ƝƐFƆLI FARANKANW
Mɛlɛkɛba Misɛl ye jɔni ye?
DANFƐN hakilimaalama min welela ko Misɛl, o tɔgɔ fɔlen tɛ yɔrɔ caman na Bibulu kɔnɔ. Nka, ni Bibulu bɛ kuma Misɛl kan, a bɛ a wale kɛtɔ de jira. Daniɛl ka kitabu kɔnɔ, Misɛl bɛ mɛlɛkɛ jugumanw kɛlɛ. Jude ka sɛbɛn kɔnɔ, a ni Sitanɛ bɛ ka ɲɔgɔn sɔsɔ. Jirali kitabu kɔnɔ fana, a bɛ kɛlɛ kɛ Sendonbaga n’a ka jinɛw fɛ. Ikomi a bɛ Jehova ka kuntigiya lafasa ani ka Ala juguw kɛlɛ, o cogo la, Misɛl bɛ ko kɛ ka bɛn nin a tɔgɔ ye n’o ye ko: “Jɔni bɛ i ko Ala?” Nka o Misɛl dun ye jɔnni ye?
Mɔgɔ dɔw dɔnnen don ni tɔgɔ caman ye. Misali la, Yakuba tɔgɔ dɔ fana ye Israɛl ye. Ciden Piɛrɛ fana tɔgɔ dɔ ye Simɔn ye. (Jenɛse 49:1, 2; Matiyu 10:2) O cogo kelen na, Bibulu b’a jira ko Misɛl ye Yesu Krisita tɔgɔ dɔ wɛrɛ ye. O tun ye a tɔgɔ ye sani a ka na ɲɛnamaya kɛ dugukolo kan ani tɔgɔ min tun b’a la kabini tuma jan. Kun minnu b’a to an bɛ o fɔ, an ka olu lajɛ Sɛbɛnniw kɔnɔ.
Mɛlɛkɛba. Ala ka Kuma bɛ Misɛl wele ko “mɛlɛkɛba.” (Jude 9) O daɲɛ kɔrɔ ye ko “mɛlɛkɛw kuntigi.” I y’a ye ko Misɛl bɛ wele ko mɛlɛkɛba. O b’a jira ko o mɛlɛkɛ sugu kelenpe dɔrɔn de bɛ o cogo la. Ni Bibulu bɛ kuma mɛlɛkɛba kan, a t’a fɔ abada ko “mɛlɛkɛbaw” nka a b’a fɔ tuma bɛɛ ko “mɛlɛkɛba”. Bibulu bɛ cɛsira don Yesu ani mɛlɛkɛba jɔyɔrɔ cɛ fana. Matigi Yesu Krisita lakununnen ko la, 1 Tesalonikekaw 4:16 b’a fɔ ko: “Matigi yɛrɛ na jigin ka bɔ sankolo la ni pɛrɛnkanba ni mɛlɛkɛw kuntigi kanba” ye. Nin tɛmɛsira b’a jira ko mɛlɛkɛw kuntigi kanba bɛ Yesu da. O b’a jira o la ko Yesu yɛrɛ de ye mɛlɛkɛba Misɛl ye.
Kɛlɛ kuntigi. Bibulu b’a fɔ ko “Misɛl ni a ka mɛlɛkɛw ye o dragon . . . ni a ka mɛlɛkɛw . . . kɛlɛ.” (Anw de ye daɲɛ jɛngɛn; Jirali 12:7) O la sa, Misɛl ye mɛlɛkɛ kantigiw ka kɛlɛ kuntigi ye. Jirali bɛ kuma Yesu kan fana i ko mɛlɛkɛ kantigiw ka kɛlɛ kuntigi. (Jirali 19:14-16) Ciden Paul b’a fɔ kɛrɛnkɛrɛnnenya la ko “Matigi Yesu” ani “a ka sebaaya mɛlɛkɛw.” (2 Tesalonikekaw 1:7) O la sa, Bibulu bɛ kuma Misɛl ani “a ka mɛlɛkɛw” kan, i ko a bɛ kuma Yesu ani “a ka mɛlɛkɛw” kan. (Matiyu 13:41; 16:27; 24:31; 1 Piɛrɛ 3:22) Ikomi Bibulu t’a fɔ fan si ko mɛlɛkɛ kantigiw ka kɛlɛbolo ye fila ye sankolo la (kelen ɲɛminɛnen Misɛl fɛ ani tɔ kelen ɲɛminɛnen Yesu fɛ) a jɛlen don ko o Misɛl ye Yesu Krisita de ye a jɔyɔrɔ la sankolo la. *
^ dak. 1 Walisa ka kunnafoni wɛrɛw sɔrɔ minnu b’a jira ko Misɛl tɔgɔ bɛ Ala Denkɛ de kofɔ, gafe min tɔgɔ ko Étude perspicace des Écritures, volume 2, a ɲɛ 280nan ni 281nan na, i ka o lajɛ. A dilanna Jehova Seerew fɛ.
