NSILI 9
Ye biôm bise bi nga so atemetem?
NGE A MBE WO, Ô NGA YE BO AYA?
Tame simesane jame di: Alex a nto fo’o fe’e ne vema! Nté ane a nga bialé, a yeme na, Zambe nnye a nga té biôm bise. Ve den, ñye’ele a te jô be na: teke bisô, beyeme mam be bili beamu ba liti na biôm bi nga so atemetem. Alex a jô nlem été na: “Nge beyeme mam be bili beamu, ma me ne za na me zu sôan a be?” Alex a nji yi na be yene nye ane akut.
Nge wo ô mbe Alex, ye ô nga ye kañese na, biôm bise bi nga so atemetem, fo’o v’amu bekalate beyeme mam ba ye’ele nalé?
TEBE MONE JÔM, Ô TAME FAS!
Ja’a bôte ba buni na biôm bi nga téban, ja’a ba ba buni na biôm bi nga so atemetem, bese be wô’ô ji’a me’ete mam ba buni, teke yem amu jé ba buni mam mete.
-
Abui bôte da buni na, biôm bi nga téban, fo’o ve mbôle be nga wô’ô de nda Zambe.
-
Abui bôte da buni na, biôm bi nga so atemetem, fo’o ve amu be nga wô’ô de sikôlô.
FASE MINSILI MISAMANE MI
Kalate Zambe a jô na: “Nda ése é bili môt a nga lôñe je. A nyô a nga bo mam mese a ne Zambe.” (Behébreu 3:4, Mfefé Nkôñelan) Ye bia yiane buni mejô mete?
E jô na Zambe a nji té ényiñ, a ne akute jam, fo’o ve ane wo jô na, môt a nji lôñe nda nyi
BÔTE BÉZIÑE BA JÔ NA: Jôm é nga tôtan atemetem, éyoñe te biôm bise bi nga so.
1. Jé é nga bo ñhe na, jôm ete é tôtan?
2. Jé ja dañe tyi’ibi ya buni: ye na, biôm bise bi nga so atemetem, ye na, môt éziñ nnye a nga té biôm bise?
BÔTE BÉZIÑE BA JÔ NA: Môta binam a so be tit.
3. Nge môt a so be tit, nge ke be koé avale ba jô, nde ñhe, amu jé môt a ne atyeñ a dañe koé?
4. Amu jé bia kate kui na, bi kôme wô’ô ja’a ényiñe bitétéa bi ne “tyôtyôé” abui?
BÔTE BÉZIÑE BA JÔ NA: Beamu béziñ ba liti na biôm bise bi nga so atemetem.
5. Ye môt a jô nalé, émien, a nga kôme jeñ, a yene beamu ba yemete ajô te?
6. Bôte bambé ba buni na, biôm bi nga so atemetem, fo’o ve amu be nga kate be na, beyeme mam mbe ba jô nalé?
“Bi tame jô na, wo wulu afan été, éyoñe te wo yene mone nda mebam a tele, ye wo ye jô na: ‘Za avale abeñe jame di! Bilé bia te ku étam, a lôñe nda yi.’ Teké’é! Ô se ngule ya simesane nalé. Nde ñhe, ye bi bia yiane buni na, biôm bise bi nga so atemetem?”
—Julia.
“Tame simesane na, môt a jô wo na, nda bekalate éziñ ja te tôtan, a na nkone ya nkôs wo te mane ke mimfin mise ya nda, ane kalate nta’ane bifia a te kômeban étam. Ye wo ye buni nye?”
—Gwen.
AMU JÉ WO YIANE BUNI ZAMBE?
Kalate Zambe a yemete bia na bi belane ‘fek.’ (2 Timothée 1:7) Nalé a tinane na bi nji yiane buni Zambe fo’o ve amu
-
MAM BIA WÔ’ÔTAN (Ma wô’ôtan ane beta ngul a ne vôm éziñ)
-
BÔTE BEVOK (Bôte bese ya vôm me too ba buni Zambe)
-
BA TINDI BIA (Bebiaé bam be nga ye’ele ma na me buni Zambe, me vo’o bo aval afe)
Wo yiane jeñe na ô bi beamu ba yemete mam wo buni.
“E sikôlô, éyoñ ma wô’ô ane ñye’ele a timin aval avé nyôle jangan é ne nkôman, nalé a yemete mbunane wome na, Zambe a ne. Ébu’a ése ya nyul é bili ngum ésaé. Bone be mam mese me ne mfi. A mam mese ma bobane nyule jangan été, biabebien bi teke yem. Nyôle jangan é nga tébane fo’o angôndô y’abeñ!”
—Térésa.
“Éyoñ ma yene beta nda, beta sitima, nge metua, ma sili mamiene na: ‘Za a nga kôme biôm bite?’ Bôte be ne atyeñ mbe ba kôme be metua, amu ba yiane ta’a abui bone be mam été asu na be wulu. Nde, nge môt a nga kôme metua, yeme na, môta biname fe a nga téban.”
—Richard.
“Nté me mbe me yé’é mam ma fombô ényiñe biôm bi vee, me nga su’ulane yene na, be vo’o jô na jôm éziñ é nga so atemetem. . . . Me me lôô na, da dañe tyi’ibi ya buni na, Zambe nnye a nga té biôm bise, a lôte na bi buni na, biôm bise bi nga so atemetem.”
—Anthony.
TAME FAS AJÔ DI
Akusa bo den a nto mimbu mewôm, beyeme mam ba jeñe na, be timin aval avé biôm bi nga so atemetem, bese ba kate kui tyiñ. Nge ba kate kui tyiñ, a too ke na mbe be ne beyeme mam, ye wo bo abé nge ô nji buni na, biôm bise bi nga so atemetem?
