Yéhôva a nye’e éyoñ wo jô na “Amen”
YÉHÔVA a nye’e ékaña’a bia ve nye. A kôme “vô’ôlô” mam bebo bisaé bé ba jô, a nye’e mone jam ase be ne kobô mfa’a ya ve nye ôlu’u a duma. (Mal. 3:16) Bi tame zu kobô ajô mon éfia éziñ bi wô’ô jaé tot. Éfia évé? “Amen.” Mia simesane na Yéhôva a yen éfia éte aya? A nye’e a wô’ô éyoñe bia tote je. Amu jé bia jô nalé? Bi tame taté zu yene jôm éfia éte ja tinan a avale be wô’ô jaé zu ba belane je Bible?
“BÔTE BESE BA YE JÔ NA AMEN”
Éfia “amen” bia belane je nkobô bulu ja tinane na “é bo’o nalé,” nge ke na “mebôm!” Be mbe be bela’an éfia éte nkobô Hébreu na be liti na jam ba jô é ne ‘betotyii’ a na be ne ‘tabe de ndi.’ É mbe fe é kui na be belane je meba mejô. Éyoñ môt a maneya kane ngana, a mbe a yiane jô na “amen” mfa’a ya bo’olô na mam a te jô me ne été, a na, a kañese jam ese e ne kui nye nge a laa minsos. (Nb. 5:22) Éyoñ môt a mbe a jô’ô “amen” ate bôt été, nalé a mbe a va’a nye éva’a ya bo ve aval a jô.—Néh. 5:13.
Bia koone mbamba éve’ela a liti avale be mbe be bela’an éfia “amen” melu mvuse kalate Deutéronome kabetôlô 27. Éyoñ bon b’Israël be nga nyiine Si ya ntiñetan, be nga sulane Nkôl Ébal a Nkôle Garizim asu na be vô’ôlô ane ba lañ Atiñ. Ve be nji sulane ve na ba zu vô’ôlô, be nga zu fe na ba zu me’ete na be ne tyiñ a mam mese Atiñe e mbe e jô’ôk. “Amen” be nga yôtane môs ôte nnye a nga bo’olô na ba kañese na biyo’é bise be ndeme mane lañe bi kui be nge ba tyam Atiñ. (Deut. 27:15-26) Tame ve’ele bo ve ane wo wô’ô ane betoyini be bôt, befam, binga, a bongô, bese ba yôtane tyiñe jia na: “Amen!” (Jos. 8:30-35) Bi ne ve’e fe’e na bôte bete be nji vuan amen be nga jô môs ôte. Be nga tôé fe njôane wop amu nkañete wo jô na: “Israël a nga bo Yéhôva ésaé melu mese Josué a nga too, a melu mese ya bemvendé be nga li’i éyoñ Josué a nga wu, mbe be nga yem ésaé ése Yéhôva a nga bo Israël.”—Jos. 24:31.
Yésus fe a nga belan éfia amen na a liti na mam a mbe a jô’ô me ne betotyii, ve nye a nji be a bela’ane je ane bone b’Israël. Nye a mbe ki a jô’ô “amen” na a me’ete jam éziñ, a mbe a viane belan éfia “amen” (be nga kôñelane je Bible bulu na “ma bele”) éyoñ a mbe a taté’é nkobô. Éyoñ ki bia koone bifia “ma bele fo’o” Bible bulu, nalé a tinane na Yésus a ba’alane “amen” biyoñ bibaé ôsusua na a taté nkobô. (Mt. 5:18; Jean 1:51) A mbe a bo’o de asu na bôte ba vô’ôlô nye be tu’a tabe mejô mé ndi. Yésus a mbe ngule ya kobô nalé amu nnye Zambe a nga tobe na a tôé bengaka’a Bé bese.—2 Bec. 1:20; Nli. 3:14.
“BESE BE NGA JÔ NA AMEN, A SE’E YÉHÔVA”
Bon b’Israël be mbe fe be bela’an éfia amen éyoñ ba sulane na ba ye’elane a ve Yéhôva duma. (Néh. 8:6; Bs. 41:13) Éyoñ bôte be mbe be dibi’i meye’elan be jô’ô na “amen,” be mbe be liti’i na ba kañese mam ba te jô meye’elane mete. Éyoñ meye’elane me maneya, môt ase a mbe ngule ya nyoñe ngab a ékaña’a a bu’ubane je. Nde é nga bobane nalé éyoñe Njôô bôte David a nga soo Éwolo élate Yéhôva Jérusalem. Éyoñ abô’ô é boba’an, David a nga bo angôndô ya édo’o meye’elan, meye’elane me too ane jia; bia koone me 1 Minkañete 16:8-36. Meye’elane mete me nga nambe bôt aval é ne na, “bese be nga jô na Amen, a se’e Yéhôva.” Amen ate a nga liti na ba wô’ô nya mvaé ya kañe Yéhôva fufulu.
Bekristene ya ntete mimbu ôsu fe be mbe be bela’an éfia “amen” asu ékaña’a. Ba be nga tili Bible be nga belane je bekalate bap. (Bero. 1:25; 16:27; 1 P. 4:11) Kalate Nlitane fe a kate bia na bebo bisaé be Yéhôva be ne yôbe ba ve Yéhôva ôlu’u be jô’ô na: “Amen! Alléluia!” (Nli. 19:1, 4) Bekristene be mbe fe be jô’ô na “amen” ésulan, éyoñ meye’elane me maneya. (1 Beco. 14:16) Ve a nji be éfia be mbe be ba’alane je na be jalé ngum abendé.
AMU JÉ “AMEN” A NE MFI?
Éyoñe ji, bi ntoo ve wô’ô amu jé e ne nya mfii na bi dibe meye’elan a éfia “amen.” Éyoñ biabebien bia mane meye’elane mangan a éfia éte, bia liti na bi too ndi a mam bia te jô. Wônaa, éyoñ bia jô na “amen” éyoñ môte mfe a ye’elan, bia liti na bi ne tyiñe jia a mam mese a te jô, to’o bia jô amen ate ve nlem été. Entame beta yenané amu jé bia yiane bo bi jô’ô na “amen.”
Bia tabe ntyel éyoñ ba bo meye’elan. Mam bia jô a mam bia bo éyoñ ba bo meye’elan me ne ngabe jia ya ékaña’a bia ve Yéhôva. Mbôle bi nji kômbô jô “amen” ve biyaé bi anyu, bia yiane kôme baa alo éyoñ ba ye’elan, teke jô’é na asimesane dangan é ke vôme mfe.
Bia kañe Yéhôva bi too nlatan. Nté mojañ a ye’elan ôsu, bia be bobejañ bevo’o bia vô’ôlô nye a nleme wua. (Mam. 1:14; 12:5) Éyoñ bia be be bia jô “amen” a tyiñe jia, élate jangane ja tu’a yem. Bi kusa jô “amen” ate nlem été, nge ke yôtane nye yôb été, éyoñ bia jô nye fufulu, Yéhôva a tu’a bi nkômbane ya yalane meye’elan me akônda ese.
Bia ve Yéhôva duma éyoñ bia jô na “amen”
Bia ve Yéhôva duma. Yéhôva a biasé ki mone jam ase bia bo asu na bi kañe nye. (Luc 21:2, 3) A yem mam mese me ne bia minlem été. To’o bia vô’ôlô ésulane téléphone, bi ne tabe ndi na Yéhôva a vô’ôlô “amen” wongan. A kô’ôlane nye a nyi bobejañe bese bevok ba te jô.
Bi ne biasé “amen” bia jô, ve éfia éte é ne angôndô ya mfi mise me Yéhôva. Encyclopédie éziñ a fase mame ya Bible a jô na: ‘Mon éfia ate étam a liti na nlem bebo bisaé be Zambe ô ne njalan a ndi nlem a mebune na Zambe é vô’ôlô be.’ Ngo’o nge “amen” ase bia jô a bo na Yéhôva a muñ!—Bs. 19:14.
