1. Jé Yéhôva a nga bo éyoñ Adam ba Ève be nga sem? (Metata’a 3:15)

 NNÉ ane Adam ba Ève be nga sem, Yéhôva a nga ve mvoñe bôte jap ndi nlem a zene ya beta nkulan ajô éziñ. Bia koone wô Metata’a 3:15.​—Lañe’ek.

2. Amu jé nkulan ajô ya Metata’a 3:15 ô ne nya mfii?

² Bia koone nkulan ajô ôte kalate ôsu ya Kalate Zambe. Ve éyoñe bia kôme fombô, bii yene na bekalate bevo’o bese ya Kalate Zambe be tii a nkulan ajô ôte. Avale be wô’ô belane mone nkol nge ke mone étyé asu na be late mefep ya ngume kalate, aval ete da da, mejô ya Metata’a 3:15 ma bo na bekalate bese ya Bible be lu’an a bo foé jia. Foé éte é ne na, Yéhôva é lôme Nkôté, nnye ate é mane ko’o Satan, a mbia be bôte bé. * Ngo’o abim ébotan ete asu bôte ba nye’e Yéhôva!

3. Jé bia zu yen ayé’é di?

³ Ayé’é di, bia zu la’ase nkulan ajô ya kalate Metata’a 3:15. Bia zu bi biyalane ya minsili milal mi: Beza nkulan ajô ôte wo jôô be? Aval avé ô nga tôéban? A bibotan bivé wo soo bia?

4. Za a ne “nyo,” a aval avé bia yeme de?

⁴ Metata’a 3:14, 15 a kobô ajô “nyo,” “mvoñe” nyo,  “minga,” a “mvoñe” minga. Kalate Zambe a volô bia na bi yeme beza be né. * Bi tame taté zu kobô ajô “nyo.” Teke bisô na zezé nyo é nji be ve wô’ô mame Yéhôva a nga jô afube ya Éden. Ajô te, ntyi’an ajô Yéhôva ô nji be ô fombô’ô tit. Nde ñhe, za nnye Yéhôva a mbe a kobô’ô nye? Nlitan 12:9 a yalane nsili ôte ne sañesañ. A jô na “nnôme nyo” ô ne Satan Diable. Ve beza be ne mvoñe nyo éte?

5. Beza be ne mvoñe nyo?

⁵ Kalate Zambe a wô’ô belan éfia “mvoñ” asu na a kobô ajô bôte ba tune mefulu me môt éziñ, a nto ve ane môt ate a ne ésaa wop. Ajô te, mvoñe nyo é ne beéngele a bôte ba bo Yéhôva éngana’a, a ba wosane bebo bisaé Bé avale Satan a bo. Nalé a tinane na mvoñe nyo é ne beéngele be nga kôlô yôp melu me Noé, a mbia be bôte ba vu ésaa wop, Diable.​—Met. 6:1, 2; Jean 8:44; 1 Jean 5:19; Jude 6.

6. Amu jé “minga” ya nkulan ajô a vo’o bo Ève?

⁶ Za ke a ne “minga”? A vo’o bo Ève. Amu jé bia jô nalé? Bia zu yene ve amu wua. Nkulan ajô wo jô na mvoñe minga ja ye “tibi” nyo nlô. Bi ndôme yene na nyo é ne Satan, mbia éngele, ajô te teke môt éziñe ya mvoñe bôte Ève é be’e metyi ya abé é ne ngule ya tibi nye nlô. Nde, aval avé Satan a ye wu?

7. Nlitan 12:1, 2, 5, 10 a jô na za nnye a ne minga Metata’a 3:15 a jôô nye?

⁷ Kalate Nlitan a liti bia za nnye a ne minga ya Metata’a 3:15. (Lañe’e  Nlitan 12:1, 2, 5, 10.) Bifuse bite bia kobô ki ajô zezé minga! Minga ate a bili ngon mebo mé si, a couronne é be’e ateté 12 nlô wé yôp. Nde fe, a nji biaé zezé mon, a nga biaé Éjôé Zambe. Mbôle Éjôé éte é ne yôp été, minga ate fe a yiane bo yôp été. A ne ndeme ya ngab ékôane Yéhôva é ne yôp été, nje éte é ne beéngele bese ba ke ôsu a bo Yéhôva mewôk.​—Beg. 4:26.

8. Za nnye a ne ngab ôsu ya mvoñe minga, a jam ete e nga yené éyoñ évé? (Metata’a 22:15-18)

⁸ Kalate Zambe a volô fe bia na bi yem za nnye a ne ngab ôsu ya mvoñe minga. Kalate Zambe a nga jô na mvoñ éte é mbe é yiane so mvoñe bôte Abraham. (Lañe’e Metata’a 22:15-18.) Nkulan ajô ôte ô nga tôéban, amu Yésus a nga so mvoñe bôte mbo ésaé Yéhôva ate. (Luc 3:23, 34) Ve bia yeme na mvoñ éte ja yiane bo ngul adañe zezé môt a binam, amu ja yiane tyame Satan Diable nnôm éto. Jam ete e nga tôébane fe, amu éyoñe Yésus a nga bi mimbu 30, Yéhôva a nga jalé nye mbamba nsisim asu na a bo ñwo’one wé. Éyoñe te nje Yésus a nga bo ngab ôsu ya mvoñe minga. (Beg. 3:16) Mvus awu a ñwômane Yésus, Yéhôva a nga jalé nye “couronne étôto’o a duma,” a ve fe nye “ngul ése ya yôp a si,” to’o ngule ya “tyam mimboane mi mam mi diable.”​—Beh. 2:7; Mt. 28:18; 1 Jean 3:8.

9-10. (a) Beza befe be ne ngabe ya mvoñe minga, a éyoñ évé nje ba bo ngabe ya mvoñ éte? (b) Jé bia zu yen éyoñe ji?

⁹ Mvoñe minga é bili fe ngabe baa. Nlômane Paul ô nga liti za nnye a ne ngabe baa ya mvoñ minga éte éyoñ ô nga jô miñwo’on mi mbe Bejuif a Begentil na: “Nge mi ne ba be ya Krist, wôna mi ne mvoñe bôt Abraham, mi ne benyoñ ngap, aval ane ntiñetan ô né.” (Beg. 3:28, 29) Éyoñe Kristen ja bo ñwo’on, nye fe a bo ngabe jia ya mvoñe minga. Nde ñhe, bi ne jô na mvoñe minga é ne Yésus Krist ba miñwo’on 144 000 mii jôé ba be nye. (Nli. 14:1) Bese ba jeñe na be vu Ésaa wop, Yéhôva Zambe.

¹⁰ Mbôle bi maneya yen beza mbe Metata’a 3:15 a jôô be, éyoñe ji bia zu yen aval avé Yéhôva a zuya a tôé nkulan ajô ôte, a bibotan wo soo bia.

11. Aval avé nyo é nga lôbe mvoñe minga “étimekili”?

¹¹ Metata’a 3:15 a liti na nyo ja ye lôbe mvoñe minga “étimekili.” Jam ete e nga tôéban éyoñe Satan a nga tindi Bejuif a Beromain na be wôé Mone Zambe. (Luc 23:13, 20-24) Aval ane môt a ne bo abim éyoñ éziñ teke wulu éyoñ aveñ da te nye balé étimekili, avale te fe, melu melal Yésus a nga bo soñ, a nji be ngule ya bo jam éziñ.​—Mt. 16:21.

12. Aval avé bé tibi nlô Satan, a jam ete da ye boban éyoñ évé?

¹² Asu na Metata’a 3:15 a tôéban, e mbe e sili’i na Yésus a bo teke langane soñ été. Amu jé? Amu nkulan ajô wo liti na, mvoñe minga é bili na ja tibi nlô nyo. Ajô te, aveñ é mbe Yésus étimekili é mbe é yiane yet, nalé a tinane na Yésus a nga yiane wômô soñ. Nne fe mam me nga bobane nalé! Melu melal mvus awu dé, Yésus a nga wômô asu na a ke nyiñe yôp été nnôm éto.  Éyoñ awolo Yéhôva a nga tiñeti da ye kpwaan, Yésus é ko’o Satan nlô. (Beh. 2:14) Bôte ba ye jôé a Yésus ba ye nyoñe ngab mewosan Krist a ye bo asu na be mane wôé besiñe be Yéhôva bese, mvoñe nyo.​—Nli. 17:14; 20:4, 10. *

13. Bibotan bivé bia bi nté ane nkulan ajô ya Metata’a 3:15 wo tôéban?

¹³ Nge ô veya womien ngumba be Yéhôva, wônaa nkulan ajô ôte wo soo wo abui bibotan. Yéhôva a nga lôme Yésus si va ane môt a binam. Yésus a nga kôme tune mefulu me Ésaa wé. (Jean 14:9) A zene jé, bi nga kui na bi yem Yéhôva Zambe a nye’e nye. Bia bu’uban miñye’elane mi Yésus a aval a wulu akônda Bekristene den. A nga ye’ele bia avale bi ne bi fatan ényiñ ja ve Yéhôva nlem avak. Nde fe, bi nga bi abui bibotan éyoñe be nga lôbe Yésus étimekili, nge ke éyoñ be nga wôé nye. Aval avé? Éyoñe Yésus a wômôya, Yéhôva a nga kañese ntañ a nga ve asu na a “tune bia abé se.”​—1 Jean 1:7.

14. Aval avé bia yeme na nkulan ajô ya afube ya Éden ô nji tôéban été été? Timi’in.

¹⁴ Mejô Yéhôva a nga jô afube ya Éden me mbe me liti’i na abim éyoñ éziñ da yiane lôt ôsusua na nkulan ajô ôte ô mane tôéban. Éyoñ é nga yiane lôt ôsusua na minga ya nkulan ajô ôte a bi mvoñe bôte, asu na Diable a kôane bôte bé, a asu na ziñ é yaé zañe minsamba mi bôte mite mibaé. Éyoñe bia kôme wô’ô nkulan ajô ôte, bia kôme yemelane na émo Satan ji jé vini bebo bisaé be Yéhôva. Yésus a nga kate fe beyé’é bé jam ete. (Marc 13:13; Jean 17:14) Bia kôme yen ane ngabe ya nkulan ajô ôte ja tôéban, e dañedañ ntete mimbu ô ndôme lôte wu. Aval avé?

15. Amu jé évini émo ja vini bebo bisaé be Zambe é ne ve nenenen, ve amu jé bia yiane ki ko Satan woñ?

¹⁵ Éyoñe Yésus a nga tebe Njôô ya Éjôé Zambe mbu 1914, Satan a nga wuaban si. Éyoñe ji, a yeñe fo’o ve si va, a yange’e ke môs ba ye zu ko’o nye. (Nli. 12:9, 12) Ve a yange ki môs ôte a ba’a mo. A yeme na awu dé e nto bebé, nde fe a wô’ô mbia ôlun. Jôme te nje a sôé ayaa dé be bebo bisaé be Zambe. (Nli. 12:13, 17) Bia kôme ñhe wô’ô amu jé évini émo ja vini bebo bisaé be Zambe é ne ve nenenen. Ve bia yiane ki ve’ele ko Satan a bôte bé woñ. Ane nlômane Paul, bi bili ndi nleme na: “Nge Zambe a ne bia ngam, za a ye tebe bia ngame yat?” (Bero. 8:31) Bi ne tabe ndi a Yéhôva a nleme wongan ôse amu, avale bia te mane yen, abui mam nkulan ajô ya Metata’a 3:15 ô nga jô e tôébaneya.

16-18. Bibotan bivé Curtis, Ursula, a Jessica be nga bi éyoñe be nga tu’a wô’ô Metata’a 3:15?

¹⁶ Nkulan ajô Yéhôva ô ne Metata’a 3:15 ô ne ve bia ngule ya dañ avale nju’ ôse bi ne tôbane de. Curtis, mojañ éziñ a ne missionnaire e Guam, a jô na: “Me nga tôban minju’u mi nga telé mbunane wom meve’ele été. Ve éyoñe me nga bindi nkulan ajô ya Metata’a 3:15, nalé a nga volô ma na me ke ôsu a tabe ndi a Yéhôva.” Curtis a yange a ôjeja’a ôse môse Yéhôva é zu mane vaa minju’u mise bia tôbane mie den.

 ¹⁷ Ursula, sita éziñ a nyiñe Allemagne a jô na éyoñ a nga kôme wô’ô nkulan ajô ya Metata’a 3:15, nalé a nga yemete ndi nlem jé na Bible a ne fo’o Mejô ma so be Zambe. A nga yene na minkulane mejô mivo’o mise mi tii a nkulan ajô ôte, a jam ete e nga nambe nye nya abuii. A jô na: “Éyoñe me nga yeme na Yéhôva a nga jeñ été été na a ve môt a binam ndi nlem, me nga tu’a nye’e nye.”

¹⁸ Jessica, sita éziñ ya Micronésie, a jô na: “Me ngenan me simesa’an avale me nga wô’ôtan éyoñ ôsu me nga yem na me yeneya benya mejôô! Nkulan ajô ya Metata’a 3:15 ô mbe ô tôéban. Nalé a nga liti ma na ényiñe bia nyiñe den é nji bo nya ényiñe Yéhôva a mbe a yi’ asu dangan. Nkulan ajô ôte ô nga yemete ndi nleme jam na e bo Yéhôva ésaé a volô bia na bi bi mbamba ényiñ ataté éyoñe ji, a nya ényiñ melu ma zu.”

19. Amu jé bi too ndi na ngabe baa ya nkulan ajô ôte ja ye tôéban?

¹⁹ Bia te yene na, Metata’a 3:15 a tôéban azukui den. Den, bia kôme yene ne fômelé za a ne mvoñe minga a mvoñe nyo. Yésus nnye a ne ngab ôsu ya mvoñe minga. Aveñe dé ya étimekili é maneya yet. Éyoñe ji, a nto beta Njô bôt a vo’o wu môs éziñ. Yéhôva a nga zu mane tobe Bekristen bese bé bo ngabe ya mvoñe minga. Mbôle ngab ôsu ya nkulan ajô ôte é maneya tôéban, bi ne ñhe tabe ndi na ngabe ja su’ulan jé tôébane fe. Mvoñe minga ja zu ko’o nlô Satan ana’ana. Éyoñe te bebo bisaé be Yéhôva bé bo ne suu édudu! Ve ôsusua na môs ôte wo kui, te bia ve’ele bili atek. Zambe wongan a ne étyi teke laane minsos. A zene ya mvoñe minga, A ye soo “meyoñe mese ya si nyô” bibotan ne vôô nat!​—Met. 22:18.