Nlô ajô ya mvus, bia te yene ndeme Yésus a nga ve beyé’é bé. Ndem éte ja kôme bo’olô na Éjôé Zambe é tebeya yôp, a na Yésus Krist nnye a ne Njôô y’été.

Kalate Zambe a liti na éyoñ Yésus a nga nyoñ éto njôô, a nga titane Satan a mimbia minsisime mié yôp. Be ne ngule ya bo mbia be mam fo’o ve si, jôm ete nje minjuk mi nga nembane ataté mbu 1914.​—Nlitan 12:7, 9.

Akusa bo minju’u mite mise, Yésus, Njôô ya Éjôé Zambe, a bo mam ma sili asu na a volô bone be bôt. A zene ya ésaé nkañete ja bobane si ése, abui bôt da yé’é a tôñe miñye’elane ya Bible môs ôse. (Ésaïe 2:2-4) Bemillion be bôt ba ve ngule ya telé ésaé a biôme bi mo été ja yiane bie, ba saé fe asu na nda bôte jap é nyiñe meva’a été. Ba jeñ a ngul ése na be tyendé fatan ényiñe jap den, ndemben ba ye bo avale bôt é ne ngule ya nyiñe mvo’é été mfefé émo.

Akusa bo Yésus a nyoñeya éto njôô yôp, bone be bôt be ngenan be jôé si. Ve Zambe a nga jô nye na: “[Kele’e] jôô besiñe ba bômane wo a ngu.” (Besam 110:2, Mfefé Nkôñelan) Ana’ana, Yésus a mbeme jiane besiñe bé bese ne meññ, a soo mvolane minlem asu ba bese be bili nkômbane ya bo Zambe mewôk.

Éyoñe jam ete da ye boban, Éjôé Zambe ja ye:

• Tyam évuse ñyebe. Miñyebe mi nga laane bôte minsos a lat a Zambe a tibili bôt mia ye jañ. Bible a ve’e évuse ñyebe a minga bijabô. Njañane wé wo ye li’i abui bôte fe’e ne vema.​—Nlitan 17:15, 16.

• Tyam éjôé mona môt. Éjôé Zambe ja ye tyam bijôé bi bone be bôt bise.​—Nlitan 19:15, 17, 18.

• Jiane mbia be bôt. Jé ja yange bôte bese ba ke ôsu a bo mam Zambe a vini a bene bo nye mewôk? Bible a jô na, “bôt be ne abé b’aye tyi’ibane si nyô.”​—Minkana 2:22.

• Wua Satan a mimbia minsisim édo’o ébé été. Satan a mimbia minsisime mié ba ye ke beta kui na be “du’u meyoñ.”​—Nlitan 20:3, 10.

Jé ki ja yange ba bese ba kañese tabe Éjôé Zambe si?

Éyoñe Yésus a ye jôé si ése, a ye bo mam mese bijôé bi bone be bôt bi nji kui na bi bo. A ye jôé a bôte 144 000 ba ye nyoñebane si va. (Nlitan 5:9, 10; 14:1, 3) A ye saé mfa’a ya na nkômbane Zambe ô kôme bobane si va. Bibotane bivé bia yange ba bese ba ye nyiñe si va?

• Bôt ba ye ke beta kon, nge yômbô nge ke wu. “A môt a to été a ye bo te jô na, m’akon” a “awu de aye fe bo.” ​—Ésaïe 33:24; Nlitan 21:4.

• Bôt ba ye nyiñe nya mvo’é été, teke ko jôm éziñe woñ. “Mvo’é ya bone bôé j’aye bo anen,” a “b’aye tabe si môt ase ndi’i wé si a élé figuier jé si; te ke môt a ye ve be woñ.”​—Ésaïe 54:13; Michée 4:4.

• Bôte ba ye bi mbamba ésaé ya bo. “Bôte bam be ne mintoban b’aye jaé vak a ésaé ya mo map. B’aye bo te bo ésaé éboboé.”​—Ésaïe 65:22, 23.

• Bôte ba ye ke beta ndamane si. “Fé a si é ne nkôt bi aye yen mvaé; a nkôte si w’aye vak, a kuli sam aval ane élo’o sam.”​—Ésaïe 35:1.

• Bôte ba ye yé’é mam ba yiane bo asu na be bi ényiñe ya nnôm éto. “Ényiñe ya melu mese é ne na, be aye yeme wo wo étam ô ne nya Zambe, be aye yeme fe nyô ô nga lôm, nnye a ne Yésus Krist.”​—Jean 17:3.

Zambe a yi na wo fe ô bo môte wua ya bôte ba ye bu’ubane bibotane bite. (Ésaïe 48:18) Nlô ajô wo tôñe valé wo ye kate wo mam wo yiane bo éyoñe ji asu na ô bu’ubane bibotane bite melu ma zu.