Bo be mfaʼ mbeʼ yàm mfaʼ mbu. Bo num mfà faʼ netsiañde benntùn ngelañ bo seʼ ndà ntseʼde là tsemoʼ nkwébu ghakwé mbwe. Tsemoʼ be dùʼ loñ nze, dùʼ neghabte ba nkide, nelôde ba nkoñ nkab, neghabte ba bon ntañ tùsô num nàfaʼ. Bo num njwimde num neghù mbe ndà ntseʼde Nufen be nelàne. Ghakwé mbwe kuʼni nebètte yub neywimde njwèn benntùn. Mba zit faʼ lo bo fà bo là, yub mat nefaʼ yi ntù ntshùʼ be ngù mbe njoñ ntseʼde fa kuʼni yube.​—1 Timôtio 3:13.

Bo num mfà mfiʼ mebwô mba Benkristô là. Bo nke ntshùadʼà njam tshob mbwô mat Benkristô kà ntshoʼ Nkwébu ghakwé mbwe. Ngelañ bo fà bag ntseʼde bo bo tshagde là, bo num nso neta num zebe bamntù. Mba bo num ndoʼ mbwe nàfaʼ bo fiag wut là, bo num ntènde ben nenèn mbwe ntùm nàfaʼ bo fiag wut. Yub netshob njuʼ bo ba ghakwé mbwe be ndoʼ tsiañde bo ntamde nseʼ yi. (Efésô 4:16) Ngelañ num mbe tôge, mba ba bo yub dunde ba mat ywèle tsʼa ghù bo kuʼni nebe ghakwé mbwe là.

• Ba nkwébu ghakwé mbwe bʼa ke lèn bènntùn à?

• Ba nkwébu ghakwé mbwe nke njwimde ndà ntseʼde a zin mebwô à ndùke?