Bepharisien be nji kômbô kañese na Yésus a te bo na môt a nga bialé ndim a beta yen, ajô te nde ba loone bebiaé be môt ate. Bebiaé ba yeme na jam ete e ne bo na be ‘titane be nda Zambe.’ (Jean 9:22) E tebe aval été ete a ne kandé be a Bejuif bevok, a jam ete é ne so be abui minju’ asu ya na be jalé miñyiane ya nda bôt.

Bepharisien ba sili be minsili mibaé be jô’ô na: “Môte nyô mi ajô na a nga bialé ndim, ye a ne mone wônan? A yen éyoñe ji aya?” Bebiaé ba yalan be jô’ô na: “Bi ayeme na môte nyô a ne mone wongan, bi ayeme fe na a nga bialé ndim: bi te yeme jam a yene de éyoñe ji; te yeme fe môt a te saé nye mis.” E n’été na, mone woba a te be kate jam da te boban; ve bebiaé be ne ntyel a éyalane ba ve, nde ba jô na: “Sila’an émien; ke a nto nya môtô? Émien a ye kate mia ajô dé.”​—Jean 9:19-21.

Nde Bepharisien ba beta loene môt ate na be si’isi nye be liti’i na be bili ngum ajô a Yésus. Ba jô nye na: “Va’a Zambe duma: bi ayeme na môt ate a ne mbo mam abé.” Mbôl a nji bo tyiñ a be, môt a mbe ndim a jô na: “Nge a ne mbo mam abé, me ayem.” Ve a yemete na: “Jame da me ayem, me nga to ndindim, éyoñe ji me nga yen.”​—Jean 9:24, 25.

Mbôle be nji kômbô jô’é jam ete nalé, Bepharisien ba ke ôsu a jô na: “A nga bo wo jé? A nga yooé wo mis aya?” A ayo’ ése môt ate a yalan a jô’ô na: “Me maneya kañete mia ajô di, ve mi teke yebe; jé éfe e nje mia kômbô beta wôk? Ye na mia fe mi nga kômbô bo beyé’é bé, nga?” A ôlun ôse, Bepharisien ba yôtane na: “Nge w’ô ne ñyé’é wé, bi bi ne beyé’é be Moïse. Mfa’a wongan, bia yeme na Moïse nye Zambe a nga kobô nye, ve nyuna ki bi nji yeme mfa’a a so.”​—Jean 9:26-29, Mfefé Nkôñelan.

Nzezak wo kam, nnye na: “E jame ma semé e ne na mi mi nji fo’o yem e mfa’a a so, ve nye a te yooé me mis.” Nde môt ate a ve ôsimesan ô ne njalan a fek, asu na a liti za nnye Zambe a wôk, a za a yene mvaé, a jô’ô na: “Bia tu’a fe yeme na Zambe a ne te wô’ô bebo mam abé, ve nge môt a ko Zambe woñ a bo’o fe nkômbane wé, Zambe a wô’ô nye. Bi ngenane teke tame wô’ô foé na, môt éziñ a nga yooé e môt a nga bialé ndindime mis.” A ke suu nkobô a jô’ô na: “Nge e nga ye bo na môt ate a nji so be Zambe, a nji ke ye bo jam éziñe nalé.”​—Jean 9:30-33, Mfefé Nkôñelan.

Amu be se ngule ya beta fet éfia a lat a jame nzezak wo jô, Bepharisien ba ta nye a jô nye na: “E wo ô nga bialé e minsem été ngumba ngumba, wo zu ye’ele bia jé?” Nde ba da nye nseñ.​—Jean 9:34, Mfefé Nkôñelan.

Éyoñe Yésus a wô’ô jame da te boban, a zu koene môt ate a sili nye na: “Ye wo abuni Mone Zambe?” Môte nye na: “A Tat, a ne za? Me buni nye.” Été été, Yésus a jô nye bôsa na: “Ô yeneya nye, nnye ate a kobô wo nyô.”​—Jean 9:35-37.

Môte nye na: “A Tat, me abuni.” Ane môt ate a kute Yésus meboñe si asu na a liti na, a buni a semé nye. Yésus a ve bifia bi n’édok, a jô’ô na: “Me nga zu si nyô a tyi’i bôte mejô, nde ba be ne te yen be aye yen; a ba be ayen be aye bo mindindim.”​—Jean 9:38, 39.

Bepharisien be to valé ba yeme na be nji bo mindindim. Ve ba ve’e befe’e na, Yésus a yiane kobô ajô dap na, be nji liti bôte mbamba zen. Nde ba sili, asu na be kamane bebiene na: “Ye bia fe bi ne mindindim?” Yésus nye na: “Nge mi nga to mindindim, ve mi nji bo mam me ne abé: ve éyoñe ji mi ajô na, Bi ayen: ajô te mam abé menan me ngenan.” (Jean 9:40, 41) Nge é nga to na, be nji bo beye’ele ya ayoñ Israël, be mbe ve wô’ô amu jé ba bene yebe Messie. Ve, mbôle ba yem Atiñ, e bene meme nye a ne fo’o mbia nsem.