ABENDÉ é nga vebane be Bekristen na be bo be bo’o ésulane ya Ôsimesane ya awu Krist. Ba loene fe ésulane te na ‘Tawôlô a Tate.’ (1 Becorinthien 11:20) Mfi ya ésulane te ô ne ôvé? Éyoñ évé a aval avé bia yiane bo ésulane te?

Yésus Krist a nga telé ésulane te alu ya Bejuif be nga bo Paska mbu 33 É.J. Be nga to be bo’o Paska éyoñe jia mbu, môs 14 ya ngon Bejuif be a loene na Nisan. Mfa’a ya bo tañe ya yeme môse Paska, Bejuif be nga to be sôñô éyoñe môs ba alu be ne nté wua. Éfufup é bili mewolo 12, dibi fe é bili mewolo 12. Môse wo tôñe fo’o meté me ngon ô ne atata’a ya ngone Nisan. Paska a bobane mvuse melu 14 ya ngon éte.

Yésus a minlômane mié be nga di Paska, ane a nga vaa Juda Iscariot nsamba wé, mvuse ya été nje a nga bo ésulane Tawôlô a Tate. Ésulane te é nga fole Paska abô’ô Bejuif, a ajô te nde bia yiane bo ésulane te fo’o ve éyoñe jia mbu.

Mbamba foé Matthieu a kañete na: “Yésus a nga to’é fembé, a ye’elane Zambe, a be’e je; ane a nga ve beyé’é, a jô na, Nyôñan, mi di; nyôle jame nyô. Ane a nga to’é fe élaé, a ve Zambe akéva, a ke be je, a jô na, Mia bese,  nya’ane je; metyi mame ma me ne élat, mme me aye kui amu ajô ya va abui bôt mbia be mam map.”​—Matthieu 26:26-28.

Bôte béziñ ba buni na Yésus a nga veñesane fembé é bo nyôle jé, a bo na woon a veñesane metyi mé. Ve jame da, nyôle Yésus é nga to ngumba éyoñ a nga ve beyé’é bé fembé. Ye minlômane mi Yésus mi nga di fo’o minsône mié a metyi mé? Momo, amu be nga ye di môt, metiñ me Zambe ki me tyili’i mboane te. (Metata’a 9:3, 4; Lévitique 17:10) Éyoñe wo lañe Luc 22:20, Yésus a jô na: “Élaé ji é ne mfefé élate ya metyi mam, mme me ne nkuian ajô denan.” Ye élaé te é nga veñesan “mfefé élat”? Nalé a se ngule ya boban, amu élat, jôme bôte ba kobô anyu, é nji bo jôme be ne bi a mo.

Nde ñhe, fembé ba woon be ne fo’o ve bive’an. Fembé é ne éve’ane ya nyôle Yésus é ne te bijô. Yésus a nga belane fembé é nga bu’u éyoñe be nga di Paska. Be nga yame fembé te teke mvusu, nge yis. (Nkôlan 12:8) Kalate Zambe a belane mvusu aval ane éve’ane ya abé nge nsem. Fembé é ne ndeme ya nyule Yésus a nga ve metuna’a. É nji be é be’e nsem éziñ.​—Matthieu 16:11, 12; 1 Becorinthien 5:6, 7; 1 Pierre 2:22; 1 Jean 2:1, 2.

Woon a ne ndeme ya metyi me Yésus. Metyi mete m’ayemete mfefé élat. Yésus a nga jô na metyi me nga kui mfa’a ya “va abui bôte mbia be mame map.” Bôte be ne beta tabe mfubane mise me Zambe a nyiine mfefé élat a Yéhôva. (Behébreu 9:14; 10:16, 17) Élate te ja bo na Bekristen 144 000 be ne zôsô be ke yôp. Yôp été wé, b’ aye bo bejôô a beprêtre mfa’a ya na bôte bese y’émo be bi bibotan.​—Metata’a 22:18; Jérémie 31:31-33; 1 Pierre 2:9; Nlitan 5:9, 10; 14:1-3.

Za nye a yiane di fembé a nyu woon Tawôlô a Tate? Fo’o ve ba be nyiineya mfefé élat​—ba be bili ndi nleme ya ke yôp​—mbe ba di fembé a nyu woon. Mbamba nsisime Zambe a bo’olô a bôte bete na be tobaneya na be ke bo bejôô yôp  été. (Beromain 8:16) Be nyiineya fe élat ya Éjôé ba be Yésus.​—Luc 22:29.

Bôte ki be bili ndi nleme ya nyiñe si va é to Paradis? Ba bo Yésus mewôk a ba zu tabe Tawôlô a Tate, ba yene ba ba di a mis be liti’i fe ésemé, ve be nji bo benyoñe ngap. Éyoñe jia mbu, ngone Nisan é to melu 14, éyoñe jôp é dimeya, Bengaa be Yéhôva ba bo ésulane ya Tawôlô a Tate. Akusa bo na, ve bone betoyini be bôte ya si se mbe ba wô’ôtane na be bili ndi nleme ya ke nyiñe yôp, ésulan te é ne beta jam mise Bekristen bese. A ne mbamba éyoñe ya bese be ne wumulu beta nye’ane Yéhôva Zambe a Yésus Krist.​—Jean 3:16.