BAG I 31

Nufen Nsi bʼa ke?

Tu ntshob ndùb Ñwaʼni Nsi nke ntshob mfà à num Nufen Nsi. Yaweh Nsi aʼ tshùadʼà njam Nufen se kà ndunde ze nekô. Nufen Nsi bʼa ke? Be lèn à ndùke mbʼa tshwèt ntô sènni à? Ke ze Nufen Nsi yà ghù à? Ke zʼa nsi ghù ndùmànyam à? Yen bag i li bo bag bàa tsʼa mbwe là, aʼ bùnde tshen mbètte là.

1. Nufen Nsi bʼa ke, ze Mven be we?

Nufen Nsi bʼa taʼ netô ze Yaweh Nsi te là. Mven yen Nufen nà bʼa Yésu, a nke ntô à mve kamànyam. (Matio 4:17; Yohané 18:36) Ñwaʼni Nsi tshwèt ntshob mfà num Yésu mbe: “A nsi tô . . . Nufen se ke nsi mi.” (Lukas 1:32, 33) Mba Mven Nufen Nsi là, Yésu nsi tô num njoñ benntùn fa num nsitshaʼ.

2. We zʼa nsi tô bo Yésu à?

Yésu ke nsi tô à tùʼ i. Benntùn ntùm “njoñ tunndà fa, njoñ ntshob fa, njoñ ngô fa, njoñ nzwit fa . . . nsi tô nsitshaʼa.” (Apokalipse 5:9, 10) Benntùn bo tô bo Yésu là bʼa ntu siʼi? Fe mba Yésu naʼ nseʼ num nsitshaʼ là, ntshuʼ ntshuʼ benntùn bélʼé ntùʼ benkristô. Là, ndaʼ ben 144 000 netèt bo bèn nèn kamànyam num netô bo yi. (Siañ Apokalipse 14:1-4.) Tsemoʼ ghaziʼde nu i nsi tswe à num nsitshaʼ, njù bin mbotni Nufen.—Yobkwi 37:29.

3. Nufen Nsi bwô ntshùa netô benntùn nyiañtu à ndùke?

A be be ndù ghatô ngô num nkagtùn neghù tshu mebwô, bo keʼ ghù mbaʼ neghù njoñ tshu fa tse bo kô là. Tsemoʼ ngelañ bo num mbade yube, nte à benntùn bo nke ndiag à yub bin, ke nke nywin num ntswe mebwô tsemoʼ là. Là, bo ke nsi bade Yésu, Mven Nufen Nsi bo mèn ghua. “Nsi nsi tshoʼ moʼ Nufen . . . ze moʼ ju ke nsi sadʼé là.” (Daniel 2:44) Yésu nsi tô num njoñ nsitshaʼ fa; a ke nsi ghù tôde. A ghù nkôni, bwôntù, mbèn nke nkô nunetsine. A nsi tswide benntùn nelaʼde tshen mat là—nkôni, bwôntù bo nunetsin bo bo.—Siañ Esaya 11:9.

TSWEʼ NTUN MI

Yen ju zʼa ghù Nufen Nsi bwô ntshùa netô benntùn nyiañtu là.

4. Taʼ netô ndùb nsi tô num njoñ nsitshaʼ fa

Yésu ghù mbaʼ netô ntshùa njoñ ghatô fa ntùm njù. Siañ Matio 28:18, mbèn mbùnde yen bètte li:

Ze netô Yésu tshùa ze njoñ ghatô fa ntùm njù à ndùke?

Netô benntùn nyiañtu num ntswe mbade, mba zit ngatô lo bèn nke ntô à num ze ngô, ke bʼa num njoñ nsitshaʼ fa. Nseʼ num Nufen Nsi ô? Siañ Daniel 7:14, mbèn mbùnde tshen mbètte li:

Numke a mbwô nelèn mbe “moʼ ju ke nsi sade” Nufen Nsi à?
Numke a mbwô nelèn mbʼa nsi tô num njoñ nsitshaʼ fa à?

5. A bètte bo bade netô benntùn nyiañtu

Numke a mbètte mbe Nufen Nsi loʼ dùʼ netô benntùn nyiañtu à? Lôde LAʼDE NETSHAÑ, mbèn mbùnde yen bètte li.

LAʼDE NETSHAÑ: Nufen Nsi bʼa ke?—Taʼ bag i (1:41)

Netô benntùn nyiañtu loʼ à ke nseʼ yi num ben à?

Siañ Eklésia 8:9, mbèn mbùnde tshen mbètte li:

Num yu tu, a bètte Nufen Nsi loʼ dùʼ netô benntùn nyiañtu ké? Numke?

6. Nufen Nsi ghù ghatô tse bo num njuʼ ben nà

Mba Yésu, zebe Mven, naʼ mbe mènntùn nyiañtu là, a kuʼni “neyen ngeʼ bag à bin, ntùm zebe nebole.” (Héber 4:15) A Yaweh Nsi bèn ntshoʼ ben 144 000 bo nsi tô bo Yésu, netèt njoñ tunndà fa, njoñ ntshob fa, njoñ ngô fa mba njoñ nzwit fa là.—Apokalipse 5:9.

A tshwèt nso ntù o nelèn mbe Yésu bo ben bo nsi tô bo yi là naʼ mbʼa benntùn nyiañtu ké? Numke?

Yaweh Nsi tshoʼ bandum mba bènnzwi njoñ dùʼ fa ntùm njù, bo tô bo Yésu

7. Ntshùʼ Nufen Nsi bwô ntshùa tse benntùn nyiañtu

Ba ngomnaʼ num mfà ntshùʼ num neywimde mbèn ntshètte benntùn bo tshwèt ntô num bo là. Mba Nufen Nsi ghù ba ntshùʼ tsʼa bètte ben tse bét là. Siañ 1 Korintô 6:9-11, mbèn mbùnde tshen mbètte li:

O kwade mbe njù aʼ zi mbe à ndùke ngelañ njoñ benntùn fa nsi ze ntshùʼ Nsi à? *
O kwade mbʼa tsin mbe Yaweh Nsi bètte ben tse bo ze ntshùʼ Nufen Nsi ké? Numke?
Ke zʼa tshwèt ndaʼde mbe ben tse bo ke tshwèt nze tshen ntshùʼ là kuʼni nebade à?—Lôde nka 11.

Ba ngomnaʼ num mfà ntshùʼ num neywimde mbèn ntshètte benntùn bo tshwèt ntô num bo là. Nufen Nsi ghù ba ntshùʼ tsʼa bwô ntshùa tse ngomnaʼ là, num neywimde mbèn ntshètte ben tse.

BE MÈNNTÙN BÈTTE MBE: “Nufen Nsi bʼa ke?”