FUNANKƐW BƐ ƝININKALI MINNU KƐ
Yala ne ye mɔgɔ ye min bɛ a jɔyɔrɔ fa wa?
I yɛrɛ sɛgɛsɛgɛ!
Ne ye . . . tuma bɛɛ, tuma caman na, tuma dɔw la, walima ne tɛ o ye tuma si
mɔgɔ laadiri ye
dannamɔgɔ ye
mɔgɔ ye min bɛ kɛ lɛrɛ la
baarakɛla ye
mɔgɔ ye min bɛ a bolofɛnw labɛn ka ɲɛ
mɔgɔ ye min bɛ tɔw dɛmɛ
mɔgɔ ye jɛya ka di min ye
mɔgɔ ye min bɛ tɔw bonya
mɔgɔ ye min bɛ a janto tɔw la
Nin jogo ninnu bɛɛ cɛma, i bɛ jumɛn de waleya kosɛbɛ?
Ta’a fɛ ka o jogo waleya.—Filipekaw 3:16.
Nin jogo ninnu bɛɛ cɛma, i ka kan ka baara kɛ jumɛn de kan kosɛbɛ?
Kuma bɛna kɛ hakilina minnu kan sisan, olu bɛna i dɛmɛ ka baara kɛ o jogo in kan.
Ka kɛ mɔgɔ ye min bɛ a jɔyɔrɔ fa, o kɔrɔ ye di?
Mɔgɔ min bɛ a jɔyɔrɔ fa, o ye mɔgɔ ye min bɛ a ka sokɔnɔ baaraw, lakɔli baaraw ani sigida baaraw kɛ ka ɲɛ. A b’a dɔn ko a bɛ se ka ɲininka a ka ko kɛtaw la. O la, ni a ye filimankow kɛ, a bɛ sɔn k’a jɔ olu la, a bɛ yafa deli ani ka ko bɛɛ kɛ walasa ka o filimankow labɛn.
Bibulu b’a fɔ ko: “K’a masɔrɔ bɛɛ kelen-kelen na a yɛrɛ ka doni ta.”—Galasikaw 6:5.
Mun na ne ka kan k’a ɲini ka kɛ mɔgɔ ye min bɛ a jɔyɔrɔ fa?
Mɔgɔ min bɛ a jɔyɔrɔ fa, seko minnu bɛ o tigi fɛ, a bɛ baara kɛ ni olu ye ni hakilitigiya ye, mɔgɔw bɛ a bonya, k’a minɛ iko baliku ani ka yɛrɛmahɔrɔnya ni jɔyɔrɔw di a ma.
Bibulu b’a fɔ ko: “I ye mɔgɔ dɔ ye min bɛ se a ka baara la kosɛbɛ wa? O na baara kɛ masakɛ ye.”—Ntalenw 22:29.
Mɔgɔ min bɛ a jɔyɔrɔ fa, o ye mɔgɔ ye min bololabilalen don tuma caman na, wa a ka telin ka teri sɛbɛw sɔrɔ.
Bibulu b’a fɔ ko: “A’ ye mɔgɔw sɔn, mɔgɔw na aw sɔn”—Luka 6:38.
Mɔgɔ min bɛ a jɔyɔrɔ fa, o tigi bɛ wasa ni nisɔndiya sɔrɔ a ka baara kɛlen na, o b’a to a tɛ tigɛ a yɛrɛ la.
Bibulu b’a fɔ ko: “Mɔgɔw bɛɛ kelen-kelen ka u yɛrɛw taama cogo sɛgɛsɛgɛ. O cogo la, ni yɛrɛbonya yɔrɔ bɛ u fɛ, u na o sɔrɔ u yɛrɛw la.”—Galasikaw 6:4.
Ne bɛ se ka kɛ mɔgɔ ye min bɛ a jɔyɔrɔ fa ka ɲɛ cogo di?
Walasa k’i dɛmɛ ka nin ɲininkali jaabi, mɔgɔ dɔw ye kuma minnu fɔ, olu lajɛ duguma. O kuma ninnu cɛla, jumɛn de bɛ bɛn e hakilinata ma?
“A ka gɛlɛn kosɛbɛ n’i bangebaaw b’i minɛ iko den fitini min ka kan k’a fɔ a bɛ yɔrɔ min na ni u ye lɛrɛ kelen dɔrɔn kɛ ka sɔrɔ u ma i ye”—Kerri.
“Ni ne ni n’teriw ka kan ka bɔ ka taa yala, tuma caman na, ne bangebaaw tɛ baasi foyi ye o la.”—Richard.
“Ni ne ye n’filanw ye ka kow kɛ min ka di u ye, o la ne bɛ n’yɛrɛ ɲininka: ‘Mun na ne bangebaaw t’a to ne ka o ɲɔgɔn kɛ?’”—Anne.
“Tuma caman na, min ka di ne ye, ne bangebaaw b’a to ne ka o kɛ. U bɛ o yɛrɛmahɔrɔnya min di ne ma, ne bɛ u fo o la.”—Marina.
Kuncɛlikuma: Funankɛ dɔw bɛ yɛrɛmahɔrɔnya sɔrɔ joona ka bɔ u bangebaaw yɔrɔ, ka tɛmɛn dɔw kan. O danfara bɛ se ka bɔ mun de la?
Nin ye tiɲɛ kuma ye: “N’i bangebaaw y’a ye k’i bɛ ka kɛ dannamɔgɔ ye ka ta’a fɛ, u bɛ dɔ fara i ka yɛrɛmahɔrɔnya kan ka ta’a fɛ.”
Funankɛ fila minnu kofɔra san fɛ, olu hakilinaw filɛ nin ye:
Richard: “Waati dɔ kɔnɔ, ne bangebaaw tun ma d’a la ko ne bɛ se ka baara kɛ ni yɛrɛmahɔrɔnya ye ni hakilitigiya ye. Nka sisan, u dalen bɛ ne la bawo u ye yɛrɛmahɔrɔnya min di ne ma, ne ye baara kɛ ni o ye ni hakilitigiya ye. Ne bɛ taa yɔrɔ minnu na ani ne ni mɔgɔ minnu bɛ kɛ ɲɔgɔn fɛ, ne tɛ nkalon tigɛ olu ko la n’bangebaaw ye. Tuma caman na, ne b’a fɛ ka fɛn minnu kɛ, ne bɛ olu fɔ n’bangebaaw ye sani yɛrɛ u ka ne ɲininka.”
Marina: “Ne ye nkalon tigɛ n’bangebaaw ye siɲɛ fila de n’ka ɲɛnamaya bɛɛ kɔnɔ, wa a siɲɛ fila bɛɛ la u bɔra a kalama. Kabini o kɛra, ne bɛ tiɲɛ fɔ u ye tuma bɛɛ. Misali la, ni ne ka kan ka fɛn o fɛn kɛ, ne bɛ o fɔ u ye, wa ni ne bɔlen don, ne bɛ u wele ka u ladɔnniya. Sisan, u dalen bɛ ne la kosɛbɛ ka tɛmɛn fɔlɔ kan.”
I ka telin ka mun de kɛ fɔlɔ—sokɔnɔbaaraw walima ɲɛnajɛ?
Yala i b’a fɛ i bangebaaw ka i minɛ iko Richard ni Marina wa? O la i yɛrɛ sɛgɛsɛgɛ nin ko ninnu kan:
DU KƆNƆNA KOW
Sokɔnɔbaara minnu bɛ kalifa i ma, yala i bɛ olu kɛ ka ɲɛ wa?
I bangebaaw b’a ɲini i fɛ i ka kɛ so lɛrɛ min na, yala i bɛ o bato wa?
Yala i bɛ i bangebaaw ani i kɔrɔw ni i dɔgɔw bonya wa?
Nin ko ninnu bɛɛ cɛma, yala yɔrɔ dɔ bɛ yen, i ka kan ka baara kɛ min kan wa?
Bibulu b’a fɔ ko: “A’ ye aw bangebaaw kan minɛ”—Efesekaw 6:1.
I KA LAKƆLI KOW
Lakɔli baara minnu bɛ di i ma, yala i bɛ olu kɛ u waati la wa?
Yala i bɛ baara kɛ walasa ka nɔti ɲumanw sɔrɔ wa?
Yala kalan kɛli bolodacogo ɲuman bɛ i bolo wa?
Nin ko ninnu bɛɛ cɛma, yala yɔrɔ dɔ bɛ yen, i ka kan ka baara kɛ min kan wa?
Bibulu b’a fɔ ko: “Hakilitigiya bɛ mɔgɔ mara” (Waajulikɛla 7:12) I bɛ dɔnniya ɲuman min sɔrɔ lakɔli la, o bɛna i dɛmɛ ka dɔ fara i ka hakilitigiya kan.
I TƆGƆ
Yala i ye mɔgɔ laadiri ye i bangebaaw ani tɔw ɲɛkɔrɔ wa?
Yala i bɛ i ka wari mara cogo ɲuman na wa?
Yala i ye dannamɔgɔ ye tɔw ɲɛkɔrɔ wa?
Nin ko ninnu bɛɛ cɛma, yala yɔrɔ dɔ bɛ yen, i ka kan ka baara kɛ min kan wa?
Bibulu b’a fɔ ko: ‘A’ ye jogo kura don aw la’ (Efesekaw 4:24) I bɛ se ka baara kɛ i jogow kan walasa k’u fisaya ani ka tɔgɔ ɲuman sɔrɔ ka ta’a fɛ.
I bɛ se ka nin kɛ: Jogo dɔ sugandi i ka kan ka baara kɛ min kan. Mɔgɔ minnu bɛ o jogo in waleya ka ɲɛ, kuma olu fɛ walasa u ka laadilikanw di i ma. I b’a fɛ ka o jogo in waleya cogo kɛrɛnkɛrɛnnen minnu na, olu sɛbɛn ani ka i ka ɲɛtaaw jateminɛ kalo kelen kɔnɔna na. I sera ka cɛsiriw kɛ tuma min na, ani i dɛsɛra ka o kɛ tuma min na, olu sɛbɛn kayie dɔ kɔnɔ. Ni kalo sara, i ye ɲɛtaa minnu kɛ, olu jateminɛ.
