KALANSEN 9
I ka denbaya bɛ se ka hɛrɛ sɔrɔ cogo di?
1. Mun na furu kɔnɔna de ye denbaya ka hɛrɛ sɔrɔ yɔrɔ ye?
Kibaru duman bɛ bɔ Jehova yɔrɔ, o min ye nisɔndiya Ala ye, a b’a fɛ denbayaw ka kɛ hɛrɛ la. (1 Timote 1:11, NM) Ale de ye furu sigibaga ye. Fɔ furu ka kɛ sariya kɔnɔ walasa denbaya ka hɛrɛ sɔrɔ, ka d’a kan o ye ko basigilen ye denmisɛnin bɛ se ka lamɔ yɔrɔ min na. Krecɛnw ka kan ka u ka jamana sariyaw bato ka kɛɲɛ ni furu sɛbɛnnin ko ye.—Luka 2:1, 4, 5 kalan.
Ala bɛ furu ye cogo di? A b’a fɛ furu ka kɛ badaa jɛ ye cɛ ni muso cɛ. Jehova b’a fɛ cɛw ani musow ka tilen ɲɔgɔn cɛ. (Heburuw 13:4) A bɛ furusa haramuya. (Malaki 2:16) Nka a bɛ sɔn krecɛn ka furusa kɛ walasa ka furu mɔgɔ wɛrɛ ma ni a furuɲɔgɔn ye jatɔya kɛ.—Matiyu 19:3-6, 9 kalan.
2. Cɛ ni muso ka kan ka ɲɔgɔn minɛ cogo di?
Jehova ye cɛ ni muso da walasa u ka ɲɔgɔn dafa furu kɔnɔ. (Jenɛse 2:18) I n’a fɔ denbaya kuntigi, cɛ ka kan k’a ka kuntigiya jira a kɛtɔ k’i janto denbaya mago ɲɛ fɛnw na ani u kalanni Ala ko la. A ka kan ka kanuya sɛbɛ de jira a muso la. Cɛ ni muso fila bɛɛ ka kan ka ɲɔgɔn bonya. Ka d’a kan, cɛw ni musow dafalen tɛ, u ka kan ka dege ka yafa ɲɔgɔn ma, o ye furu hɛrɛma gundo ye.—Efesekaw 4:31, 32; 5:22-25, 33; 1 Piɛrɛ 3:7 kalan.
3. Yala i ka kan ka bɔ furu kɔnɔ hɛrɛ tɛ min na wa?
Ni o y’a sɔrɔ i ye gɛlɛya sɔrɔ i ka furu kɔnɔ, aw fila bɛɛ de ka kan ka baara kɛ walasa ka ɲɔgɔn minɛ ni kanuya ye. (1 Kɔrɛntekaw 13:4, 5) Ala ka kuma b’a fɔ ko ka fara ɲɔgɔn na, o tɛ gɛlɛya minnu bɛ furu kɔnɔ ɲɛnabɔ cogo ye.—1 Kɔrɛntekaw 7:10-13 kalan.
4. Denmisɛnw, Ala bɛ mun fɛ ka ɲɛsin aw ma?
Jehova b’a fɛ aw ka kɛ hɛrɛ la. A bɛ laadilikan bɛɛ la ɲumanw di aw ma denmisɛniya diyabɔ cogo kan. A b’a fɛ aw ka nafa sɔrɔ aw bangebagaw ka hakilitigiya ani u ka ko dɔn na. (Kolosekaw 3:20) Nisɔndiya min bɛ sɔrɔ ka kɔw kɛ i dabaga ye ani a Denkɛ ye, Jehova b’a fɛ i ka o nɛnɛ.—Waajulikɛla 11:9–12:1; Matiyu 19:13-15; 21:15, 16 kalan.
5. Bangebagaw, aw denw bɛ se ka hɛrɛ sɔrɔ cogo di?
Aw bɛ baaraba kɛ walasa ka dumuni, so ani finiw di aw denw ma. (1 Timote 5:8) Nka walasa aw denw ka hɛrɛ sɔrɔ, u mago bɛ fana aw ka u kalan u ka Ala kanu ani ka a dɔn. (Efesekaw 6:4) Aw ka misali min b’a jira ko aw bɛ Ala fɛ, o bɛ se ka nɔba bila aw denw dusukunnataw la. Ni aw bɛ aw sinsin Ala ka kuma kan, aw ka kalan bɛ aw denw miirinataw yɛlɛma ka taa sira ɲuman kan.—Dutɛrɔnɔmɛ 6:4-7; Ntalenw 22:6 kalan.
Denmisɛnw bɛ nafa sɔrɔ aw ka dusudon kɔnɔ kumaw la ani aw bɛ kuma ɲuman minnu fɔ u ye. U mago bɛ fana kololi ani latilenni la. O bɛ kɛ sababu ye ka u lakana walew ma min bɛ se ka u ka hɛrɛ sɔrɔ tiɲɛ. (Ntalenw 22:15) Kololi mankan ka kɛ ni nijuguya ye walima k’a dama tɛmɛ.—Kolosekaw 3:21 kalan.
Jehova Seerew ye gafe caman bɔ minnu sɛbɛnna kɛrɛnkɛrɛnnenyala bangebagaw ani denmisenninw dɛmɛni kama. O gafew sinsinnen bɛ Bibulu kan.—Zaburu 19:8, 12 kalan..
Ninnu fana lajɛ
I KA DENBAYA BƐ SE KA HƐRƐ SƆRƆ
An ka an ɲɛsin Ala ma walasa an ka hɛrɛ sɔrɔ an ka furu kɔnɔ
Baara kɛ ni ɲininkali nɔgɔnman fila ye min bɛ se ka i ka furu dɛmɛ ka taa ɲɛ.
I KA DENBAYA BƐ SE KA HƐRƐ SƆRƆ
Gɛlɛyaw bɛ ɲɛnabɔ cogo di?
Kow ɲɛnabɔ cogo ɲuman o bɛ se ka danfara don furu barikama ni hɛrɛma ani furu barikantan ni furu yoboyabalen ni ɲɔgɔn cɛ.
