Betɛli ka denbaya kɔnɔ mɔgɔw bɛ baara kɛ baarada caman na, u bɛ u janto waajulibaara la jamana kelen walima jamana caman kɔnɔ. O baaraw bɛ bayɛlɛmali kan, ka sɛbɛn ninnu bɔ imprimantiw kɔnɔ, ka u kɛ gafew ye, ka gafe ninnu jɛnsɛn, ka wideyow ani fɛn lamɛntaw dilan walima k’u janto fɛn wɛrɛw la.

U bɛ baaraw labɛn filiali ka komite sababu fɛ. Tɔn bolofara kelen o kelen ka baara, Ɲɛmɔgɔ kulu bɛ o kalifa filiali ka Komite ma, ni o kɔnɔ mɔgɔ dɔgɔyalenba ye diinɛ maakɔrɔ saba ɲɔgɔn ye kodɔnba bɛ minnu na. O Komite bɛ jamana minnu ka kow ɲɛnabɔ, taaɲɛ minnu bɛ ka kɛ baara kɔnɔna na ani gɛlɛya minnu bɛ se ka o jamanaw kɔnɔ, o Komite bɛ o lase Ɲɛmɔgɔ kulu ma. U bɛ o sɛbɛnw minnu ci Ɲɛmɔgɔ kulu ma, o b’a to Ɲɛmɔgɔ kulu b’a dɔn, u bɛ kuma barokun minnu kan an ka gafew nataw kɔnɔ ani an ka lajɛw ni lajɛbaw la. Mɔgɔ dɔw ni olu bɛ Ɲɛmɔgɔ kulu jira, olu bɛ taa bɔ tuma bɛɛ tɔn bolofaraw ye walasa ka filiali ka komite mɔgɔw dɛmɛ u ka u jɔyɔrɔ fa. (Ntalenw 11:14) Lajɛ kɛrɛnkɛrɛnnen dɔ sen fɛ, mɔgɔ dɔ min bɛ tɔnsigiyɔrɔsoba jira o bɛ jɛmukan dɔ di min bɛ dusudon Jehova Seerew kɔnɔ minnu bɛ o tɔn bolofara ka mara la.

Jɛkulu minnu bɛ yen, u bɛ olu kɔkɔrɔdon. Tɔn bolofara la, balimakɛw bɛ yen minnu ka baara ye k’a jira sɔn kɛra jɛkulu kuraw minnu ka sigili ma, ani ka tutigɛbagaw, misiɔnɛriw ni kafo lakɔlɔsibagaw ka baara kɛcogoyaw ɲɛnabɔ, ka lajɛbaw labɛn, ka Masaya So kuraw jɔli kow ɲɛnabɔ ani k’u janto ko gafew bɛ bila la ka taa di jɛkuluw ma walisa ka u magoɲɛfɛnw di u ma. Fɛn minnu bɛ kɛ tɔn bolofara kɔnɔ, o bɛ a to waajulibaara bɛ kɛ cogo bɛnnen na.—1 Kɔrɛntekaw 14:33, 40.

• Filiali ka komitew bɛ Ɲɛmɔgɔ kulu dɛmɛ cogo di?

• Tɔn bolofara bɛ i janto mun de la?