1. Kun minnu kama a ka ɲi an ka batise, olu dɔw ye jumɛnw ye?

 YALA Jehova Ala koo ka di i ye wa? Fɛɛn ɲuman minw bɛɛ b’i fɛ ale lo y’u d’i ma, hali i niin yɛrɛ. Yala i b’a fɛ k’a yira a la ko i b’a kanu wa? I be se k’o kɛ cogo fisaman min na, o ye k’i yɛrɛkun di a ma ani ka batize. O b’a to i be kɛ Jehova ka denbayamɔgɔ dɔ ye. O la, i sankolola Faa min kɛra i teri ye, ale bena i ɲɛminɛ ani k’a janto i la sabu i kɛra a ta ye (Zab. 73:24; Ezayi 43:1, 2). N’i y’i yɛrɛkun di Jehova ma ani ka batize, a be ɲɛnamaya banbali jigiya d’i ma.—1 Piyɛri 3:21.

2. An bɛna mun de ye nin barokun in na?

² Yala fɛɛn dɔ b’i bali ka batize wa? N’o lo, i kelen tɛ. Ka kɔn e ɲɛ, mɔgɔ miliyɔn caaman ye u tagamacogo ani u miiricogo yɛlɛma walisa ka se ka batɛmu saratiw dafa. Sisan, u be Jehova batora ninsɔndiya la ni kisɛya ye. Mɔgɔ minw batizera saan kɛmɛkulu fɔlɔ la, i be se ka kalan jumanw sɔrɔ olu dɔw koo la? An k’a filɛ u ye gwɛlɛya minw sɔrɔ ani an be kalan minw sɔrɔ u fɛ?

SAMARIKAW BATISERA

3. Sani ka batise, Samarika dɔw ye gɛlɛya jumɛnw de kun?

³ Yezu ka wagati la, Samarikaw tun be diinan jɛnkulu dɔ kɔnɔ. U fanba tun siginin be Samari ani Sisɛmu gɛrɛfɛduguw la, Zude mara saheli fan fɛ. Samarikaw tun ka ɲi ka sɔn Ala ka Kuma bɛɛ la ani k’a ɲini ka koo caaman faamu a kɔnɔ ka  sɔrɔ ka batize. Bibulu be daminɛ ni kitabu duuru minw ye, k’a ta Zɛnɛzi ka taga a bila Deteronɔmu, u tun b’a jati ko olu dɔrɔn lo bɔra Ala yɔrɔ. N’a sɔrɔ u tun be Zozuwe ka kitabu fana jati o cogo la. Nka u jigi tun b’a la ko Masiya bena na ka kɛɲɛ ni Ala ka layidu ye min be sɔrɔ Deteronɔmu 18:18, 19 kɔnɔ (Zan 4:25). Walisa ka batize, u tun ka ɲi ka sɔn a ma ko Yezu lo ye Masiya ye layidu tara min koo la. Samarika “caaman” y’o lo kɛ (Zan 4:39). Samarika dɔw tun tɛ ni miiriya ɲuman ye Yahutuw koo la. O kama, u tun ka ɲi k’u ka miiriya yɛlɛma sabu kerecɛn fɔlɔw fanba tun ye Yahutuw lo ye.—Luka 9:52-54.

4. Ka kɛɲɛ ni Kɛwalew 8:​5, 6, 14 ye, tuma min na Filipe ye Samarikaw waaju, u dɔw ye mun de kɛ?

⁴ Mun lo y’a to Samarikaw batizera? Tuma min na waajulikɛla Filipu ye “Ala ka Mɔgɔ wolomanin” kofɔ Samarikaw ye, u dɔw “sɔnna Ala ka kuma ma.” (Kɛwaliw 8:5, 6, 14 kalan). Hali k’a sɔrɔ Filipu tun ye Yahutu ye, u sɔnna k’a lamɛn. N’a sɔrɔ u hakili jigira vɛrise dɔw la, minw b’a yira ko Ala tɛ mɔgɔ bɔ mɔgɔ la (Deter. 10:17-19). A mana kɛ min o min ye, Filipu ye min fɔ u ye Krista koo la, u y’o “lamɛn kosɔbɛ” ani u sɔnna a ma ko Ala be n’a ye. Filipu ye kabako caaman kɛ fana i n’a fɔ ka banabagatɔw kɛnɛya, ani ka jinaw gwɛn ka bɔ mɔgɔw la.—Kɛw. 8:7.

5. An bɛ kalansira jumɛnw de sɔrɔ ka bɔ Samarikaw ka misali la?

⁵ Samarikaw tun tɛ ni miiriya ɲuman ye Yahutuw koo la ani u tun tɛ bɛrɛ lɔn Ala ka Kuma kɔnɔ. O koow tun be se k’u bali ka ɲɛtaga kɛ Alako ta fan fɛ. Nka u m’a to o k’u bali. Tuma min na Samarikaw lara a la ko Filipu be min fɔra u ye ko o ye tiɲɛn lo ye, u ma koow bila ka suma, u sinna ka batize. Bibulu b’a fɔ ko: “Filipu nana Yezu ka kibaru diman ni Ala ka masaya sigiko fɔ u ye minkɛ, u lara Yezu la. Filipu y’u batize, cɛɛ fara musow kan.” (Kɛw. 8:12). Yala i lanin b’a la ko Ala ka Kuma ye tiɲɛn lo ye wa? I lanin b’a la ko Jehova Seerew tɛ mɔgɔ bɔ mɔgɔ la ani ko u be ɲɔgɔn kanu i ko a ɲininin be kerecɛn sɔbɛw fɛ cogo min na wa? (Zan 13:35). N’o lo kana siran ka batize. La a la ko Jehova bena i duga.

6. Ruben ka misali bɛ se k’i dɛmɛ cogo di?

⁶ Ruben be bɔ Alemaɲi ani a bangebagaw y’a lamɔ tiɲɛn sira kan. Nka a kanbele tuma na, a tun lanin t’a la ko Ala be yen tiɲɛn tiɲɛn na. Mun lo y’a dɛmɛ ka la a la ko Ala be yen tiɲɛn na? A y’a faamu ko a tun tɛ bɛrɛ lɔn o koo la. O kama a y’a latigɛ ka sɛgɛsɛgɛri kɛ. A ko: “N’ ka kelenna kalan na, n’ ye daliluw ɲini minw b’a yira ko Ala be yen tiɲɛn na. Kalan min ye ko bɛgɛnw lo yɛlɛma yɛlɛmana ka kɛ mɔgɔw ye, n’ ye sɛgɛsɛgɛri kɛ siɲɛ caaman o koo la.” A ye gafe nin kalan: Y a-t-il un Créateur qui se soucie de vous ? O gafe ye Ruben dɛmɛ kosɔbɛ. A y’a fɔ a yɛrɛ ye ko: “Jehova be yen tiɲɛn tiɲɛn na dɛ!” Tuma min na Ruben tagara an ka sigiyɔrɔsoba filɛ, a diyara a ye kosɔbɛ k’a ye ko Jehova Seerew kaan bɛnnin lo duniɲa kuru bɛɛ kɔnɔ. A kɔsegira Alemaɲi ani a batizera a saan 17. I ye min kalan Bibulu kɔnɔ, n’i be sigasigara o koo la, sɛgɛsɛgɛri kɛ an ka gafew kɔnɔ. “Lɔnniya” sɔbɛ barika la, i be se ka see sɔrɔ i ka sigasigali kan (Efɛz. 4:13, 14). Jehova Seerew kaan bɛnnin lo ani u be ɲɔgɔn kanu kosɔbɛ. N’i ye walew lamɛn o koo la ka bɔ duniɲa faan wɛrɛw la, ani n’i yɛrɛ y’o kɔrɔsi i ka kafo kɔnɔ, o bena a to an ka balimaya koo be diya i ye kosɔbɛ.

 TARSEKA SAUL BATISERA

7. Saul tun ka kan ka miiriya jumɛn de yɛlɛma?

⁷ An ka Tarisika Sɔli ka koo lajɛ. A tun kalanna koɲuman Yahutu diinan na ani a tun be ni tɔgɔba ye (Gal. 1:13, 14; Filip. 3:5). O wagati la, Yahutu caaman tun b’a jati ko kerecɛnw ye mɔgɔw ye minw murutira Yahutu diinan ma. O kama, Sɔli tun b’u tɔɔrɔ kosɔbɛ sabu a tun diminin lo u kɔrɔ yɛrɛ le! A tun b’a miiri ko a be Ala sago lo kɛra, k’a sɔrɔ a tun lafilinin lo pewu! (Kɛw. 8:3; 9:1, 2; 26:9-11). Walisa ka la Yezu la ani ka batize ka kɛ kerecɛn ye, a tun ka ɲi ka sɔn kɔrɔbɔli ma.

8. (a) Mun ye Saul dɛmɛ ka batɛmu ta? (b) Ka kɛɲɛ ni Kɛwalew 22:12-​16 ye, Ananiyasi ye Saul dɛmɛ cogo di? (Ja fana lajɛ.)

⁸ Mun lo y’a to Sɔli batizera? Sɔli ɲɛɛ fiyenna tuma min na Yezu nɔɔrɔman y’a yɛrɛ yira a la (Kɛw. 9:3-9). A ye suun don tile saba kɔnɔ. Koo min y’a sɔrɔ, siga t’a la ko a miirila o la. Tiɲɛn na, Sɔli lara a la ko Yezu lo ye Masiya ye ani ko a ka kalandenw be tiɲɛn batoli lo la. N’a sɔrɔ Sɔli dusu tun tiɲɛnin lo kosɔbɛ sabu a seen tun be Etiyɛni fagako la! (Kɛw. 22:20). A ka suun tile sabanan loon, Yezu ka kalanden Ananiyasi gwɛrɛla a la, a y’a ɲɛɛw yɛlɛ ani k’a jija ko a ka sin ka batize. A y’o kɛ ni kanuya ye (Kɛwaliw 22:12-16 kalan). Sɔli y’a yɛrɛ majigi ka sɔn Ananiyasi ka dɛmɛ na ani a batizera.—Kɛw. 9:17, 18.

9. An bɛ kalansira jumɛnw de sɔrɔ ka bɔ Saul ka misali la?

⁹ An be kalan caaman sɔrɔ Sɔli ka koo la. A tun be se k’a to kuncɛbaya wala adamaden ɲɛsiran k’a bali ka batize. Nka a m’o kɛ. A y’a yɛrɛ majigi ka sɔn k’a ka ɲɛnamaya kɛcogo yɛlɛma ani ka kɛ Krista ka kalanden ye (Kɛw. 26:14, 19). A sɔnna ka kɛ Krista ka kalanden ye hali k’a sɔrɔ a tun b’a lɔn ko u bena a tɔɔrɔ (Kɛw. 9:15, 16; 20:22, 23). A ka batɛmu kɔ, a tora k’a jigi la Jehova kan walisa a k’ale dɛmɛ gwɛlɛyaw wagati la (2 Kor. 4:7-10). I ka limaniya be se ka kɔrɔbɔ wala i be se ka  gwɛlɛya dɔw sɔrɔ n’i batizera ka kɛ Jehova Seere ye. Nka la a la ko Ala ni Krista bena i dɛmɛ tuma bɛɛ, siga t’o la.—Filip. 4:13.

10. Anna ka misali bɛ se k’i dɛmɛ cogo di?

¹⁰ Anna lamɔna Erɔpu kɔrɔn fan fɛ. A bamuso batizenin kɔ, a facɛ ye sira di a ma a ye bibulukalan daminɛ a saan 9. Tuma min na Anna somɔgɔ dɔw bɔra a kala ma ko a be bibulukalan kɛra ni Jehova Seerew ye, u y’a daminɛ k’a kɛlɛ. U tun be luu kelen kɔnɔ ni Anna n’a bangebagaw ye. U tun b’a miiri ko ni mɔgɔ dɔ ye a faaw ka diinan to yen, o ye maloyako lo ye. Tuma min na Anna ye saan 12 sɔrɔ, a ye sira deli a facɛ fɛ walisa ka batize. A facɛ y’a ɲininga ni o ye a yɛrɛ ka desizɔn lo ye wala ni mɔgɔ dɔ lo b’a lasunna k’o kɛ. A y’a jaabi ko: “N’ be Jehova kanu.” A facɛ sɔnna a ka batize. O kɔ, Anna somɔgɔ tɔɔw tora k’a lɔgɔbɔ ani k’a kɛlɛ. U dɔ y’a fɔ a ye ko: “A yɛrɛ tun fisa i ka to ka kakalayakow kɛ ani ka sigarɛti min sanni ka kɛ Jehova Seere ye.” Mun lo ye Anna dɛmɛ k’o koo muɲu? A ko: “Jehova ye barika don n’ na ani n’ bamuso ni n’ facɛ ye n’ dɛmɛ kosɔbɛ.” Jehova ye Anna dɛmɛ cogo tigitigi minw na, Anna y’o sɛbɛ. Tuma dɔw la, a tun be to k’o lajɛ walisa a kana ɲinɛ Jehova ye ale dɛmɛ cogo minw na. N’i be siranna kɔrɔbɔli ɲɛ, a to i hakili la ko Jehova bena ele fana dɛmɛ.—Eburuw 13:6.

KƆRNƐYE BATISERA

11. Mun tun bɛ se ka Kɔrnɛye ka batɛmu tali gɛlɛya?

¹¹ Bibulu be Kɔrinɛyi ka koo lakali an ye fana. “Sɔlidasi kuntigi” tun lo ani a tun be Ɔrɔmukaw ka sɔrɔdasi 100 ɲɔgɔn kun na (Kɛw. 10:1). O kama, n’a sɔrɔ a tun be ni tɔgɔba ye dugumɔgɔw ni sɔrɔdasiw cɛma. “A tun be zuwifuw dɛmɛ kosɔbɛ.” (Kɛw. 10:2). Jehova ko ciden Piyɛri ka taga kibaro diiman fɔ a ye. Yala Kɔrinɛyi ka lɔyɔrɔba y’a to a ye batɛmu koo bila ka suma wa?

12. Mun ye Kɔrnɛye dɛmɛ ka batɛmu ta?

¹² Mun lo y’a to Kɔrinɛyi batizera? Bibulu b’a fɔ ko “ale n’a ka somɔgɔw bɛɛ tun be siran Ala ɲa.” Kɔrinɛyi tun be to ka Ala deli tuma o tuma (Kɛw. 10:2). Tuma min na ciden Piyɛri ye kibaro diiman fɔ a ye, ale n’a somɔgɔw lara Krista la ani u sinna ka batize (Kɛw. 10:47, 48). Siga ta la, a tun ka ɲi ka yɛlɛmani o yɛlɛmani kɛ walisa ale n’a somɔgɔw ka Jehova bato ɲɔgɔn fɛ, a tun labilanin lo k’o kɛ.—Zozuwe 24:15; Kɛw. 10:24, 33.

13. An bɛ kalansira jumɛnw de sɔrɔ ka bɔ Kɔrnɛye ka misali la?

¹³ Kɔrinɛyi tun be ni lɔyɔrɔba min ye, a tun be se k’a to o k’a bali ka kɛ kerecɛn ye. Nka i ko Sɔli, a m’a to o ka kɛ. Yala i ka ɲi ka yɛlɛmanibaw kɛ walisa ka batize wa? N’o lo, Jehova bena i dɛmɛ. I jija k’a bato ka kɛɲɛ ni Bibulu ka sariyakolow ye. A bena i duga o kosɔn.

14. Tsuyoshi ka misali bɛ se k’i dɛmɛ cogo di?

¹⁴ Balimacɛ Tsuyoshi be Zapɔn ani a tun ka ɲi ka yɛlɛmani dɔ kɛ a ka baara koo la walisa ka batɛmu saratiw dafa. A tun ye Ikenobo lakɔliso ɲɛmɔgɔ ka kankɔrɔsigi lo ye. O lakɔliso la, u be mɔgɔw kalan filɛruw labɛncogo la. Ni sanga dɔ tun be yen, o lakɔliso ɲɛmɔgɔ tun be filɛruw labɛn, ani a tun be tali kɛ Budisiw ka sutarali landakow la. N’a tun labilanin tɛ, a tun be Tsuyoshi lo bila ka taga a nɔɔ na. Nka tuma min na Tsuyoshi ye tiɲɛn lɔn mɔgɔ saninw koo la, a y’a faamu ko n’a b’a fɛ ka batize, a man ɲi ka to k’o landakow kɛ tugun. A y’a latigɛ ko a tɛna Budisiw ka landakow kɛ tugun (2 Kor. 6:15, 16). A y’o kofɔ lakɔliso kuntigi ye. Mun  lo sɔrɔla o la do? A tora a ka baara la ani u tun t’a ci ka taga o landakow la tugun. Saan kelen ɲɔgɔn bibulukalan daminɛnin kɔ, a batizera. a Yala i ka ɲi ka yɛlɛmani don i ka baara koo la walisa k’i koo diya Ala ye wa? N’o lo, la a la ko a bena ele n’i somɔgɔw mako wasa.—Zab. 127:2; Mat. 6:33.

KƆRƐNTEKAW BATISERA

15. Sani ka batise, Kɔrɛntekaw ye gɛlɛya jumɛnw de kun?

¹⁵ Galen, Korɛnti dugu la, mɔgɔw tun be boliboli bololafɛnw nɔfɛ ani kakalayakow tun ka di u ye. O dugu kɔnɔ, mɔgɔ caaman ka ɲɛnamaya kɛcogo tun man di Ala ye. O la, n’u dɔ tun b’a fɛ k’a daminɛ ka Jehova sago kɛ, koow tun man nɔgɔ a ma fewu. Nka, tuma min na ciden Pol nana Krista ka kibaro diiman fɔ Korɛnti dugu la, mɔgɔ “caaman lara Matigi la, u batizera.” (Kɛw. 18:7-11). O kɔ, Matigi Yezu Krista y’a yɛrɛ yira Pol la yelifɛn dɔ la k’a fɔ a ye ko: “Mɔgɔ caaman be ne fɛ dugu nin kɔnɔ.” O kama, Pol tora yen ka waajuli kɛ saan kelen ni kalo wɔɔrɔ.

16. Mun ye Kɔrɛnteka dɔw dɛmɛ u ka se sɔrɔ u ka gɛlɛyaw kan ani ka batise? (2 Kɔrɛntekaw 10:​4, 5)

¹⁶ Mun lo y’a to Korɛntika dɔw batizera? (2 Korɛntikaw 10:4, 5 kalan). Ala ka Kuma ani a ka hakili senu barikaman lo y’u dɛmɛ u sera ka yɛlɛmanibaw kɛ (Eburuw 4:12). Korɛntika minw sɔnna Krista ka kibaro diiman na, u sera ka delinanko juguw dabila, i n’a fɔ dɔrɔtɔya, soɲɛni ani cɛɲɔgɔnɲini ni musoɲɔgɔnɲini.—1 Kor. 6:9-11. b

17. An bɛ kalansira jumɛnw de sɔrɔ ka bɔ Kɔrɛntekaw ka misali la?

¹⁷ Korɛntika dɔw tun ka ɲi ka delinanko juguw dabila. Nka a kɔrɔsi ko u m’a jati ko a bena gwɛlɛya u ma kojugu k’o yɛlɛmanibaw kɛ walisa ka kɛ kerecɛnw ye. U ye jijalibaw kɛ walisa ka to ka tagama sira dennin kan min be taga ni mɔgɔ ye ɲɛnamaya banbali yɔrɔ la (Mat. 7:13, 14). Yala i be bondori kɛra walisa ka see sɔrɔ delinanko jugu wala kɛwale jugu dɔ kan janko ka batize wa? N’o lo, kana i fari faga fewu! Jehova deli a ka hakili senu k’i dɛmɛ walisa ni koo jugu nege y’i minɛ, i ka se k’i yɛrɛ minɛ.

18. Monika ka misali bɛ se k’i dɛmɛ cogo di?

¹⁸ Monika be Zɔrizi jamana na. A ye jijalibaw kɛ walisa ka kuma nɔgɔninw ni ɲɛnagwɛko bɛnbaliw dabila janko ka ɲɛtaga kɛ ani ka batize. A ko: “N’ sunguru tuma  na, n’ mako tun be fanga min na walisa ka yɛlɛmaniw kɛ, n’ y’o sɔrɔ delili sababu fɛ. Jehova tun b’a lɔn ko n’ b’a fɛ ka koo ɲuman kɛ. O la, a tora ka n’ dɛmɛ tuma bɛɛ ani ka n’ ɲɛminɛ.” Monika batizera a saan 16. Yala i ka ɲi ka delinanko dɔw dabila walisa ka Jehova bato i ko a b’a fɛ cogo min na wa? N’o lo, i mako be fanga min na walisa k’o yɛlɛmaniw kɛ, to k’o deli a fɛ. Jehova ninsɔn ka di k’an sɔn a ka hakili senu na.—Zan 3:34.

NI I BƐ DANNAYA DA ALA KAN, I BƐ SE KA KULUW BƆ U NƆ NA

19. Mun de bɛ se k’i dɛmɛ ka se sɔrɔ gɛlɛyabaw kan? (Ja fana lajɛ.)

¹⁹ La a la ko Jehova b’i kanu ani ko a b’a fɛ i ka kɛ a ka denbayamɔgɔ dɔ ye. A b’o lo fɛ hali ni gwɛlɛya dɔw b’i bali ka batize. Saan kɛmɛkulu fɔlɔ la, Yezu y’a fɔ a ka kalanden dɔw ye ko: “N’aw ka lanaya boɲa tun be mutaridikisɛ ta bɔ, aw tun be se k’a fɔ kulu nin ye ko a ka wili ka bɔ yan ka taga lɔ yen fɛ. O tun bena kɛ. Fɛɛn te yen n’aw tena se ka min kɛ.” (Mat. 17:20). Yezu y’o kumaw fɔ mɔgɔ minw ye, u tun be tugura a kɔ a saan damanin dɔrɔn ye nin ye. O kama, u bele mako tun b’a la k’u ka limaniya barika bonya. Nka Yezu y’u hakili sigi ko n’u y’u ka limaniya barika bonya, hali ni dɔɔni lo, Jehova bena u dɛmɛ u ka see sɔrɔ gwɛlɛyabaw kan minw be i ko kuluw. Jehova bena ele fana dɛmɛ o cogo kelen na!

20. San kɛmɛ fɔlɔ krecɛnw ani an ka waati krecɛn minnu kofɔra nin barokun in kɔnɔ, olu ka kow bɛ dusu don i kɔnɔ cogo di?

²⁰ N’i b’a lɔn koo minw b’i bali ka batize, kana koow bila ka suma. Dɔ kɛ dɔ ye walisa ka see sɔrɔ u kan. A to saan kɛmɛkulu fɔlɔ kerecɛnw ani bi kerecɛnw ka koo k’i dusu saalo ani k’i barika bonya. A to u ka koo k’i jija ani k’i lasun i k’i yɛrɛkun di Jehova ma ani ka batize. O bena kɛ i ka desizɔnw bɛɛ la fisaman lo ye!