1. Jé Yéhôva a nga ve bebo bisaé bé bese?

YÉHÔVA a ve mbo ésaé wé ase éto akônda dé. Akusa bo bia bese bi nji bi aval ésaé da, bia bese bi ne mfi, a teke môt éziñ a ne jô na a nji yi ba bevok. Nlômane Paul ô nga volô bia na bi kôme wô’ô jam ete. Aval avé?

2. Bela’ane Beéphésien 4:16 na ô liti amu jé môt ase ya be bia a yiane semé nyô mbok, a amu jé bia yiane saé a nleme wua?

² Éfus ja wulu ayé’é di, Paul a jô na teke mbo ésaé Yéhôva éziñ a ne jô nyô mbo’o na: ‘Me nji yi wo.’ (1 Bec. 12:21) Asu na mvo’é é bo akônda, bia yiane semé bobejañ bevok a saé bia bese nleme wua. (Lañe’e Beéphésien 4:16.) Éyoñe bi ne nlatan, akônda da tu’a bo ngul a môt ase a wô’ôtane nye’ane bôte bevok.

3. Jé bia zu yen ayé’é di?

³ Aval avé bi ne liti na bia semé bobejañe ya akônda? Ayé’é di da zu volô bemvendé na be yem aval avé môt ase ya be be a ne semé ba bevok. Mvuse ya valé, bia zu yen aval avé môt ase ya be bia a ne semé bobejañ a besita be ne minkoé. Wônaa, bia zu su’ulane yen avale bi ne semé bobejañ ba bibane na be kobô nkobô wongan.

4. Melebe mevé Paul a ve bemvendé kalate Beromain 12:10?

⁴ Mbamba nsisime Yéhôva nnye a telé bemvendé bese ya mekônda. Môt ase ya be be a bili mveane wé. (1 Bec. 12:17, 18) Bevo’o be ndeme bo bemvendé, ajô te be nji tu’a yem ésaé ane ba be jaéya be’e mbe’e ôte. Bevo’o ki be ne mintutuñ nge ke minnôm. Ve, mvendé éziñ é nji yiane fombô mvendé fe a mbot asu ane nyô a kômbô jô na: ‘Me nji yi wo.’ Ve bemvendé bese ba yiane tôñe melebe me Paul bia koene me kalate Beromain 12:10.​—Lañek.

5. Aval avé mvendé ja liti na ja semé bemvendé bevok, a amu jé nalé a ne nya mfii?

⁵ Mvendé ja liti na ja semé bemvendé bevok éyoñe ja kôme baa alo éyoñe ba kobô. Nalé a dañe mfi éyoñe ba sulane mfa’a ya kobô mam ma fombô akônda. Amu jé bia jô nalé? Tame yene jame Nkume mmombô a bete ya mbu 1988, Ngon awômô é too alu 1 a nga jô: “Bemvendé ba yeme na, Krist, a zene ya mbamba nsisim, a ne wulu mvendé ése ya akônda mfa’a ya liti be ñye’elane ya Bible ô ne volô be na be kôm ajô éziñ, nge ke na be nyoñe mbamba mintyi’an. (Mam. 15:6-15) Mbamba nsisime Yéhôva a wulu bemvendé bese ya akônda, sa ke ve jia étam.”

6. Aval avé bemvendé be ne saé a nleme wua, a mfi ôvé jam ete e ne bo asu akônda?

⁶ Mvendé ja semé ba bevok ja suñe ki nkobô éyoñ be ne ékôane bemvendé. A jeñe ki na tyiñe jé nje be dañe wôk, a na éyoñ a jôya jôm, môte mfe a nji yiane fet. Ve a ve ôsimesane wé a éjote nyul. A kôme vô’ôlô bôte bevok éyoñe ba kobô. A jeñe na mam mese a jô me so Bible nge ke bekalate ôlo ô ne mewôk a fek wo kuli. (Mt. 24:45-47) Éyoñ ékôane bemvendé ja boban  nye’an été a évôvoé été, mvendé ése é semé’é nyô mbok, mbamba nsisime Yéhôva a wulu be, a volô fe be na be nyoñe mintyi’an mia ye bo mfi asu akônda.​—Jc. 3:17, 18.

7. Aval avé Yésus a mbe a yene’e éto nkoé?

⁷ Akônda Yéhôva bia koon abui beluk. Ve bia koone fe abui bobejañ a besita e ne minkoé. Aval avé wo yiane yene minkoé? Yésus nye a mbe a yene’e éto nkoé aya? A nga mane ésaé nkañete jé teke luk. A nga tabe nkoé a telé’é jôme jia ôsu, ve ésaé é nga soo nye si va. Yésus a nji jô môs éziñe na môt a mba’a mba’a ve luk nge tabe nkoé. Ve, a nga jô na Bekristene béziñ ba ye tobe na ba tabe minkoé. (Mt. 19:11, 12) Yésus a mbe fo’o a semé’é minkoé. A nji be a yene’e mie ane zezé bôt nge ke ane ba ba jembane jôm éziñ ényiñ.

8. Melebe mevé Paul a ve Bekristen kalate 1 Becorinthien 7:7-9?

⁸ Paul fe a nga mane ésaé nkañete jé si va teke luk. A nji kamane Bekristen na be luk. A mbe a yeme’e na, ntyi’an ôte ô ne wu wo fombô môt émien. Ve Paul a nga lebe Bekristene na be fas nge be ne bo Yéhôva ésaé be too minkoé. (Lañe’e 1 Becorinthien 7:7-9.) Mam mete ma liti na Paul a nji be a simesa’ane na beluk ba dañe minkoé. A nga ve Timothée beta mimbe’e ékôane Yéhôva, a too ke na a mbe nkoé. * (Beph. 2:19-22) Nalé a ye’ele bia na, bi nji yiane buni na môt a yiane mbe’e éziñ nge ke na a nji yiane wô fo’o ve amu a ne nlu’an nge ke amu a ne nkoé.​—1 Bec. 7:32-35, 38.

9. Jé bi ne jô a lat a aluk a éto nkoé?

⁹ Yésus ba Paul be nji yemete Bekristene na be tabe nkoé nge ke na be luk. Nde, jé bi ne jô a lat a aluk a éto nkoé? Nkume mmombô a bete ya mbu 2012, Ngon awômô é too alu 1, a nga wôlôkane jam ete avale di: “Nya ajôô a ne na, [aluk a éto nkoé] bi ne mimveane mi Yéhôva. . . . Yéhôva a yene ki éto nkoé ane jam ôson, nge ke ane biyo’é.” Nde  ñhe, bia yiane semé bobejañ be ne minkoé.

10. Aval avé bi ne liti na bia semé bobejañ be ne minkoé?

¹⁰ Mam mevé bi ne bo asu na bi bo te kolé bobejañ a besita be ne minkoé ôbak? Bia yiane taté yeme na, bobejañ béziñ be ne minkoé amu bebien be nga tyi’i na ba tabe teke luk. Éko éziñ ba bevok ba kômbô fo’o luk, ve be nga’an teke yene môt a yiane be. Bevo’o ki be ne minkoé den amu môt be nga luk a nga wu. Nde ñhe, ye môt éziñ ya be bia a yiane bele kôme sili Kristen é ne nkoé na, ‘Wo yange yange jé na ô luk?’ nge ke na, ‘Ye me volô wo jeñ aluk?’ E ne fo’o kui na nkoé éziñ ô sili wo mvolan mfa’a ôte. Ve nge môt a nji sili wo jôm, a ne wô’ôtan aya nge wo sili nye avale minsili ete? (1 Bet. 4:11; 1 Tim. 5:13) Bi tame zu vô’ôlô minkoé miziñ.

11-12. Aval avé bi ne te’e bobejañ be ne minkoé?

¹¹ Éwôlô njome mekônda éziñ ja jô na, môt a ne nkoé a ne bo abui mam ékôane Yéhôva. Ve a jô na, nyul é wô’ô viane te’e nye éyoñe bobejañ a besita a too be ndi ba kôme zu sili nye na: “A mojañ, wo yange yange jé na ô luk?” Mojañ mfe a saé Béthel a jô na: “E wô’ô kui biyoñe biziñ na bobejañ a besita be bo ve ane môt a ne éngôngol amu a ne nkoé. E nga viane yené ve ane éto nkoé é ne adite mbe’e a too ke na é ne mveane Yéhôva.”

¹² Sita éziñ a saé Béthel a jô na: “Bobejañ béziñ ba kôme buni na minkoé mise mia jeñ aluk, nge ke na mia jeñe fane ya yene môte be ne luk éyoñ ése ba sulan a bobejañe bevok. Môs éziñ me nga ke bo ésaé tisone fe, e viane kui na a mbe fe môs ésulan. Sita bia nye bi mbe na bia tabe a nga jô ma na, me ne kôme yiane bobejañ bebaé béziñ ya akônda dé. A nga jô fe ma na te ma tyelé nleme yôp amu a nji kômbô tindi ma na me luk. Ve nné ane bi nga kui Aba Éjôé, a nga kee ma vôme bobejañ bete be mbe asu na bia be be bi laan. Jam ve zu ndeñele bia bese belale!”

13. Mbamba éve’ela mbé minkoé mi nga ve sita éziñ?

¹³ Sita mfe a saé Béthel a jô na: “Ma kôme yeme bekpwa’a mefan be ne minkoé, ve be yeme’e wô’ô bôte mintaé, be bili mingume minsôñan, be nyume’e bebiene mam na be volô bôte bevok, be bo’o ésaé jap a mevak, be too fe nya mfii asu akônda. Be bili mbamba été nsisim: Wo ye ke zu koone be be too éngôngol amu be ne minkoé, nge yene be be bo’o éngelezek amu mbamba be mam éto nkoé ja soo be.” Ngo’o abime mvaé bia wôk éyoñ bi ne avale akônda môt ase a semé nyô mbok. Amu wo yeme na bobejañ be nji kômbô wo nge wô’ô wo éngôngol, ba vañe ki sa’ale wo nge ke yene wo nkenge. Wo yeme jôme jia ve na, ba nye’e wo, abim ete.

14. Aval avé ô ne liti na wo semé minkoé?

¹⁴ Mojañ nge ke sita a ne nkoé a ye bo mevak nge wo nye’e nye amu mbamba mefulu mé. A lôte na ô wô’ô nye éngôngol amu a nji bo nlu’an, wo yiane se’e nye amu a ke ôsu a kabetane Yéhôva. Nalé a ye bo na a bo teke wô’ôtane ve ane wo jô nye na: ‘Me nji  yi wo.’ (1 Bec. 12:21) Ve a ye yeme na wo semé nye, a na wo yene mfi ya ésaé a bo akônda.

15. Mintyendane mivé bobejañe béziñ ba bo asu na be nene ésaé nkañete jap?

¹⁵ Mimbu mi ndeme lôte mi, abui bekañete mbamba foé e nga tyi’i na da yé’é mfefé nkobô mfa’a ya nene ésaé nkañete jap. Jam ete e ne sili na be bo bone mintyendane miziñ. Abui ya be be e nga kôlô mekônda map na da ke su’u ésaé vôm bekañete mbamba foé ba jemban, to’o jam ete e nga sili na be ke tabe akônda ya nkobô ô nji bo éngop. (Mam. 16:9) Bebien be nga nyoñe ntyi’an ôte amu be mbe be kômbô’ô telé Éjôé Zambe ôsu. Akusa bo é ne sili be abui éyoñ asu na be yeme kobô nkobô ya akônda ba te ke suk, ésaé jap ja wum abui bibuma. Ba yemete mbunane bobejañ a élate ya akônda amu be bili mbamba mefulu. Bia nye’e été nsisime bobejañ bete angôndô!

16. Bemvendé ba belane jé éyoñe ba fas nge mojañ a ne bo diakon nge ke mvendé?

¹⁶ Bemvendé be nji yiane jô na mojañ éziñ a yiane ki mbe’e diakon nge ke wu mvendé fo’o ve amu a tu’a ki yeme kobô nkobô ya akônda. Éyoñe bemvendé ba fas nge mojañ éziñ a ne be’e mimbe’e mite, Bible nnye ba yiane telé ôsu, sa ke nkobô ya akônda.​—1 Tim. 3:1-10, 12, 13; Tt 1:5-9.

17. Mam mevé menda me bôt ma yiane fas éyoñ ma tyi’i na ma ke tabe nlam ôfe?

¹⁷ Menda me bôte méziñ me nga tube minlame miap éko éziñ amu bita, nge ke amu ayet ényiñ. Nalé a wô’ô bo na bone bap be yé’é nkobô ya mfefé nlam ba te ke tabe amu ñwô ba ye belane wô sikôlô. To’o bebiaé fe ba yiane yé’é nkobô ôte asu na be yene bisaé tyi’ibi. Nge é bo ke na akônda ya nkobô wop ô ne nlam ôte, ntyi’an ôvé ba yiane nyoñ? Ye ba ye bo be tabe’e bisulan akônda ya nkobô wop nge ke akônda ya nkobô ya nlame be too?

18. Bela’ane Begalate 6:5 na ô liti aval avé bi ne semé mintyi’ane minlô ya menda me bôt mia nyoñ.

¹⁸ Nlô ya nda bôt ñwô wo tob akônda nda bôte jé ja ye tabe. Ve ôsusua na môt a nyoñe ntyi’an ôte, a yiane taté fase miñyiane mi bôte bese ya nda bôte jé. (Lañe’e Begalate 6:5.) Éyoñe ke ntyi’an ôte ô nyoñebaneya, bia bevok bia yiane wô semé, amu môt ase a yiane be’e mbe’e wé. Bi bili ve na bia kañese ntyi’ane wop a liti be nye’an.​—Bero. 15:7.

19. Minlô ya menda me bôt mia yiane taté kôme fas a ye’elan ôsusua na mia nyoñe ntyi’an ôvé?

 ¹⁹ Biyoñe biziñ, bebiaé ba tyi’i na nda bôte jap ja zu tabe bisulan akônda ya nkobô wop, a too ke na bone bap ba tu’a ke yeme kobô nkobô ôte. Nge sa ke nkobô ôte ñwô ba kobô si be too, e ne bo ayaé na bongô be yaé nsisim akônda ete amu ba tu’a ke wô’ô mame ba yé’é bisulan. Jam ete da boban amu sa ke nkobô bebiaé ñwô bongô ba belane wô sikôlô. Jé nlô ya nda bôt wo yiane bo éyoñ éte? Wo yiane kôme ye’elane Yéhôva na a ve wô fek asu na ô nyoñe ntyi’ane wo ye volô bone bé na be ke ôsu a kabetane Yéhôva. Bebiaé be ne tyi’i na ba tu’a ye’ele bone bap nkobô wop, nge ke na ba jiba ke tabe bisulan akônda ya nkobô bone bap ba kôme wôk. To’o ba nyoñe ntyi’an ôvé, bobejañe ya akônda be né ba yiane semé be a nye’e be.

20. Aval avé bi ne liti na bia semé bobejañ ba bibane na be yé’é nkobô wongan?

²⁰ Nlô ajô wu wo te volô bia na bi yem amu jé bia koon abui bobejañ da sutane yé’é nkobô ya mekônda mangan. E ne bo ayaé na be kôme kuli ôsimesane wop éyoñe ba kobô. Ve éyoñe bia bibane na bi wô’ô jôm ba jô to’o ba kobô émvos, bia ye yene na bobejañ bete ba nye’e Yéhôva nya abuii a na be bili nkômbane ya bo nye ésaé. Bia ye fe kui na bi semé be nge bia dañe fombô ve mbamba mefulu be bili. Bia ye ke jô be na ‘Me nji yi mia’ fo’o ve amu be nji yeme kobô nkobô wongan.

21-22. Dase fé Yéhôva a nga ve môt ase ya be bia?

²¹ Bia ve Yéhôva akéva amu a nga ve môt ase ya be bia beta das: mvome ya bo nye ésaé akônda dé. Bi kusa bo fam nge minga, nkoé nge lu’an, nnôm nge ke ésoé, to’o bia yeme kobô nkobô éziñ nge momo, bia bese bi ne édima mise me Yéhôva, a môt ase a ne mfi asu nyô mbok.​—Bero. 12:4, 5; Beco. 3:10, 11.

²² Ngo’o nge bia ke ôsu a tôñe miñye’elane Paul a nga ve bia éyoñ a nga nyoñ éve’ane ya bibu’a ya nyule môt. Nge bi bo nalé, bia ye jeñ a mezene mese na bi su’u bobejañ. A teke bisô na, bia ye tu’a nye’e be a semé be.