ASU AYÉ’É 19
JIA 22 Éjôé é tebeya—É za’ak!
Jé bia yem a lat a avale Yéhôva a ye tyi’i bôte mejô melu ma zu?
“Yéhôva . . . a nji yi na môte wua a jañ.”—2 P. 3:9.
BETA BE MAME BIA ZU YEN
Bi ne tabe ndi na éyoñe Yéhôva a ye zu tyi’i bôte mejô ana’ana, mintyi’ane mejô mié mia ye bo zôsô.
1. Amu jé bi ne jô na bia nyiñ éyoñ é ne ngum aval?
BIA nyiñe biyoñe bi ne ngum aval. Môs ôse ya yôp, bia kôme yen ane minkulane mejô ya Kalate Zambe mia tôébane bia mis été. Éve’an é ne na bia yen ane “njô bôte ya nord” ba “njô bôte ya sud” ba wosan amu môt ase ya be be a kômbô jôé émo. (Dn. 11:40.) Bia yen ane mbamba foé ya Éjôé Zambe a katebane si ése, a bemilion be bôte ba nyoñe ntyi’ane ya zu kañe Yéhôva. (Ésa. 60:22; Matt. 24:14) Bi bili fe abui bidi ya nsisime “mbamba éyoñ.”—Matt. 24:45-47.
2. Jé bia yiane tabe je ndi, ve jé bia yiane ba’ale?
2 Yéhôva a ke ôsu a volô bia na bi tu’a wô’ô beta be mame ba zu boban ana’ana. (Mink. 4:18; Dn. 2:28) Bi ne tabe ndi na ôsusua na beta étibila’a a taté, bia ye bo bi nga yeme mame mese ma ye volô bia na bi ke ôsu a kañe Yéhôva bi too nlatane mbia biyoñe bite. Ajô te bia yiane ba’ale na bi nji yeme mame mese ma ye bobane melu ma zu. Ayé’é di, bia zu taté yen amu jé bi nga tyendé bone be mame béziñe melu mvus a lat a mame ma ye bobane melu ma zu. Mvuse ya valé, bia ye yene mame méziñe bi nga yem a lat a melu ma zu a mam Ésa wongane ya yôp été a ye bo.
MAME BI NJI YEM
3. Jé bi nga jô a lat a éyoñe Yéhôva a ye ke beta ve bôte fane ya zu nyiine nsamba bebo bisaé bé, a jé é nga tindi bia na bi simesane nalé?
3 Melu mvuse bi mbe bi ye’ele na éyoñe beta étibila’a a ye taté, môt éziñ a ye beta bi fane ya zu nyiine nsamba bebo bisaé bé. Bi mbe bi ye’ele nalé amu bi nga simesane na, mame mese me nga boban éyoñe ya ndône mendime me mbe ndeme ya mame méziñe ma ye bobane melu ma zu. Éve’an é ne na, bi mbe bi simesane na aval ane Yéhôva a nga fete mbé ya arche ôsusua na ndône mendime ja taté, avale te fe a ye “fete mbé” ya mbia nta’ane mame ya émo Satan ji ôsusua na beta étibila’a a taté, a môt éziñ a ye beta bi fane ya bo mame ma sili asu na a bi ényiñ.—Matt. 24:37-39.
4. Amu jé bi nji yiane simesane na mame mese me nga bobane melu me Noé me ne ndeme ya mame ma ye bobane melu ma zu? Timi’in.
4 Ye é ne mvo’é na bi simesane na mame mese me nga boban éyoñe ya ndône mendime me ne ndeme ya mame ma ye bobane melu ma zu? Éyalan é ne na momo. Amu jé bia jô nalé? Amu Kalate Zambe a nji ye’ele de. a É ne été na Yésus a nga ve’e “melu me Noé” a nsoone Mone môt, ve a nji jô na mame mese me nga bobane melu me Noé ma ye fe tôébane melu ma zu aval ane éyoñe Yéhôva a nga fete mbé ya arche. Ve nalé a nji tinane na nkañete Noé a ndône mendim ô se ngule ya ve bia miñye’elane miziñ.
5. (a) Aval avé Noé a nga liti na a bili mbunan ôsusua na ndône mendime ja so? (Behébreu 11:7; 1 Pierre 3:20) (b) Mfa’a ya ésaé nkañete, aval avé été jangane ja funane ji Noé?
5 Éyoñe Noé a nga wô’ô ntyi’ane Yéhôva a nga nyoñ, a nga liti na a bili mbunan éyoñ a nga lôñ arche. (Lañe’e Behébreu 11:7; 1 Pierre 3:20.) Avale te fe, bôte ba wô’ô mbamba foé ya Éjôé Zambe ba yiane liti mbunane wop a zene ya mimboone mi mame miap. (Mame mi. 3:17-20) Pierre a nga loone Noé na “nkate foé ya zôsô.” (2 P. 2:5) Ve avale bi nga yen ayé’é ya mvus, bi nji yeme nge Noé a nga mane kate môt ase a mbe si va mbamba foé ôsusua na ndône mendime ja taté. Dene bia nyoñe ngap a ésaé nkañete ja bobane si ése meku’u menyin, a bia ve ngule ya bo je a ayôñ ése. Ve to’o bia ve abime ngul avé, bi vo’o kui na bi mane kañete môt ase a nyiñe si va ôsusua na asu’ulane da so. Amu jé bia jô nalé?
6-7. Amu jé bi ne jô na bi vo’o mane kañete môt ase a nyiñe si va mbamba foé ya Éjôé ôsusua na asu’ulane da so? Timi’in.
6 Tame yene jame Yésus a nga jô a lat a ésaé nkañete jangan. A nga jô na mbamba foé ya Éjôé Zambe a ye kañetebane be “bôte bese ya si, mfa’a ya bo meyoñe mese ngaa.” (Matt. 24:14) Nkulan ajô ôte wo tôébane melu ma aval ô ngenane teke tame tôéban éyoñ éziñ. Mbamba foé ya Éjôé Zambe a katebaneya e lôte minkobô 1000 a abui bôte ya si nyi é ne ngule ya wô’ô foé éte a zene ya anjeñe mefoé dangane jw.org.
7 Yésus a nga jô fe beyé’é bé na ba ye ke mane “bômane bitisone bise,” nge ki kañete môt ase ôsusua na a so. (Matt. 10:23; 25:31-33) Mejô me Yésus mete ma tôébane fe melu ma. Bemillion be bôte ba nyiñe mesi ba tyili ésaé nkañete jangan. Nde fe abui bôte da bialé nnutan ôse. Bia ve ngule jangan ése asu na bi kañete bôte ya “meyoñe mese, e menda me bôte mese a nkobô ôse” mbamba foé ya Éjôé Zambe. (Nlitan 14:6) Ve nya ajôô a ne na, bi se ngule ya kañete môt ase ya si nyi ôsusua na asu’ulane da so.
8. Minsili mivé bi ne sili a lat a avale Yéhôva a ye tyi’i bôte mejô melu ma zu? (Fombô’ô fe befôtô.)
8 Minsili mi ne ñhe na: Bôte ba ye ke kui na be wô’ô mbamba foé ya Éjôé ôsusua na beta étibila’a a taté ba ye tebe été évé? Jé Yéhôva ba Mone wé a nga ve ôva’a ngule ya tyi’i bôte mejô ba ye bo asu dap? (Jean 5:19, 22, 27; Mame mi. 17:31) Aval éfuse ja wulu a ayé’é ji ja liti, Yéhôva “a nji yi na môte wua a jañ.” Ve a yi na “bôte bese be kôñelane minlem.” (2 P. 3:9; 1 Tim. 2:4) Bi kusa yeme nalé, ve Yéhôva a ngenane teke kate bia aval a ye tyi’i bôte ba ye bi fane ya wô’ô mbamba foé mejô. Nde fe, a nji bo ntindane ya kate bia mame mese a nga bo a ma a ye bo.
Été évé Yéhôva a ye telé bôte ba ye ke bi fane ya wôk mbamba foé ôsusua na beta étibila’a a taté? (Fombô’ô abeñe 8) c
9. Jé Yéhôva a nga kate bia Kalate Zambe?
9 Yéhôva a nga kate bia mame méziñ a ye bo e Kalate wé. Éve’an é ne na, Kalate Zambe a kate bia na Yéhôva a ye wômôlô “bikotekote” bi bôte bi nji bi fane ya yeme benya mejôô a tyendé mbia mefulu map. (Mame mi. 24:15; Luc 23:42, 43) Jam éte da bo na beta minsili mife mi bômbô.
10. Minsili mivé mife bi ne sili?
10 Ye bôte bese ba ye wu éyoñe ya beta étibila’a ba ye ke ékeké, teke fe ndi nleme ya wômô? Kalate Zambe a kate ne sañesañe na bôte Yéhôva a nkane bita wé ba ye wôé Armaguédon ba ye ke beta wômô. (2 Thes. 1:6-10) Nge ke môt a wu beta étibila’a amu ôkon nge nnôm, nge amu na a te bo accident nge ke na amu ba te wôé nye, môt ate a ye tebe été évé? (Eccl. 9:11; Zach. 14:13) Ye a ye tebe été “bikotekote bi bôt” bia ye wômô mfefé émo? Bi ne jô tyi’ibi na bia yeme ki.
MAME BIA YEM
11. Jam avé Yésus a ye fombô éyoñe a ye tyi’i bôte mejô Armaguédon?
11 Bia yem abui mame da ye bobane melu ma zu. Éve’an é ne na, bia yeme na éyoñe Yésus a ye tyi’i bôte mejô Armaguédon a ye fombô avale be nga nyiñ a bobenyañe bé. (Matt. 25:40) Bôte be nga su’u miñwo’on a Krist mbe ba ye bo mintômba. Bia yeme fe na bobenyañe be Krist béziñe be ne miñwo’one ba ye bo be ngenane si va éyoñe beta étibila’a a ye bo a tatéya, ba ye ke yôp fo’o ve mone éyoñ ôsusua na bita ya Armaguédon bia taté. Nté bobenyañe be Yésus be ngenane si va, éko éziñe bôte be bili mbamba été nsisime be ngenane be bili fane ya su’u be a su’u fe ésaé ba bo. (Matt. 25:31, 32; Nlitan 12:17) Amu jé é ne mfi ya yeme mame mete?
12-13. Éyoñe bôte béziñe ba ye yen ane “beta Babylone” a tyamban, jé be ne bo? (Fombô’ô fe befôtô.)
12 To’o éyoñe beta étibila’a a ye bo a tatéya, é ne kui na bôte béziñe ba ye yene ane “beta Babylone” a tyambane be beta simesane mame Bengaa be Yéhôva be nga jaé kañete be. Ye bôte ba ye yene beta be mame bete be ne beta tyendé asimesane dap a zu nyiine nsamba bebo bisaé be Yéhôva?—Nlitan 17:5; Ézé. 33:33.
13 Nge avale jam éte da boban, da ye funane jam é nga kui Égypte melu me Moïse. Simesa’ane na beta nsamba bôt a nga tôñe bone be Israël éyoñe be nga kôlô Égypte. Éko éziñe bôte béziñe ya été be nga taté na ba buni Yéhôva éyoñe be nga yene bibubua awôme Moïse a nga jô bie bi boba’an. (Nkôl. 12:38) Nge avale jam éte da kui éyoñe beta Babylone a maneya tyamban, ye jam éte da ye ndeñele bia na bôte be beta zu nyiine nsamba wongan a too ki na Armaguédon a nga zu taté, a bi fane ya zu nyiñe mfefé émo? Momo! Bia kômbô vu Ésa wongane ya yôp été, “Zambe ya éngôngo a mvam, ôte’ete’e ya yaa, a bili abui mvam a benya mejôô.” b—Nkôl. 34:6.
Éko éziñ bôte béziñe ba ye yen ane “Beta Babylone” a tyambane ba ye simesane na Bengaa be Yéhôva be nga jaé kobô jam éte (Fombô’ô abeñ 12-13) d
14-15. Ye vôme môt a nga wu a éyoñe a nga wu bi ne ve nye fane ya bi ényiñe ya melu mese? Timi’in. (Besam 33:4, 5)
14 Biyoñe biziñe bi wô’ô wôk bôte be jô’ô na: “Nge ve ma ma, évuvumane jam é jibi wu ôsusua na beta étibila’a a taté asu na é bi ndi nleme ya wômô.” É ne été na môt a jô avale bifia éte a bili mbamba nlem. Ve sake éyoñe môt a wu nje ja bo na a bi ndi nleme ya wômô. Yéhôva a ne Ntyi’i mejô a ne teke kop, mintyi’ane mejô mié mi ne éyoñ ése zôsô. (Lañe’e Besam 33:4, 5.) Bi ne tabe ndi na “Ntyi’i mejô ya si se” a ye bo jam é ne zôsô.—Mett. 18:25.
15 Da kôme wô’é melo na sake vôme môt a too nnye a ye bo na a bi ényiñe ya melu mese. Yéhôva a vo’o ve’ele tyi’i bemillion be bôt ajô na be ne “bikela” a too ke na ba nyiñe mesi be nji bi fane ya wô’ô foé ya Éjôé. (Matt. 25:46) Ntyi’i mejô ya si se a wô’ô bôte bete mintaé a dañe abime bia wô’ô be mintaé. Bi nji yem avale Yéhôva a ye wulu mam éyoñe ya beta étibila’a. Éko éziñe bôte béziñe ya nsamba bôt ôte ba ye bi fane ya yeme Yéhôva, a buni nye, a tebe ngame jé éyoñ a ye fubu éyôlé jé zañe meyoñe mese ya si.—Ézé. 38:16.
Éyoñe beta étibila’a a ye taté, . . . ye bôte béziñe ba ye yene mame ma ye bobane ba ye tyendé?
16. Mame mevé bia yem a lat a Yéhôva? (Fombô’ô fe fôtô.)
16 Ayé’é ya Kalate Zambe dangan é nga volô bia na bi kôme yem abim avé Yéhôva a nyan ényiñe mona môt. A nga ve ényiñe Mone Wé asu na bia bese bi bi fane ya nyiñe nnôm éto. (Jean 3:16) Bia bese bi nga wô’ôtane nye’ane Zambe. (Ésa. 49:15) A yem éyôlé môt ase ya be bia. A yeme môt ase ya be bia aval é ne na nge bia wu a ne ngule ya beta wômôlô bia, amu a yeme bone be mame bese be tii a binyiñe biangan a mame mese bi mbe bi simesan. (Matt. 10:29-31) Ajô te, bi bili benya beamu ya tabe ndi na Ésa wongane ya yôp été a nye’e bia a ye tyi’i môt ase ya be bia mejô zôsô été amu a ne fek, zôsô a nkoon éngôngol.—Jacq. 2:13.
Bi ne tabe ndi na Yéhôva a ye tyi’i môt ase ajô avale da yian amu a ne Zambe ya zôsô, a nkoon éngôngol (Fombô’ô abeñ 16)
17. Mame mevé bia ye yen ayé’é da zu?
17 Mfefé ñwôane mame bi ndôme bi ayé’é di wo volô bia na bi kôme yeme na dene nnye bia yiane tu’a kañete a ayôñ ése. Amu jé bi ne jô nalé? Jé ja tindi bia na bi ke ôsu a kañete a évak ése? Bia ye bi biyalane ya minsili mite ayé’é da zu.
JIA 76 Wo wô’ôtan aya éyoñe wo kañete?
a Asu na ô tu’a yem amu jé mintyendane mite mi nga boban, ô ne fombô nlô ajô ô ne na “Tu as trouvé bon d’agir ainsi” Nkume mmombô a bete ya Ngone lale é too melu 15, mbu 2015, af. 7-11.
b Éyoñe Beta Babylone a ye tyamban, bebo bisaé be Yéhôva bese ba ye tebe meve’ele été éyoñe Gog môte ya Magog a ye zu wosane be. Bôte bese ba ye bo ngame Zambe éyoñe Beta Babylone a ye bo a maneya tyambane ba ye fe tebe meve’ele été.
c FÔTÔ: Befôtô belal ba liti amu jé bôte béziñe be vo’o kui na be wô’ô mbamba foé bia kañete si ése: (1) Minga a ngenane teke wô’ô benya mejôô môs éziñ amu a nyiñe si bekristene ba jemban, nge Ngaa Yéhôva ja kañete si éte é ne télé ébiene mbia été, (2) Ngale ba nnôme be ngenane teke wô’ô benya mejôô éyoñ éziñ amu bijôé bia tyili ésaé nkañete vôme ba nyiñ, a môt a bo je a telé émiene mbia été (3) Ndôman éziñe ja nyiñe vôme bôte be vo’o ji’a kui.
d FÔTÔ: Ésoé minga é nga kôlô benya mejôô ja simesane jam é nga yé’é a lat a ntyamane “Beta Babylone.” A bulane be bebiaé bé be ne bebo bisaé be Yéhôva. Nge avale jam éte da bobane bia yiane jeñe na bi vu mefulu me Ésa wongane ya yôp été a ne nkoon éngôngol, a mvam, a vak a mbo abé a te bulane mvus.
