Ôsusua na Pâque ya mbu 32 ya É.J. a boban, minlôman mi Yésus mi nga bulane nkañete. Mbôle be mbe be te’eya, Yésus a nga daa be sitima asu na be ke wo’an e Bethsaïda. Ve, éyoñ be nga kui mfôme mañ, Yésus a nga yene bizu’u bi bôte bi nga zu bia tôñe be. Akusa bo a mbe a kômbô’ô tabe ve a beyé’é bé, a nga nyoñe be a mbamba nlem. Éyoñ a maneya saé minkôkon, a nga taté na a ye’ele be. A nga bo ngume môs a kobô’ô be ajô Éjôé Zambe. Éyoñ ngô’é é nga kui, minlômane mié mi nga jô nye na: ‘Bôte ba be nga yiane wô’ô zaé. Jô’ô be na be ke jeñe jôme ya di.’

Yésus a nga jô na: ‘Be ke vé? Miabebien va’ané be jôme ya di.’ Ane be nga sili nye na: ‘Ye wo yi na bi ke jeñe be belet?’ Philippe a nga jô na: ‘Ja’a bi bili abui moné, bi vo’o kus abime belet da ye yiane nsamba bôte wu.’

Yésus a nga sili be na: ‘Abime bidi avé bi bili?’ André a nga jô nye na: ‘Bi bili bifus bi belet bitan a bone bekos bebaé. Abim ete e vo’o yian.’ Yésus a nga jô be na: ‘Za’ane ma belet éte a kos.’ Ane a nga jô bôte na be tabe si mengôs mengôs, 50 nge ke 100. Ane Yésus a nga nyoñ belet a kos, a bete asu yôp, a taté na a ye’elan. Éyoñ éte a nga ve beyé’é bidi bite na be kabe bie bôt. Befam 5 000, a bizu’u bi binga a bongô be nga di a jaé. Mvuse ya  valé, minlôman mi nga tôkane bidi bi nga bu’u, asu na te bia ke fé. Bikat 12 bi nga too njalan ne lut! Angôndô asimba, nga?

Jam ete e nga nambe bôt aval é ne na, be nga yi na Yésus a bo njôô wop. Ve Yésus a mbe a yeme’e na, éyoñ Yéhôva a ye telé nye njôô é ngenan te kui. Ane a nga jô be na be bulan, a jô fe minlômane mié na be ke mañe ya Galilée yat. Ane mi nga dañe sitima, Yésus ki a bete nkôl étam. Amu jé? Amu a mbe a kômbô’ô ke ye’elan Ésa wé. Ja’a éyoñ a mbe a te’eya, Yésus a mbe étyi te vuane ye’elan.