BAG I 24
Nenùn mfà num ba angél bʼa zile?
Yaweh Nsi kô mbe be lèn ze tunndà zʼa be mve kamànyam nà. Ba angél, tse bo tshwèt mbèn ntsiañ yub mbe “nshumnshum Nsi” là bʼa ntùm yen tunndà là. (Yob 38:7) Ke ze Ñwaʼni Nsi tshwèt ntshob mfà num ba angél à? Faʼ ba angél tshwèt nkwag benntùn nyiañtu à ndùke? Njoñ ba angél fa bʼa ntùm tunndà Nsi ké?
1. Ba angél bʼa ba we?
Yaweh Nsi naʼ bom ba angél kà nabte nsitshaʼa. Mba Nsi là, bo ghù taʼ wut ywèle, nke ntswe à mve kamànyam. (Héber 1:14) Ntshuʼ ntshuʼ angél be kamànyam nà, ndaʼndù, mba we lo ghù ze mat. (Apokalipse 5:11) Bo num “ngù tshu tse [Yaweh Nsi] tshob là, [mbèn nke] njuʼ ntshob mi.” (Yobkwi 103:20) Ngelañ mbwe, Yaweh Nsi naʼ nke ntum ba angél tsemoʼ ngelañ nesoñ tse nkùn, netomde, mbèn ntshètte ghafaʼ tse. Sènni, ba angél num njwimde benkristô nefon benntùn bo tshwèt nkù ntù nelèn Nsi là.
2. Satan bo ba ywèt kebwô bʼa ba we?
Tsemoʼ angél lo ta tu Yaweh Nsi. Mbwe angél zʼa naʼ nta tu là bʼa mèn “ze bo ke ntsiañ i Diable, Satan, ngatatte njoñ njù fa là.” (Apokalipse 12:9) Satan naʼ nke nkô netô num tsemoʼo, ndùlà, a fù Adam bo Eva, mbe nèn mbwe tsemoʼ angél bél i ntùm ze tatu. Bo num ntsiañ tshen angél tse bo naʼ nta tu lʼà mbe ba ywèt kebwô. Yaweh Nsi naʼ taʼ yub mve kamànyam, ntshag yub num nsitshaʼa; me ndaʼndaʼ a biagde yube.—Siañ Apokalipse 12:9, 12.
3. Satan bo ba ywèt kebwô nke ndiag nefù benntùn à ndùke?
Satan bo ba ywèt kebwô num ntshùade njam tshunu bebùn, ka, nsà, mba nediag netshobte bo ba ywèle kà mfù benntùn. Mba mfiʼ là, tsemoʼ benntùn num nèn ju ghaka, ghalèn nu ndamnjù, ghabètte ywèt nu mba ghaghù nsà. Tsemoʼ nu ba fu laʼ tse bebùn bèn ndaʼde bo là. Tsemoʼ benntùn mbèn nke nkwade mbe be bo tshobte boa fe ben. Ndaʼndù Yaweh Nsi tshwèt nte bu num ben mbe: “kà bin te lag num ben tse bo be ntshobte boa ywèt là, ke ghatshañ ngàm no.” (Lévitiko 19:31) A fà yen ntshùʼ là num netshètte ben num ywiʼ Satan boa tse ywèt kebwô. Bo bʼa ghakebàn Nsi, nke ndiag neghù nukebwô ben.
TSWEʼ NTUN MI
Yen ba mbwô mbwô tshu tse ba angél num ngù là, ywiʼ zʼa be njam ka là, mbèn njen mba be kuʼni netshètte wut ben num Satan boa tse ywèt kebwô là.
4. Ba angél num njwimde benntùn nelèn Yaweh Nsi
Ba angél Nsi keʼ be soñ nkùn mebwô benntùn. Ndaʼndù, be bo tshagde ghafaʼ Nsi mbañ benntùn bo tshwèt nkù ntù nelèn Yaweh Nsi là. Siañ Apokalipse 14:6, 7, mbèn mbùnde tshen mbètte li:
-
Numke a mbètte ba angél ywimde yag ntùm faʼ nesoñ nkùn mebwô à?
-
A num nso kù num o nelèn mbe be ba angél tshagdʼo mbañ benntùn bo tshwèt nkù ntù nelèn Ñwaʼni Nsi ké? Numke?
5. Ghuaʼ tshunu ka
Satan bo ba ywèt kebwô bʼa ghakebàn Nsi. Bo bèn mbʼa tsebe ghakebàn. Siañ Lukas 9:38-42, mbèn mbùnde yen bètte li:
-
Ke ze ba ywèt kebwô num ngù benntùn à?
Bag bin keʼ kô neghù moʼ ntamde mba moʼo bo ba ywèt kebwô ntùm yôg ben. Siañ Nebwôgde 18:10-12, mbèn mbùnde tshen mbètte li:
-
Ba ywèt kebwô num ntshùadʼà njam ke kà ngùtni mbèn ntshobte bo ben à? Tsit ntenu bo num njà ghù ntùm yu dùʼntswe à?
-
O kwade mbʼa bʼa mbwô ju mba Yaweh Nsi tshùʼ tshunu ka ké? Numke?
Lôde LAʼDE NETSHAÑ, mbèn mbùnde tshen mbètte li.
-
O kwade mbe tshan ze ngon Palesa naʼ nke nso là naʼ bag ké? Numke?
-
Ke zʼa naʼ mbètte Palesa ghù num netshètte wul i num ba ywèt kebwô à?
Benkristô tse nenùn num ntatu ba ywèt kebwô. Siañ Mfaʼ Ghantum 19:19 bo 1 Korintô 10:21, mbèn mbùnde yen bètte li:
-
O ghù taʼ ju zʼa ghù ntamde bo tshunu ka là, mbʼa bètte o tonʼé. Numke?
6. Maʼ Satan boa ywèt kebwô ntshùa
Satan bèn nke ntô ba ywèt kebwô. Ndaʼndù, Yésu ze bo num mbèn ntsiañ i mbe Mikaél Angél ze ndùb là bèn nke ntô num tsemoʼ angél. Zit mbaʼ Mikaél ghù à? Siañ Apokalipse 12:7-9, mbèn mbùnde tshen mbètte li:
-
We zʼa ghù neta ntshùa moʼ à? Mikaél boa tse angél ké, ke Satan boa tse ywèt kebwô à?
-
O kwade mbe ghaziʼde nu Yésu ghù nebwôg Satan boa tse ywèt kebwô ké?
O kuʼni nemaʼ Satan boa tse ywèt kebwô ntshùa. Siañ Yakobo 4:7, mbèn mbùnde yen bètte li:
-
Bʼo tshètte wul o num Satan bo ba ywèt kebwô à ndùke?
TSEMOʼ BENNTÙN NUM NTSHOB MBE: “A keʼ bag nelôde ba netshañ ke netam ba sa lo, tsʼa tshwèt ndaʼde tshunu ka là. A ndaʼ num netôg ngelañ.”
-
Numke yen mat nekwade là mbag neshu à?
JU NETSHÙBE
Ba angél num njwimde ben. Satan boa tse ywèt kebwô bʼa ghakebàn Yaweh Nsi. Bo num ndoʼ tshunu ka num nefù benntùn yi.
Mbètte nekwimde
-
Ba angél Yaweh Nsi num njwimde benntùn nelèn i à ndùke?
-
Satan bo ba ywèt kebwô bʼa ba we?
-
Numke a mbètte netsin ngùanesà num tshunu ka à?
DIAGE
Ziʼde ju zʼa tshwèt ndaʼde mbe Yésu bʼa Mikaél Angél ze ndùb là.
Lôde tshu tsʼa tshwèt ndaʼde mbe kuaʼ nenùn Satan be bwe là.
“Le Diable: principe du mal ou personne réelle?” (Ñwaʼni num jw.org)
Yen mba taʼ mènnzwi tum nkuan ba ywèt kebwô là.
“Elle a trouvé un but dans la vie” (La Tour de garde, 1er juillet 1993)
Yen mba Satan num ndoʼ tshunu ka mfù benntùn yi là.
“La vérité sur la magie et la sorcellerie” (La route qui mène à la vie éternelle, section 5)
