E yeme belane moné
Abui bôt é nji dañe bi minju’u ya mam me moné amu da tôñe miñye’elane ya Kalate Zambe.
BII MBAMBA NTA’ANE MAM
ÑYE’ELANE YA BIBLE: “Minsôñan mi môt a saé abui mi ne mfi ô ne te k’aselan, v’ôjeja’a a kee fo’o môt azoé.”—Minkana 21:5, Mfefé Nkôñelan.
JÔME NALÉ A TINAN: É ne mfi na ô bi nta’ane mam a jeñe na ô tôñe wô. Nde taté’é ta’a mam môé ôsusua na wo kuli moné. Ba’ale’e na, ô vo’o kuse jôm ése wo yi. Ajô te, bela’ane moné wôé a fek.
JAM Ô NE BO:
-
Ta’a mam. Tili’i biôm bise wo kômbô kus a ta’a mam, ane bidi, biyé, a mame ya nda. Mvuse ya valé, tili’i abime moné wo yiane futi asu mam mete mese. Nge vôm éziñ é nyoñe wo abui moné, jeñe na ô nyoñe moné ate vôme mfe e minnoñ wo te mane tak. Bi tame nyoñ éve’an: nge moné wo te kômesan asu zo’oyañ a lôt abime wo te tili, kô’ôlane nye a moné wo te ba’ale asu biyé.
-
Sa’ale’e bikôla. Va’a ngule jôé ése asu na ô sa’ale bikôla. Ba’ale’e moné asu na ô kuse biôme bi ne wo mfi.
TABE’E NTYEL A MBIA MEFULU
ÑYE’ELANE YA BIBLE: “Nleles w’abene senane si amu mbu ya avep; ajô te a ye ja’é biôm éyoñe ya nkôane bidi, te ke bi jôm.”—Minkana 20:4.
JÔME NALÉ A TINAN: Éles ja bo na môt a ku azoé été. Ajô te, saék a ngule jôé ése, a jeñe na ô belane moné a fek, amu nalé a ye volô wo na ô bi jôme wo yi melu ma zu.
JAM Ô NE BO:
-
Saék a ngule jôé ése. Éyoñe wo saé a ngule jôé ése, môt a nga nyoñe wo bisaé a ye nye’e wo a jeñe na ô bo te kôlô nda bisaé jé.
-
Bo’o zôsôô. Te wub éza jôm vôme wo saé. Nge ô ne ñwuwup, nalé a ye ndaman éyôlé jôé a bo na bôte be bo te nyoñe wo bisaé.
-
Sa’ale’ ôzañ akum. Nge wo jeñe kom ése na ô bi abui moné, nalé a ne tindi wo na ô bo teke nyoñ awo’on asu nyule jôé a na ô ndaman élat ô ne bi a bôte bevok. Ba’ale’e na, sa ke moné nye a dañe mfi ényiñ.
MIÑYE’ELANE MIFE YA BIBLE
Lañe’e Bible e nkol. Ô ne ngule ya yene nye mintete minkobô e jw.org
TE NDAMAN ÉYOÑ A MONÉ WÔÉ AMU MBIA MEFULU.
“Amu nso’o [bilam] ba ndôndok b’ aye kui azoé; a ndeñan ôyo w’aye jalé môt menyasa mengômesan.”—MINKANA 23:21.
TE TYELE NLEME YÔP E ZEZÉ AMU MAM ME MONÉ.
“Te tyelane minleme yôp ajô ényiñe jenan, mfa’a ya jôm mi aye di, a jôm mi aye nyu; nalé fe mfa’a ya menyôle menan, biôm mi aye jaé.”—MATTHIEU 6:25.
SA’ALE’E FULU YA KÔMBÔ BÔTE BEVOK.
“Môt a bili mise minyamete a ji’a wua émien njeñan akum été, ve a ne te yeme na azoé da ye kui be nye.”—MINKANA 28:22, Mfefé Nkôñelan.
