• A ye bo nyô Zambe a nga top. “Me nga toé njô bôte wom . . . M’aye ve wo meyoñe me bôte me bo ngape jôé, a meku’u ya si nyô me bo émmôé.”​—Besam 2:6, 8.

• A ye so mvoñe bôte Njô bôte David. “Mon a bialéya be bia, mona fam a vebaneya be bia . . . Njôane a jô bôt a mvo’é bia ye nen te nné, mfa’a ya éto njô David, a mfa’a ya njôane wé, a yemete wô.”​—Ésaïe 9:6, 7.

• A ye bialé e Bethléhem. “A Bethléhem Éphrata . . . , môt aye so be wo a zu be ma a ye bo njôô Israël été . . . A ye bo anen akui [susu’a] ya si nyô.”​—Michée 5:2, 4.

• Aye tôbane mewosan a ba ye wôé nye. “A mbe mbiasan a bôt be nga bene nye. . . . A mbe mbalan amu mintyamane metiñe miangan, a nga nyoñ bedu’i amu mbia be mam bangan.”​—Ésaïe 53:3, 5.

• A ye wômô soñ a nyoñ duma yôp été. “Wo aye bo te li’i [ma soñ été]; nalé fe w’aye bo te jibi na, mbamba môte wôé a yen ébo. . . . Mam me ne mvaé me ne mbo nnôm wôé nnôm éto.”​—Besam 16:10, 11.

Mendeme mete mese ma tôéban be môte wuwua, nyô a ye bo mbamba Njôô; môt ate a ne Yésus Krist. Jôm ete nje éngele éziñ a nga jô Marie nyia Yésus na: “Zambe a ye ve nye éto njôane David ésaa wé, . . . njôane wé wo ye bo teke man.”​—Luc 1:31-33, Mfefé Nkôñelan.

Teke môs éziñ Yésus a nga jôé si. Ve éyoñ a ye bo Njôô ya Éjôé Zambe, a ye jôé si ése a to yôp. Amu jé nnye a ne Njôô a yian? Tame yene mbamba be mam a nga bo éyoñ a mbe si va.

•   Yésus a nga nyoñe ngap a bôt. Yésus a nga volô befam a binga, bisoé a minnôm, minkukum a minzôzoé. (Matthieu 9:36; Marc 10:16) Éyoñe nzezam éziñ ô nga jô nye na: “Nge wo ame’ete, ô ne ngule ya saé ma,” Yésus a nga wô’ô nye éngôngol, ane a nga saé nye.​—Marc 1:40-42.

• Yésus a nga ye’ele bia avale bi ne ve Zambe nlem avak. A nga jô na: “Mi se ngule ya saane Zambe ba [akum].” A nga jô fe na, bia yiane nyoñe bôte bevok ngap avale bia yi na bôte bevo’o fe be nyoñe bia ngap. A nga liti na Zambe a nji fombô ve mam bia bo, a fombô fe mam bia simesan a wô’ôtan. Jôm ete nje bia yiane tabe ntyel a mam bia simesan minlem été nge bia kômbô ve nye nlem avak. (Matthieu 5:28; 6:24; 7:12) Yésus a nga liti fe na, asu na bi bi benya meva’a, bia yiane yeme mam Zambe a nye’e a ve ngul ya bo me.​—Luc 11:28.

• Yésus a nga ye’ele bia jé ja tinane na e nye’e bôte bevok. Mejô me Yésus a mimboane mié mi nga nambe minleme mi bôt be nga vô’ôlô nye. Bible a jô na “jama bôt ate ase a nga semé ñye’elane wé: amu a nga ye’ele be aval ane émien a ne njôô.” (Matthieu 7:28, 29) A nga jô be na: “Nyeka’ane bôt be asiñe mia.” A nga yeye’elan asu bôte be nga wôé nye a jô’ô na: “A Tat, jamé’é be; amu be nji yeme jam be abo.”​—Matthieu 5:44; Luc 23:34.

Teke bisô na, Yésus fo’o nnye a yiane jôé amu a ne mbamba nlem a wô’ô fe bôt éngôngol. Ve a ye ñhe taté na a jôé éyoñ évé?