YE É kuiya wo na éyoñ ô tele minjuk été ô wô’ôtane na ô ne étam? “Biyoñe bi ne ayaé a nju’u ya nyiñe” bia bo bia na bi jañele ava’a dangan a na bi kandane fe a bôte bevok. (2 Tim. 3:1) Ve, éyoñe bi ne minjuk été bôte béziñe be ne bia volô. Kalate Zambe a jô na é ne mfi ya bi benya bemvôé éyoñe ya “njuk.”—Mink. 17:17.

Éyoñe nlômane Paul ô nga ke bo ésaé nkañete jé a bemvôé bé, be nga volô nye abui mezen. (Col. 4:​7-11) Éyoñe Paul a nga ke mimbô’ô Rome, bemvôé bé be nga volô nye, be nga bo mam a mbe a kate’e bo. Éve’an é ne na, Épaphrodite a nga sili Paul nge a ne ke jome bobejañ a besita ya Philippes señe jé. (Philip. 4:18) Tychique a nga ke ve bekalate Paul a nga tili bikôane bekristen asu na a ve bie ngule nyul. (Col. 4:7) Amu bemvôé bé be nga volô nye, Paul a nga ke ôsu a volô bikôane bekristen, akusa bo a mbe nda jé teke na a ne kui nseñ amu bezimbi be mbe be ba’ale’e nye, akekui éyoñ a nga ke nda mimbôk. Aval avé ô ne bo nya mvôé den?

Melu ma, bi bili mbamba bive’ela bi bobejañ a besita ba liti na be ne benya bemvôé. Bi tame yen éve’ela Élisabeth a ne nkpwa’a mefane ya ayap éyoñ Espagne. A kate bia aval avé sita éziñ, mvôé jé é nga volô nye éyoñ a nga tôbane minjuk. Éyoñe be nga bi nyia Élisabeth cancer, mvôé jé é nga tili nye abui bekalate é nga ve nye ngule nyul, amu bifuse ya Kalate Zambe bi mbe été. Élisabeth a jô na: “Bekalate bete be nga ve ma ngule ya nyiñe môs ôse teke wô’ôtane na me ne étam.—Mink. 18:24.

Bi ne liti na bi ne benya bemvôé éyoñe bia volô bobejañ a besita na be nyoñe ngap ésaé nkañete a ntabane bisulan. Éve’an é ne na, ye bi ne ngule ya volô bobejañ a besita be ntoo minnôme na be tabe bisulan a na be nyoñe ngap ésaé nkañete? Nge bi bo mame mete mese bia ye veane ngule nyul, môt ase a va’a nyu mbo’o ngule nyul. (Rom. 1:12) Ve, abui bekristen é too menda map é vo’o ki beta kui nseñ. Nde ñhe aval avé bi ne bo benya bemvôé asu dap?

Abui bobejañ a besita bangane da kate tabe bisulane Meba me Éjôé amu é bili ngul ôkon. Tame yen éve’ane mojañe David, nnye ate be nga bi cancer. Tañe ngon ésaman a nga bo Chimiothérapie. Nté ôte ôse ba minga wé Lydia be mbe be tabe’e bisulan a zene ya vidéoconférence.

Aval avé bobejañ a besita ya ékôane bekristene be nga volô be? E memane ya ésulan ése, bobejañ a besita be mbe be tabe’e Aba Éjôé, be mbe be va’a ngul ése na be laan a be. A fe na, éyoñe David ba Lydia be mbe be va’a biyalane bisulan,  bobejañe be mbe be se’e be, be jô’ô be na biyalane biap bia ve be ngule nyul. Jé David ba Lydia be nga wô’ôtan? Be nga su’ulane nye’e bobejañ a besita nya abuii.

Aval avé bi ne ngule ya volô bobejañ a besita bangane be bili ke ngule ya kôlô menda map na be nyoñe ngap ésaé nkañete? Ô ne bo bone mintyendane nta’ane mame wôé, asu na ô kañete a be, nalé a ye liti na wo vuane ke be. (Mink. 3:27) Éko éziñ, mi ne tili bekalate nge ke kañete a zene ya téléfôn. Bemvendé be ne bo nta’ane mam asu na bôte be nji bi ngule ya kui menda map be tabe bisulane ya nkañete a zene ya vidéoconférence. David ba Lydia be nga nye’e nta’ane mam ôte. David a jô na: “E taté ésaé nkañete a bone minlañ a meye’elan, a mbe a va’a bia ngule nyul abui.” Biyoñe biziñ, ye ô ne kañese na mia môte mia bo ayé’é mi ke de bo vôme mojañe nge ke sita a bili ki ngule ya beta kui nda jé?

Éyoñe bia yeñ a bobejañ a besita be too menda, bia tu’a yeme mbamba mefulu map a bo benya bemvôé bap. Ô ne bi mimfefé bemvôé éyoñe wo volô bobejañ a besita ésaé nkañete a ntabane bisulan.—2 Cor. 6:13.

Éyoñe Paul a mbe a tôbane minjuk, mvôé jé Tite é nga zu jôme nye, a jam éte é nga volô Paul na a yene na a nji ke bo étam. (2 Cor. 7:​5-7) Nkañete ôte wo volô bia na, bi volô bobejañe sa ke a bifia étam, ve bi jeñe mezene mese na bi volô be a mimboon.—1 Jean 3:18.

Bobejañ a besita ya Russie ba liti bia mbamba éve’ela avale bi ne volane bia bia. Tame yene jam é nga kui Sergey ba minga wé Tatyana. Éyoñe bezimba be nga vune nda jap, be nga bi be a kee be wofise wop asu na be ke sili be minsili. Mvuse ya valé, be nga taté suu Tatyana. Sergey a jô na: “Ôsusua na [Tatyana] a kui nda, ôdidi’i sita ô nga zu jôme nye. Mvuse ya valé, bobejañ a besita be nga so a zu volô nye na be beta ta’a nda jangan.”

Sergey a beta jô na: “Ma nye’e kalate Minkana 17:17 a jô na: ‘Mvôé ja nye’e biyoñe bise; a monyañ a bialé amu njuk.’ Éyoñe ya étibila’a éte, me nga yi mvolane bobejañ angôndô ya abui. Jam éte é nga bo na me kôme tu’a wô’ô mejô me ne kalate Minkana 17:17 a yeme na bifia bite bi ne mebôm. Yéhôva a nga kôme ma ve bemvôé ba ve ma ngule nyul a ba volô ma.” a

Éyoñ ése bi tele minjuk été, bia yi mvolane wo so bia be bemvôé bangan, a bia ye dañe yi mvolan ôte éyoñe ya beta étibila’a. Emveané ngul ése na bi bo benya bemvôé éyoñe ji. 1 P. 4:​7, 8.