Zañ alu é lôteya abui. Beprêtre ba te ve Judas minsañe mi moné 30 asu na a koñe Yésus. Judas a ke a nsamba bôt a bemie beprêtre a Bepharisien, asu na be ke jeñe Yésus. Bezimbi ya nkane bita ya Rome a évete bezimbi be bili bityé mewosan be ne nsamba a be.

Da yené fo’o na, éyoñe Yésus a nga kate Judas na a ke, e môse be nga di Pâque, a nga ke été été e be bemie beprêtre. (Jean 13:27) Bôte bete ba te mane tôkane betebe ôsu bap a bezimbi. Judas a te tate yiane ke be vôme Yésus a te di Pâque a minlômane mié. Ve éyoñe ji, nsamba bôt ôte wo tyi’ilane mbi’ili ya Cédron a ke mfa’a ya afup. Nsamba bôt ôte ô ne fo’o mbamba nkômesan, be bili belampe a ôvañe ya na be bi Yésus.

Judas a kee be Nkôle Beolivier a to ndi na, a ye ji’a koone vôme Yésus a né. E sondô ya mvus, biyoñe biziñ Yésus a minlômane mié be nga tebe afupe ya Gethsémané éyoñe be nga jaa ndeñetane Jérusalem ba Béthanie. Ve éyoñe ji alu é nto abui, a nge Yésus a ne fefele élé olivier éziñ afupe, a yiane bo e dibi été. Nde ñhe, aval avé bezimbi, be ngenane te tame yene Yésus môs éziñ ba ye kui na be yeme nye? Asu na a volô be, Judas a ve be ndem mfa’a ôte. A jô na: “Môt ma ye wubane nye a latane nye anyu, e nye ate le! Biane nye, mi ke nye, mi tuka’a ba’ale nye.”​—Marc 14:44, Mfefé Nkôñelan.

Nté a kee nsamba bôt afup, Judas a yene Yésus a minlômane mié, éyoñe te a ke vôm a né a jô na: “Mbôlô a Rabbi,” a wubane fe nye a évôvoé ése. Ve Yésus a sili nye na: “A mvôé jam, ô ne va amu [jé]?” (Matthieu 26:49, 50, Mfefé Nkôñelan) Yésus émien a yalane nsili ôte a jô’ô na: “A Judas, wo koñe Mone môt a nlatane ya anyu?” (Luc 22:48) Ve Yésus a nji fe beta bi ajô a nkoñe bôt ate.

Éyoñe ji, Yésus a subu éfufube ja so bôte be bili belampe bebé, nde a sili be na: “Mi ajeñe za?” Nsamba bôt ôse wo yalane na: “Yésus ya Nazareth.” Yésus a yalane be a ayo’ ése a jô’ô na: “Me nyô.” (Jean 18:4, 5) Amu be nji yeme jame da zu kui, bôte ba mane labane tyia.

A li’i belane fan éte alu te ébien na a tup, Yésus a beta sili be za ba jeñ. Éyoñe ba beta yalane na: “Yésus ya Nazareth,” a évôvoé ése, a ke ôsu a jô be na: “Ma te kate mia na, me nyô: nge ma mi ajeñ, jôka’ane e bôte ba be ke.” Akusa bo mbia éyoñ a tele nyi, Yésus a nji vuane jam a nga jô ôsusua na, teke môte wua ya be be a ye jañ. (Jean 6:39; 17:12) Yésus a jaéya zu a ba’ale minlômane mié a môt éziñe ya be be a nji jañ ane ô vaa ve Judas, “nyô a ye jañ.” (Jean 18:7-9) Ajô te nde a jô na be jô’é beyé’é bé be ke.

Éyoñe bezimbi ba té a ke vôme Yésus a ne, minlômane mia yemelane jame da zu boban, nde ba jô na: “A Tat, ye bi ba’é be minkpwaté mekôn?” (Luc 22:49) Ve ôsusua na Yésus a ve be éyalan, Pierre a nyoñe nkpwaté mekône wua ya mibaé minlômane mi bili mo. A bibi wô Malkus, mbo ésaé beta prêtre, a tyi’i nye alo.

Yésus a nambe alo Malkus, a saé fe de. Nde a ve fe mbamba ñye’elan a jô’ô Pierre na: “Somô’ nkpwaté mekône wôé abam: amu bôte bese be abi nkpwaté mekôn ba ye wu a nkpwaté mekôn.” Yésus a kañese na be bi nye, aval émien a jô: “Nge nalé, wôna mejô me ya Kalate Zambe me aye bo aya, amu e ne ntilane na, de aye bo ana?” (Matthieu 26:52, 54) A beta jô na: “Élaé Tate a nga ve ma, ye me aye bo te nyu je?” (Jean 18:11) Yésus a ke ôsu a su’u nkômbane Zambe akekui awu.

 Yésus a sili nsamba bôt ôte na: “Ye mi azu bi ma a minkpwate mekôn a mimbeñ ane bôte ba ke bi mvômvô? Melu mese me nga to temple été a ye’ele bôt, mi nji bi ma. Ve mam ma mese me abo ana, amu mejô me ya bekulu mejô me ayian boban.”​—Matthieu 26:55, 56.

Nsamba bezimbi, a môt a jôé be, a bivete Bejuif ba bi Yésus a ka’a nye. Éyoñe ba yene jam ete, minlômane mia mane tup. Ve da, “ndôman éziñ,” éko éziñ ñyé’é ba loone na Marc, a ke ôsu a tôñe nsamba bôte wo ke Yésus. (Marc 14:51) Bôt béziñ ba yene ndôman éte, a jeñe na be bi nye, nde nalé a bo na a tup a li’i ngômesane jé.