1-3. Jé é nga bo na môse ya pentecôte ô bo ngumba avale môs, a aval avé mam mete me nga tôé minkulane mejô ya Kalate Zambe? (Fombô’ô fôtô a ne atata’a ya ayé’é di.)

BI NE mame tyé ya pentecôte ya mbu 33. Tyé te é mbe ngumba aval. Môse sondô, bôte be mbe be jeme’e abô’ô ya pentecôte tisone ya Jérusalem. Abô’ô te é mbe étyi; be mbe be jeme’e de éyoñe ba yô adi da funan ôlis. Tyé te, nlô beve metuna’a ô nga nyiin e temple été aval ô wô’ô jaé zu wo nyiine na, wo ve metuna’a. E mewolo ébul, éyoñe te a ve bembômô ya bidi ba te yô mbu. Nlô beve metuna’a a to’é belete ba te mane yam, a bo je kele je mimfa’a mise asu na a liti je Yéhôva.​—Lévitique 23:15-20.

² Mbu ôse ya yôp, mvuse ntete mimbu ôse, nlô beve metuna’a ô mbe ô bo’o metuna’a ba liti mimfa’a mise. Metuna’a mete me mbe me lu’an a beta jam a nga bobane mbu 33, e Pentecôte. Jame te é nga kui beyé’é be Yésus 120 be mbe be ye’elane nsamba étune nda ya yôp e Jérusalem. (Mam Minlôman 1:13-15) Mimbu 800 ôsusua na jame te da boban, nkulu mejô Joël a nga mane tili mam mete. (Joël 2:28-32; Mam Minlôman 2:16-21) Jam é mbe é tôñe valé é mbe angôndô ya mfi.

 ³ Lañe Mam Minlôman 2:2-4. Môse pentecôte ya mbu 33, Zambe a nga ve Bekristen bete mbamba nsisim a ne be nga bo miñwo’an. (Mam Minlôman 1:8) Beyé’é be nga taté na ba kobô mbamba be mam be nga yen a wôk, ane nsamba bôt ô nga taté na wo bômane be. Nlômane Pierre ô nga kate be atinane ya mam me ndeme mane lôt, a amu jé mam mete me mbe mfi abui. Ane a nga jô nsamba bôt ô mbe ô bômane nye na: “Kôñela’ane minlem, mi baptizôbane mia bese, a jôé Yésus Krist, mfa’a ya njamane mam abé menan; nalé mi aye nyoñe mbamba nsisim, Tate a ye ve mia.” Môse te, bebé bôte 3 000 be nga duban, a nyoñe mbamba nsisim.​—Mam Minlôman 2:37, 38, 41.

4. (a) Amu jé bi nji yiane yene mam me nga bobane pentecôte ane zezé mam? (b) Beta be mam bevé befe be nga kui môse ôte mimbu ya mvus?( Fombô’ô ayemé é ne afebe si.)

⁴ Nlô beve metuna’a wo tinane jé, metuna’a a mbe a va’a e pentecôte ase ma tinane jé? Yésus nnye a ne éjiane nlô beve metuna’a. Beyé’é be Yésus be nga nyoñe mbamba nsisim, mbe be ne éjiane belet. “Bembômô” be ne beyé’é be Yésus be nga nyoñe mbamba nsisim. Be nga nyoñe bôte bete bese nsamba bôte be bili metyi me abé. (Jacques 1:18) Zambe a nga nyoñe be ane bone bé a tobe be na, ba be Yésus be ke bo bejôô ya Éjôé jé é ne yôp été. (1 Pierre 2:9) Yéhôva a ye belan Éjôé jé na, a ve bôte bese be ne mewôk bibotan. Nde to’o wo ye ke nyiñe yôp été fufulu a Yésus, to’o ke wo ye nyiñe paradis e si va, môse pentecôte ô ne mfi asu dôé. [1]​—Fombô’o ayemé é ne afebe si.

5. Aval avé bia yeme na, mbamba nsisim a nji zu be ba bese be ne ñwo’an, avale da?

⁵ Beyé’é be Yésus be mbe étune nda yôp, ba ye ke vuane môse te. Môt ase ya be be a mbe a bili jôm éziñ é too ane nkaba’a duane nlô yôp. Yéhôva a nga ve be ngule ya kobô minkobô be nji tame zu ba kobô. Môt éziñe ya be be a nji be sôane na a nyoñeya mbamba nsisim. (Mam Minlôman 2:6-12) Ve avale bitua bi mam bite é nji kui be bekristene bese éyoñe be nyoñeya mbamba nsisim. Éve’an é ne na, Kalate Zambe a nji jô na, jôm é to ane nkaba’a ndu’an é nga betebe minlô betoyini Bekristen be nga nyoñe mbamba nsisim e Jérusalem. Be nga nyoñe mbamba nsisim môs ôbiene fe be nga duban. (Mam Minlôman 2:38) A fe na, sa ke Bekristen bese, mbe ba bo miñwo’an éyoñe ba duban. Bôte ya Samarie be nga bo miñwo’an ôbe nte mvuse mbaptizô wop. (Mam Minlôman 8:14-17) A aval é nji tame zu da boban, Corneille a bôte ya nda bôte jé be nga bo miñwo’an ôsusua na ba nyoñe mbaptizô.​—Mam Minlôman 10:44-48.

6. Jé miñwo’ane mise mia nyoñ, a aval avé jame te da nambe be?

⁶ Nalé a yené ne sañesañe na Bekristen ba yem a abui mezene na be ne miñwo’an. Bôte béziñe ba ji’a yeme na be nto miñwo’an, bevo’o ke ba zu yeme na be nto miñwo’an éyoñ ayap éyoñ é lôteya. Ve nlômane Paul ô nga kate bia jame da kui be môt ase ya bebe. A nga jô na: “Amu mi nga buni fe, a ne mi nga feteban a mbamba nsisim ya ntiñetan, nnye ate a ne mbômô ya ngape jangan.” (Beéphésiens 1:13, 14) Nde Yéhôva a belane mbamba nsisim wé, asu na Bekristen bese a tobeya na be ke tabe yôp, be tu’a yeme nalé. “Mbamba nsisim ya ntiñetan,” nnye a ve sitame na, melu ma zu ba ye nyiñe nnôm, éto nge si va, nge yôp été.​—Lañe 2 Becorinthien 1:21, 22; 5:5.

7. Jé ñwo’an ôse wo yiane bo asu na ô bi ma’ane ya ke nyiñe yôp?

 ⁷ Éyoñe Kristen a ntoo ñwo’ane nsisim, ye nalé a tinane na a mbili fo’o ma’ane mé éyoñe jia ya biyoñe bise? Momo. A bili ndi nleme na a ye ke nyiñ e yôp été. Ve a ye bi ma’ane mé fo’o ve nge a wulu ba’aba’a a Yéhôva. Pierre a nga jô na: ‘Ajô te, a bobejañ, mi dañe veane ngule ya bo nloene wônan a ntobane na bi bo été: amu na, nge mi [kele ôsu a] abo mame mete mi aye bo te ke ku: amu nalé ate nyiane ya nyin ayoñe ya nnôm éto, di Tate a nyii bôte Yésus Krist wongan, wo aye veban abui be mia.’ (2 Pierre 1:10, 11) Nde Kristen ase a ne ñwo’an, a nji yiane jô’é na jôm éziñ é ndeñele nye ésaé a bo asu Yéhôva. Ja’a a nga loebane na a ke nyiñe yôp, a ye bi ma’ane mé fo’o ve nge a wulu ba’aba’a a Yéhôva.​—Behébreu 3:1; Nlitan 2:10.

8, 9. (a) Amu jé é ne ayaé asu abui bôte na be yeme jame da lôtan éyoñe môt a bo ñwo’an? (b) Aval avé môt a yeme na a te bi nloene ya ke nyiñe yôp?

⁸ Abui bebo bisaé be Yéhôva ya melu ma da kate kôme yeme jé nje ja lôt éyoñe Zambe a ve môt mbamba nsisim. Nalé a yiane amu bebien be ngenan te bo ñwo’an. Zambe a nga té bôte na be nyiñe si va nnôm éto sa ke yôp. (Metata’a 1:28; Besam 37:29) Ve Yéhôva a nga tobe bevo’o ya été na, be bo bejô a bepretre yôp été. Nde éyoñe Yéhôva a ve be mbamba nsisim, ndi nleme jap a avale ba fas a ba tyendé. Nde be to ndi na ba ye ke nyiñe yôp été.​—Lañe Beéphésien 1:18.

⁹ Ve aval avé môt a yeme na a te bi nloene ya ke nyiñe yôp? Tame yene jame Paul a nga kate bobenyañ be mbe miñwo’an Rome, mbe bete be mbe “bôte ya Zambe.” A nga jô be na: “Mi nji nyoñe nsisime wo bo mia belo a beta ve mia woñ minlem, ve wu wo ve mia éto bon, a ñwô ôte bia yôtane na Abba! Tate! Nsisime te ôbien wo kate nsisime wongan na bi ne bone be Zambe.” (Beromain 1:7; 8:15, 16 Mfefé Nkôñelan) A zene ya mbamba nsisim, Zambe a liti môt ne sañesañe na a ne ntobane ya ke jôé a Yésus yôp été.​—1 Bethessalonicien 2:12.

10. Jé éfuse 1 Jean 2:27 ja kômbô jô éyoñe ja jô na, môt a nji yiane ye’ele Bekristene be ne miñwo’an?

¹⁰ Bôte Zambe a loeneya na ba ye ke nyiñe yôp été, be nji yiane kate bôte bevok na be ntoo miñwo’an. Yéhôva émien a bo na be tabe ndi nleme mfa’a ya jame te. Nlômane Jean wo kate Bekristen be ne miñwo’ane na: “Mi ne ñwo’an wo aso be nyô a ne étyi, a mi ayeme mam mese,” a nga beta fe jô na: “A mfa’a wônan, ñwo’ane mi nga nyoñe be nye ô to be mia, a mi ne te yiane na, môt éziñ a ye’ele mia; ve avale ane ñwo’ane wé wo aye’ele mia mam mese, a ô ne été, a ô ne te minsos, a aval ane ô nga ye’ele mia mi, to be nye.” (1 Jean 2:20, 27) Avale Yéhôva a ye’ele môt ase ya be bia avale te fe nde a ye’ele Bekristen be ne miñwo’an. Ve be nji yange na môt éziñ a zu ji’ane be na be ne ñwo’an. Yéhôva a nga belane mbamba nsisim wé, ngule ja dañe mengule mese, na a liti be ne sañesañe na be ne fo’o miñwo’an!

11, 12. Kristen é ne ñwo’an é ne sili nsili ôvé, ve a nji sôane na jé?

¹¹ Éyoñe Bekristen ba nyoñe mbamba nsisim, ba tyendé abui. Jôme te nje Yésus a nga jô na, ba “beta bialé,” nge na, ba bialé na be ke nyiñe yôp été. (Jean 3:3, 5) A nga beta fe jô na: “Te semé amu me ate jô wo na, mi ayiane beta bialé. Évuñulu ja vuñ vôme je anye’e, wo awô’ô je éduñ, te yeme  je mfa’a je aso a mfa’a ja ke: nalé fe môt ase a bialé a nsisim a né.” (Jean 3:7, 8) Nalé a kôme liti na, môt a ngenane te bo ñwo’an a se ngule ya kat avale môt a ne ñwo’an a wôk. [2]​—Fombô’ô ayemé é ne afebe si.

¹² Môt a ne ñwo’an a ne sili na, ‘Amu jé ma Yéhôva ate top, sa ke môte mfe?’ A ne sili émien, nge mbe’e te wo yiane nye. Ve a nji sôane na Yéhôva a nga tobe nye. A wô’ô angôndô ya avak, a ve fe Yéhôva akéva asu beta das ate. Miñwo’an mia wô’ôtan avale Pierre a nga wô’ôtan éyoñ a nga jô na: “Zambe nye a ne Ésa ya Tate Yésus Krist wongan, a bo’o duma, nnye ate, aval ane beta mvame wé, a nga beta biaé bia mfa’a ya vevea ndi nlem, amu ñwômane ñwuane ya Yésus Krist na, bi nyoñe ngap é ne te ngule ya boé, a te mvin, a ne te viele, é ne mia nnaane yôp été.” (1 Pierre 1:3, 4) Éyoñe miñwo’an mia lañe bifia bi, ba yeme na Ésa wop a kobô môt asese’e ya bebe.

13. Aval avé, mfasane môt wo tyendé éyoñ a ntoo ñwo’an, a jé ja bo na ntyendane te ô boban?

¹³ Ôsusua na Bekristen ba bi nloene ya ke nyiñe yôp, be mbe be bili ndi nleme ya nyiñe si va nnôm éto. Be mbe be yange éyoñe Yéhôva a ye mane bo na si é bo paradis, a va mbia be bôte bese. Éyoñ éziñe be mbe be simesan éyoñe ba ye ke wubane bibu’a ya nda bôte jap, nge bemvôé bap be nga mane wu. Be mbe fe be yange na, ba ye lôñe mbamba menda a nyiñ été a bé bilé a di bibuma ya été. (Ésaïe 65:21-23) Amu jé be nga taté na ba fas avale afe? Ye amu be nga ku beta ôkon, nge ke amu be nga tôbane abui minjuk? Ye be nga tyi’i atemeteme na be nji beta kômbô nyiñe si va nnôm éto? Ye befe ba kômbô yem aval ényiñe ya yôp é ne? Momo, ve Zambe émien nnye a nga nyoñe ntyi’ane te asu dap. Éyoñ a loene be a belane mbamba nsisim wé asu na, avale ba fas é tyendé, a ndi nlem be bili asu melu ma zu é tyendé.

14. Miñwo’ane mia yen ényiñe ba nyiñe si va aya?

¹⁴ Ye nalé a tinane na ñwo’an wo kômbô wu? Paul a nga kate bia avale ñwo’an wo wôk nlem été. A nga vek nyôle minsône jap ane “ébem [nda bindélé]” éyoñe a nga jô na: “Bia bi ne ébem [nda bindélé] jina si, bia tat édudu’u nyôl ése. E ne nalé na, bi nji kômbô vaa biyé, ve bia kômbô beté éyé e ji évo’o yôp, ndembene jôme ja wu ja ye mineban ényiñ été.” (2 Becorinthien 5:4, Mfefé Nkôñelan) Bekristen bete be nji kômbô wu. Ba nye’e ényiñ. Môs ôse ya yôp, ba kômbô bo Yéhôva ésaé fufulu a nda bôte jap a bemvôé bap. To’o ba bo za avale jam, be ne te ke vuane jôme Zambe a nga ka’a be melu ma zu.​—1 Becorinthien 15:53; 2 Pierre 1:4; 1 Jean 3:2, 3; Nlitan 20:6.

15. Jé é nji liti na môt a ntoo ñwo’an?

¹⁵ Éyoñ éziñ ô siliya womiene nge Yéhôva a loeneya wo na ô ke nyiñ e yôp été. Nge ô bili aval ôsimesane te, sili’i womiene minsili mi: Ye wo simesane na ayôñe dôé ya kate mbamba fôé é ne ngumba aval? Ye wo nye’e ô yé’é mejô me Zambe a “bido’o bi mame bi Zambe”? (1 Becorinthien 2:10) Ye ô yeneya na Yéhôva a belane wo na ô volô abui bôt na é yeme benya mejôô? Ye wo yene na susu’a jame wo kômbô bo ényiñe jôé é ne ve nkômbane Zambe? Ye wo nye’e bôte bevok a nlem ôse, a ye wo simesane na beta jame wo yiane be bo a ne na ô volô be na be yeme Yéhôva? Ye ô yeneya mvolane Yéhôva mingumba bité biziñe ya ényiñe jôé? Nge ô yalane na ôwé minsili mi mise, ye nalé a tinane na wo ye ke nyine yôp? Momo. Amu jé? Amu bebo bisaé be Yéhôva bese be ne simesane nalé to’o be ne  miñwo’an nge momo. Yéhôva a ne belane mbamba nsisim wé na a ve môt ase a ne mbo ésaé wé ngule ya bo nkômbane wé to’o a ye ke nyiñe yôp, nge si va. Nde, nge ô ngenan ô fase nge wo ye fo’o ke nyiñe yôp, yeme na ô nji bo ntoban. Bôte Yéhôva a tobeya be nji beta ve’e befe’e! Ba yeme yeme nalé!

16. Aval avé bia yeme na, sa ke bôte bese be nga nyoñe mbamba nsisim, mbe ba ye ke nyiñe yôp?

¹⁶ Kalate Zambe a kobô ajô abui bôt Yéhôva a nga ve mbamba nsisime wé, ve be nji ke yôp. Môte wua ya été a ne Jean Baptiste. Yésus a nga jô na teke môt éziñ a bialéya, a dañe jean Baptiste. A nga beta fe jô na, Jean a ye ke bo njôô e Yôp été. (Matthieu 11:10, 11) Mbamba nsisim a mbe fe a wulu a David. (1 Samuel 16:13) Mbamba nsisim a nga volô nye na a wô’ô bido’o bi mam bia fombô Yéhôva. Mbamba nsisim a nga volô fe nye na a tili bekalate béziñe ya Kalate Zambe. (Marc 12:36) To’o nalé, nlômane Pierre ô nga jô na, “David a nji ke yôp été.” (Mam Minlôman 2:34) Yéhôva a nga belane mbamba nsisime wé na, a ve bôte bete ngule ya bo bitua bi mam. Ve a nji belane mbamba nsisime wé na, a loene be, be ke nyiñe yôp été. Ye nalé a tinane na, be nji be zôsô abui, nge na be nji be avale bôte da yiane ke jôé e yôp été? Momo. Nalé a tinane fo’o ve na, Yéhôva a ye wômôlô be na be zu nyiñe paradis e si va.​—Jean 5:28, 29; Mam Minlôman 24:15.

17, 18. (a) Ma’ane me vé bebo bisaé be Yéhôva ba yange den? (b) Ayé’é da tôñe di, da ye ve biyalane ya minsili mivé?

¹⁷ Abui bebo bisaé be Zambe ya melu ma, é nji bi ndi nleme ya ke nyiñe yôp. Bôt aval ane Abraham, David, Jean Baptiste, a befe abui, ba yange nyiñ Éjôé Zambe si. (Behébreu 11:10) Bôte 144 000 (ntete toyini a betoyini mewôme meyiñ a benyin) ba ye jôé fufulu a Yésus e yôp été. Ve Kalate Zambe a kobô ajô ya “mebuka’a” ya miñwo’an; mme mete me ngenan si va éyoñe ji. (Nlitan 12:17) Nde abui bôte 144 000 (ntete toyini a betoyini mewôme meyiñ a benyin) be wuya, a be ntoo yôp été.

¹⁸ Ve nge môt a jô na, a ne ñwo’an, bôte be bili ndi nleme ya tabe si, ba yiane nyoñe njôane te aya? Nge monyañe wé ya akônda a taté na a di belet, nge nyu wone mesimesa’ane ya awu Yésus, wo yiane yene nye aya? Ô ne bo aya nge tañe bôte ja di belet, a nyu wone mesimesa’ane ya awu Yésus é ve nenenen? Ye jame te da yiane tyelé wo nleme yôp? Bia ye ve biyalane ya minsili mite ayé’é da tôñe di.