Élisabeth a mbe a bili mon évuvuman a to jôé na Marie, a mbe a nyiñe Nazareth, tisone ya Galilée. A be a bili atiñ aluk ba Joseph. Éyoñ abum Élisabeth é nga kui ngon ésaman, ange Gabriel a nga ke fe yene Marie. A nga jô nye na: ‘Mbôlô a Marie. Yéhôva a nye’e wo abui.’ Ve Marie a nji wô’ô jôm a mbe a kômbô’ô jô. Nde Gabriel a nga jô nye na: ‘Wo ye nyoñ abum a biaé mona fam, wo yiane yôlé nye na Yésus. A ye bo Njôô, a Éjôé jé ja ye tabe nnôm éto.’

Ane Marie a nga jô na: ‘Me ne éndune ngon. Aval avé me ne biaé mon?’ Gabriel nye na: ‘Teke jam éziñ é ne kate Yéhôva. Mbamba nsisim a ye zu be wo, a wo ye biaé mona fam. Ja’a Élisabeth, évuvumane jôé é nto abum.’ Ane Marie a nga jô na: ‘Me ne mbo ésaé Yéhôva. A bo’o ma avale wo te jô.’

 Ane Marie a nga ke jom Élisabeth. Eyoñ Marie a nga batane nye, ane mon a mbe Élisabeth abum a nga fô’ôsan. Mbamba nsisim ve zu jaé Élisabeth nyul, ane a nga taté na a jô na: ‘A Marie, Yéhôva a botaneya wo. A ne ma beta mvome na, nyia Tate a so nda jam.’ Nde Marie a nga jô na: ‘Ma lu’u Yéhôva a nleme wom ôse.’ Marie a nga bo ngon élal be Élisabeth, éyoñ éte a nga bulane Nazareth.

Éyoñ Joseph a nga wô’ô na Marie a nto abum, a nga tyi’i na a lu’u ki fe nye. Ve éngele a nga kui nye biyeyem, a jô nye na: ‘Te ko woñe ya lu’u nye. A nji bo jam éziñ é ne abé.’ Ane a nga lu’u Marie, a toé fe nye nda jé.