“MBÔLÔ! Ye ô ne mvo’é?”

Bia yeme na, ô ju’uya zu wo batane bôte nalé. Éko éziñe ô wô’ô de bo ô same’e môte wo, nge ke ô wuba’ane nye. Mefulu a bifia asu mebatan bi ne selan, ve bi ne tyiñe na bôte bese ba batan. E bo te batane bôte bevok, nge ke ku môt évôl éyoñ a batane bia, a ne ndeme ya na bi ne ndiman.

Ve bôte bese be nji nye’e be bata’an. Bôte béziñ be ne awu ôsonô. Ba bevo’o ki ba wô’ô nju’u ya batane bôte ba be be ba selan ékôp, metum, nge ke nkôñ ényiñ. Ve jame da, e nyoñe mon éyoñe ya batane môt a ne nambe nye nlem aval ô nji buni.

Sili’i womien na: ‘Jé mebatan me ne bo? A jé Kalate Zambe a ne ye’ele ma a lat mebatan?’

Éyoñ a nga laan a Corneille, mone begentil ôsu a nga bo Kristen, nlômane Pierre ô nga jô na: “Zambe a nji bo éngengam.” (Mam. 10:34, Mfefé Nkôñelan) Mvuse bone mimbu, Pierre a nga tili na, Zambe a yi na bôte “bese be zu kôñelane minlem.” (2 P. 3:9) Bi ne buni na, mejô mete ma fombô ve bôte be ngenane ba yé’é benya mejôô. Ve Pierre a nga jô fe Bekristene na: “Sema’ane bôte bese, nyeka’ane bobenyañ.” (1 P. 2:17) Nga nalé a tinane na bi nji yiane fiale bôte bia batane be? Bia semene bôt éyoñ bia batane be.

Nlômane Paul ô nga jô Bekristene na: “Wua a nyoñe’ nyô mbok, aval ane Christ fe a nga nyoñe mia.” (Bero. 15:7) Paul a nga dañedañ batane bobejañ ‘be nga volô nye nlem.’ Dene fe, bia yiane dañe ve bobejañe ngule nyul amu Satan a bo na be tôbane meve’ele mevale mese.​—Beco. 4:11; Nli. 12:12, 17.

Kalate Zambe a liti na, mfi ya mebatan ô nji su’u ve na môt a wô’ôtane na ba nyoñe nye mvo’é.

Ôsusua na a lôme Mone si va, Yéhôva a nga lôm éngele na a ke laane Marie. Éngele ate a nga jô nye na: “Mbôlô, ô maneya yen abui mvam, Yéhôva a ne be wo.” Marie a nga “dañe fô’ôban” amu a nji be a yeme’ amu jé éngele ate a kobô a nye. Ane éngele a nga jô nye na: “A Marie te ko woñ, amu ô yeneya mvam be Zambe.” A nga kate fe nye na, Zambe a jô na nnye a ye biaé Messie. Ane nlem ô nga bômbô nye si, nye’e na: “Tame yene ma, me ne minga a ne mbo ésaé Tate; ajô te bo’o ma ane wo te jô.”​—Luc 1:26-38.

Éngele ate a nga bi mvome ya kalane foé Yéhôva; a nji simesane na ba sili nye si, jôm éte nje ba lôme nye na a ke laane môt a binam. A nga taté minlañ a mebatan. Nkañete ôte wo ye’ele bia jé? Bia yiane batane bôte bevok a ve be ngule nyôl. Da sili ve bone bifia asu ya na, bi vôlô bôte na be wô’ôtane na be’efe be ne bibu’a ya nda bôte Yéhôva.

Nlômane Paul ô nga mane yemban a abui bôte mekônda ya Asie Mineure a Europe. A batan abui ya be be bekalate a nga tili. Bia yene de ataté kalate Beromain kabetôlô 16. Nlômane  Paul wo batane abui Bekristen. A nga loone Phébé na: “kale jangan,” a nga jô fe bobenyañe ya akônda na be ‘nyoñe nye be Tate, ane de ayiane bôte ya Zambe, a na, be volô nye mfa’a ya jam ése da sili nye.’ Mfa’a Prisca ba Aquilas, Paul a nga jô na: ‘Mi sili’i ma be . . . mbe bete, sa ve me étam me ave be akéva, ve nalé fe mekônda mese ya begentil.’ A nga batane fe bôte béziñe bi nji dañe yeme den, a jô’ô na: “Épaïnète, nyô me anye’e,” “Tryphène ba Tryphose, mbe be abo ésaé be Tate.” Ôwé, Paul a nga batane fo’o bobenyañ a bekale bé.​—Bero. 16:1-16.

Tame ve’ele simesan meva’a bobejañe bete be nga wôk! Bi ne simesane na be nga tu’a nye’e Paul a bobenyañ bap. Mebatane mete me nga yiane fe ve Bekristene bevo’o ngule nyôl, a yemete mbunane wop. Ôwé, éyoñ bia batane bobejañ a ôsesa, bi se’e be a nlem ôse, nalé a yemete élate jangan.

Éyoñ Paul a nga kui ékôte mañe ya Puteoli, a kele’e Rome, bobejañe ya vôm ate be nga so mfa’a ya sud na ba zu tôbane nye. Éyoñe Paul a nga yene be, be za’a ôyap, ‘a nga ve Zambe akéva, a bi ngule nyul.’ (Mam. 28:13-15) Biyoñ biziñ bi ne su’u ve na bia muñ a môt, nge ke febe nye. Ve to’o avale mebatan ete e ne ve môt a bili ate’e ngule nyul.

Jacques, ñyé’é Yésus, a mbe a yi’ane ve Bekristene béziñ melep. Bekristen bete be nga bo mejian mfa’a ya nsisim, amu be nga late ngbwa a émo. (Jc. 4:4) Ve tame yen avale Jacques a nga taté kalate wé:

“Jacques, mbo ésaé Zambe a Tate Yésus Christ, me atili meyoñ awôm a mebaé kalate, mme mete me ne mmialan yôpe yôp, taba’ane mvo’é.” (Jc. 1:1) Teke bisô na, mebatane mete me nga tindi bobejañe na be tôñe melebe mé tyi’ibi. Yaa, mbamba mebatane me ne volô na bi lebe môte tyi’ibi.

Nye’an e ñwô wo yiane tindi bia na bi batane môt, to’o éyoñ mebatan mete me ne étun. Bia yiane de bo to’o bia buni na môt a nji yene bia. (Mt. 22:39) Sita ya Irlande a nga kui Aba Éjôé môs éziñ, e zu koone na ésulan e nga zu taté. Nné ane a nga nyiin, nde mojañ a nga batane nye a muñu’u, a jô nye na: “Mbôlô, ma wô’ô mvaé ya yene wo.” Ve Sita ate a nga ke tabe éto jé, te ke yalan.

Mvuse bone besondô, a nga zu yene mojañ ate, a jô nye na a tôbane bone minju’u nda jé. Nde a nga jô nye na: “Me nga ye bo te ke so Aba Éjôé ngô’é éte, nlem ô mbe ma mbia abé. Me vuaneya mam mese be nga jô Aba Éjôé môs ôte, ve me ngenane me simesa’ane mebatane môé. Me nga wô’ôtane fo’o na me ne nda jam. Akéva abui.”

Mojañ ate a nji be a buni’i na mebatane mé ma ye volô sita ate abim ete. A jô na: “Éyoñe sita ate a nga kate ma avale a nga wô’ôtan éyoñe me nga batane nye, ma fe me nga wô’ô mvaé.”

Salomon a nga tili na: “Wu’a bidi biôé mendime yôp; amu w’aye yene bie éyoñe melu abui me lôteya.” (Ec. 11:1) Éyoñ bia yeme mfi ya batane bôt, e dañedañ bobejañe ya nsisim, nalé a volô be a biabebien. Nde ñhe, te bia ve’ele biasé mfi ya mebatan.