Bi bi in na, kunnafoniw bɛ se ka jɛnsɛn ka se mɔgɔ miliyɔn caman ma yɔrɔnin kelen. O bɛ se ka kɛ sɛbɛn, arajo, tele ani intɛrinɛti sababu fɛ. Minnu bɛ ‘tiɲɛtigi Ala’ bato, olu t’a fɛ ka kunnafoni nkalonmaw jɛnsɛn hali u t’a fɛ k’o kɛ u ɲinɛma. (Zaburu 31:6; Ekisode 23:1) Nkalon kuma minnu bɛ fɔ fɔ ɲɔgɔn ye, olu bɛ se ka ko juguba kɛ. Ni i b’a ɲini k’a dɔn ni ko dɔ ye tiɲɛ ye, i yɛrɛ ɲininka ko:

• ‘Yala nin ko in bɔra dannamɔgɔ dɔ yɔrɔ wa?’ A bɛ se ka kɛ ko mɔgɔ min bɛ ka o ko fɔ, o tigi tɛ o ko cogoya bɛɛ dɔn. Ni mɔgɔw bɛ kumaw fɔ fɔ ɲɔgɔn ye ka taa, o kumaw bɛ se ka yɛlɛma. O la, i yɛrɛ kɔlɔsi, ni i t’a dɔn o ko daminɛna cogo min na. Jɔyɔrɔw bɛ minnu bolo jɛkulu kɔnɔ, mɔgɔw ka teli ka da olu ka kuma na. O de la, olu ka kan ka u janto kosɛbɛ u kana kunnafoniw lase dalilu jɔnjɔn tɛ minnu na

• ‘Yala nin tɛ naafigiya kumaw ye wa?’ Ni u bɛ mɔgɔ dɔ walima jɛkulu dɔ tɔgɔ tiɲɛ, i mankan ka o kumaw fɔ.—Ntalenw 18:8; Filipekaw 4:8

• ‘Yala ne bɛ se ka da nin ko in na wa?’ I yɛrɛ kɔlɔsi ni i ye ko kabakoma dɔw walima ko kɛlen dɔw mɛn

WIDEYO LAJƐ MIN TƆGƆ YE KO COMMENT ARRÊTER LES BRUITS QUI COURENT ? O KƆ AW KA NIN ƝININKALI NINNU JAABI:

• Ka kɛɲɛ ni Ntalenw 12:18 ye, kumaw bɛ se ka ko jugu jumɛn kɛ?

• Filipekaw 2:4 bɛ an dɛmɛ cogo di an ka an kumacogo dɔn ni an bɛ kuma mɔgɔ wɛrɛw kan?

• An ka kan ka mun de kɛ ni mɔgɔw y’a daminɛ ka ɲagaribɔ kumaw walima kuma juguw fɔ tɔw kan?

• Sani an k’a daminɛ ka kuma tɔw kan, an ka kan ka ɲininkali jumɛnw de kɛ an yɛrɛ la?