1, 2. An bɛ se ka kundogoyɔrɔ sɔrɔ yɔrɔ jumɛn bi, min bɛ se k’an lakana?

E KA miiri ko i bɛ ka taama sira kan don dɔ la. Sanfiɲɛba dɔ sinna ka wuli. San finna yɔrɔnin kelen. Sanmɛgɛmɛgɛw kɛra. San pɛrɛnna ani sanba dɔ ye binni daminɛ. I jigitigɛlen bɛ ka i teliya walisa ka kundogoyɔrɔ dɔ ɲini i bɛ se ka san tigɛ yɔrɔ min na. I sinna ka yɔrɔ ɲuman barikama dɔ ye sirada la, san ma don yɔrɔ min na. Yala o yɔrɔ lakananen nafa tɛna bonya i bolo kosɛbɛ wa?

² An bɛ waati ɲagaminen de la. Diɲɛ cogoyaw bɛ ka juguya ka taa a fɛ. Nka kundogoyɔrɔ lakananen dɔ bɛ yen min bɛ se k’an lakana walisa kojugu kana an sɔrɔ min tɛ se ka dilan. O ye yɔrɔ jumɛn ye? A lajɛ Bibulu bɛ min fɔ. A ko: ‘Ne n’a fɔ Matigi ye ko: “I ye ne dogo yɔrɔ ni ne ka kɛlɛ kunbɛn so de ye. I ye ne ka Ala ye, ne bɛ ne jigi da i kan.” ’—Zaburu 91:2.

3. An bɛ se ka Jehova kɛ an kundogoyɔrɔ ye cogo jumɛn na?

³ E ka miiri nin na: Jehova, bɛ se ka kɛ an kundogoyɔrɔ ye, ale min ye Dabaga ye ani dunuya bɛɛ Masaba. A bɛ se ka an lakananen mara, bawo mɔgɔ o mɔgɔ, walima fɛn o fɛn bɛ se ka kojugu kɛ an na, Jehova ka sebaaya ka bon  kosɛbɛ ni o mɔgɔ walima o fɛn ta ye. Hali ni mɔgɔw ye kojugu kɛ an na, Jehova bɛ se ka o kojugu nɔw bɛɛ bɔ yen pewu. An dun bɛ se ka Jehova kɛ an kundogoyɔrɔ ye cogo jumɛn na? An ka kan k’an ka dannaya da a kan. Ka fara o kan, Ala ka Kuma bɛ nin laadilikan di an ma ko: “A’ ye to Ala ka kanuya la.” (Jude 21) Ɔwɔ, an ka kan ka to Ala ka kanuya la. Kanuya min bɛ an dusukun na ka ɲɛsin an sankolola Fa ma, an ka o fana to an dusukun na. O cogo la, an bɛ se ka da a la ko a bɛna kɛ an kundogoyɔrɔ ye. Nka, o kanuya sugu bɛ se ka kɛ an ni Jehova cɛ cogo jumɛn na?

4, 5. Jehova y’a ka kanuya jira an na cogo minnu fɛ, olu dɔw ye jumɛnw ye?

⁴ Walisa an ka to Ala ka kanuya la, fo an k’a dɔn Jehova y’a ka kanuya jira an na cogo min na. E ka miiri Bibulu kalansira dɔw la, i ye minnu dɔn nin gafe in sababu fɛ. Ka Jehova to Dabaga jɔyɔrɔ la, a ye dugukolo di an ma walisa k’o kɛ an sigiyɔrɔ ɲumanba ye. A ye dugukolo fa dumunifɛn camanba la, ani ji la, ani dugukolo jukɔrɔ nafolow la. Nka, o dɔrɔn tɛ, a ye dugukolo fa fana dantanfɛnw na minnu bɛ an kabakoya ani yɔrɔ cɛɲumanbaw la. Ikomi Ala ye Bibulu tigi ye, a ye a tɔgɔ n’a jogo ɲumanw jira an na a kɔnɔ. Ka fara o kan, a ka Kuma b’a jira an na ko a ye a Denkɛ kanulen ci ka na dugukolo kan, k’a to o ka tɔɔrɔ ani o ka sa an kosɔn. (Yuhana 3:16) A ye o ko min kɛ an ye, o nafa jumɛn b’an kan? O bɛ jigiya di an ma ko sini bɛna diya kosɛbɛ.

⁵ Jigiya min b’an na sini ko la, o bɛ bɔ fɛn dɔ wɛrɛ fana na, Ala ye o min kɛ. O ye mun ye? Jehova ye go fɛrɛnaman dɔ sigi sankolo la, n’o ye Masiya Masaya ye. Yan ni waati dɔɔnin dɔrɔn cɛ, o bɛna tɔɔrɔ bɛɛ ban, ka dugukolo yɛlɛma k’a kɛ alijinɛ ye. E ka miiri dɔɔnin o la! An bɛna se k’an ka ɲɛnamaya kɛ hɛrɛ ni nisɔndiya la dugukolo kan badaa-badaa. (Zaburu 37:29) Nka, yanni o waati cɛ, an bɛ se ka an ka ɲɛnamaya kɛ cogo bɛɛ la fisaman min na kabini sisan, Ala ye o jira an na. A ye cogo di an ma fana ka se k’a deli. O cogo la an bɛ se ka kuma a fɛ tuma bɛɛ ani yɔrɔ bɛɛ la, k’an kɔnɔkow bɛɛ fɔ a ye. Jehova y’a ka kanuya jira hadamadenw na ani an kelen-kelen na cogo minnu fɛ, olu dɔw de fɔlen filɛ nin ye.

6. Jehova ye kanuya min jira ka ɲɛsin i ma, i bɛ se ka mun kɛ walisa ka o kanuya segin a ma?

 ⁶ I ka kan ka miiri ɲininkali nafamaba min na, o ye nin ye: Ne bɛna mun kɛ walisa ka Jehova ka kanuya segin a ma? Mɔgɔ caman bɛn’a fɔ ko: “Tiɲɛ-tiɲɛ na, ne ka kan ka Jehova ka kanuya segin a ma.” Yala o ye e fana hakilila ye wa? Yesu y’a fɔ ko nin ci de ka bon ka tɛmɛ ci fɔlen tɔw bɛɛ kan, ko: “I ka i Matigi Ala kanu ni i dusukun bɛɛ ye, ani i ni bɛɛ ni i hakili bɛɛ.” (Matiyu 22:37) Siga t’a la ko kun caman bɛ i bolo ka Jehova Ala kanu. Nka, ni a bɛ i kɔnɔ ko i bɛ Jehova kanu, yala o dama dɔrɔn de b’a jira ko i bɛ Jehova kanu n’i dusukun bɛɛ ye, ani ni i ni bɛɛ ye, ani ni i hakili bɛɛ ye wa?

7. N’an kɔnɔko ye ko an bɛ Ala kanu, yala o dɔrɔn bɛ wasa kɛ wa? O ɲɛfɔ.

⁷ I ko a ɲɛfɔlen bɛ Bibulu kɔnɔ cogo min na, ka Ala kanu, o ye fɛn de ye min nafa ka bon kosɛbɛ. A tɛ dan mɔgɔ kɔnɔko kanuya dama dɔrɔn ma. O dun ye kanuya sɛbɛ dɔ daminɛtɔ ye ka ɲɛsin Jehova ma. An ka misali dɔ ta: Pɔmi kisɛ nafa ka bon walisa o ka bonya ka kɛ pɔmijiri ye min bɛ den. Nka, pɔmi kisɛ ye jiri daminɛ dɔrɔn de ye. A bɛ i ko n’i y’a fɔ mɔgɔ dɔ ye ko pɔmi nege b’i la. Ni o tigi ye pɔmi kisɛ dɔrɔn ta k’a di i ma, yala o bɛna diya i ye wa? A jɛlen don ko o tɛna diya i ye. O cogo kelen na, n’an kɔnɔko ye ko an bɛ Jehova Ala kanu, o ye kanuya dɔ daminɛ dɔrɔn de ye. Bibulu b’a fɔ ko: “Ka Ala kanu, o ye nin de ye, ka a ka ci fɔlenw mara. A ka ci fɔlenw man gɛlɛn.” (1 Yuhana 5:3) Ala kanuya min bɛ an na, walisa o ka kɛ kanuya jɔnjɔn ye, a ka kan ka den ɲuman kɛ. O kanuya sugu ka kan ka jira kɛwalew de fɛ.—Matiyu 7:16-20.

8, 9. An bɛ se k’a jira cogo jumɛn na ko an bɛ Ala kanu ani ko an b’a waleɲumandɔn?

⁸ An b’an ka kanuya jira ka ɲɛsin Ala ma n’an b’a ka ci fɔlenw mara, k’a ka sariyakolow sirataama. O kɛli man gɛlɛn kojugu. Jehova ka sariyaw tɛ ko gɛlɛn ye. U kun ye k’an dɛmɛ walisa an ka an ka ɲɛnamaya kɛ cogo ɲuman na, ani cogo la min bɛ an  wasa, ani min bɛ hɛrɛ lase an ma. (Esayi 48:17, 18) N’an b’an ka ɲɛnamaya kɛ ka kɛɲɛ ni Jehova ka laadilikanw ye, an b’a jira an sankolola Fa la, ko a ye fɛn minnu bɛɛ kɛ an ye, ko an b’a waleɲumandɔn tiɲɛ na olu bɛɛ ko la. Nka, dusukasiko don ko mɔgɔ damadɔ dɔrɔn de bɛ o waleɲumandɔn sugu jira an ka bi diɲɛ in kɔnɔ. An t’a fɛ ka kɛ waleɲumandɔnbaliw ye i ko Yesu tile la mɔgɔ dɔw, k’a to dugukolo kan. Yesu kɛlen ka kunatɔ tan kɛnɛya, kelenpe dɔrɔn de seginna ka na a waleɲumandɔn. (Luka 17:12-17) A jɛlen don ko an b’a fɛ ka kɛ i ko o mɔgɔ kelen in, nka an t’a fɛ ka kɛ i ko mɔgɔ kɔnɔntɔn tɔ minnu ma kɛ waleɲumandɔnbagaw ye.

⁹ O la sa, an ka kan ka Jehova ka ci fɔlen jumɛnw mara? An kumana u damadɔ kan nin gafe in kɔnɔ, nka an ka segin u dɔw kan. Ka Ala ka ci fɔlenw mara, o bɛna an dɛmɛ ka to Ala ka kanuya la.

10. Kun min na a nafa ka bon ka kalan kɛ ka taa a fɛ walisa ka dɔnniya sɔrɔ Jehova Ala ko la, o ɲɛfɔ.

¹⁰ Ka kalan kɛ walisa ka dɔnniya sɔrɔ Jehova ko  la, o ye fɛn nafama fɔlɔ de ye min b’an gɛrɛ a la. O ye fɛn de ye min man kan ka dabila abada. A ka kɛ ko i bɛ kɛnɛma, don dɔ sufɛ. Nɛnɛba bɛ yen. I bɛ ka i yɛrɛ ja tasuma na. Yala i bɛna a to tamɛnɛ ka dɔgɔya fo ka sa wa? Ayi. I bɛna to ka dɔgɔ don a kɔrɔ walisa tasuma ɲagalen ka to. Mun na? Bawo i ni bɛ se ka to a da fɛ. I ko dɔgɔ bɛ tasuma ɲaga cogo min na, o cogo kelen na “Ala dɔnniya” fana b’a to kanuya min bɛ an dusukun na Jehova fan fɛ, o barika bonyalen ka to.—Ntalenw 2:1-5.

11. Yesu ye min fɔ a ka kalandenw ye, o ye mun kɛ u la?

¹¹ Yesu tun b’a fɛ ko kanuya min bɛ a ka kalandenw dusukun na ka ɲɛsin Jehova ani A ka tiɲɛ Kuma nafama ma, o kanuya ɲɛnama ɲagalen ka to tuma bɛɛ. Yesu lakununnen kɔfɛ ka bɔ saya la, kirayakuma minnu tun bɛ Heburukan sɛbɛnniw kɔnɔ, olu dɔw tiimɛna ale kan cogo min na, Yesu ye o fɔ a ka kalanden fila ye. O ko ye mun kɛ u la? Kalandenw y’a fɔ kɔfɛ ko: “A kumana an fɛ sira la ka Kitabuw kɔrɔw jira an na tuma min na, an dusukun ɲagalilenba tun tɛ wa?”—Luka 24:32.

12, 13. (a) Kanuya min tun bɛ mɔgɔ fanba la ka ɲɛsin Ala ani Bibulu ma, o kanuya bɛ cogo jumɛn na bi? (b) An bɛ se ka mun kɛ walisa an ka kanuya kana sumaya?

¹² I y’a dɔn tuma min na Bibulu bɛ min fɔ tigitigi, yala i y’a kɔlɔsi ko nisɔndiya nana i la ani ko i ye timinandiya sɔrɔ ka tiɲɛ kuma fɔ mɔgɔw ye wa? Yala i y’a ye fana ko kanuya min bɛ i la ka ɲɛsin Ala ma, o bɛ ka bonya i dusukun na wa? Siga t’a la ko i ye o jateminɛ i yɛrɛ la. Mɔgɔ caman fana ye o ko kelen de jateminɛ u yɛrɛ la. Nka sisan, a gɛlɛyayɔrɔ ye min ye, o ye ka dɔ fara o kanuyaba in kan ka taa a fɛ. An t’a fɛ ka bi diɲɛ in kɛcogo ladege. Yesu tun ye nin kirayakuma fɔ, ko: “Mɔgɔ caman ka kanuya na sumaya.” (Matiyu 24:12) I bɛ se ka mun kɛ walisa kanuya min bɛ i dusukun na ka ɲɛsin Jehova ma ani Bibulu ka tiɲɛkumaw ma, o kanuya kana sumaya?

¹³ I ka kalan kɛ ka taa a fɛ walisa ka dɔnniya sɔrɔ Jehova ani Yesu Krisita ko la. (Yuhana 17:3) I bɛ ka min kalan Ala ka Kuma kɔnɔ, i ka taasi o kan. I bɛ se ka o kɛ n’i bɛ i yɛrɛ ɲininka ko: ‘Ne bɛ ka min kalan, o bɛ mun jira ne la Jehova Ala ko la? A bɛ kun jumɛn fana di ne ma ka Ala kanu ni ne dusukun bɛɛ ye, ni ne hakili  bɛɛ ye ani ni ne ni bɛɛ ye?’ (Zaburu 119:97) Kanuya min bɛ i dusukun na ka ɲɛsin Jehova ma, o kanuya barika bonyalen bɛ to, n’i bɛ taasi o cogo la.

14. Delili bɛ se k’an dɛmɛ cogo jumɛn na walisa kanuya min b’an dusukun na ka ɲɛsin Jehova ma, o ɲagalen ka to?

¹⁴ I bɛ se ka min kɛ fana walisa i ka kanuya bonyalen ka to Ala fan fɛ, o ye ka delili kɛ tuma bɛɛ. (1 Tesalonikekaw 5:17) Nin gafe Tilayɔrɔba 17nan na, an y’a ye ko delili ye nilifɛn nafamaba ye min bɔra Ala yɔrɔ. Kumaɲɔgɔnya jɛlen tuma bɛɛ, o bɛ kɛ sababu ye ka hadamadenya sira min bɛ mɔgɔw ni ɲɔgɔn cɛ, k’o barika bonya nisɔndiya kɔnɔ. O cogo kelen na fana, anw ni Jehova cɛsira ɲagalen bɛ to, n’an bɛ a deli tuma bɛɛ. A nafa ka bon kosɛbɛ n’an t’a to an ka deliliw ka kɛ fɛnw ye an bɛ minnu fɔ k’a sɔrɔ an tɛ ka miiri u kumaw la. A nafa ka bon fana, n’an t’a to an ka deliliw ka kɛ kumaw ye an bɛ deli ka minnu fɔ, ka segin u kan tuma bɛɛ, k’a sɔrɔ u ma bɔ an dusukun na ani ko an tɛ kɔrɔ ɲɛnama dɔn u la. An ka kan ka kuma Jehova fɛ i ko den min bɛ a fa kanu, o bɛ kuma a fa fɛ cogo min na. A jɛlen don ko an b’a fɛ ka kuma Jehova fɛ ni bonya ye, nka an bɛna o kɛ ni kɔnɔnajɛya ye. An tɛna fɛn fosi dogo a la, wa an ka kumaw bɛna bɔ an dusukun na. (Zaburu 62:9) Tiɲɛ na, an ka deliliw ani an ka yɛrɛkalan Bibulu la, olu ye an ka bato kɔnɔkow ye minnu nafa ka bon kosɛbɛ. U b’an dɛmɛ an ka to Ala ka kanuya la.

15, 16. Mun na a bɛnnen don an ka Masaya waajuli baara filɛ i ko bonyaba ani nafoloba?

¹⁵ Yɛrɛkalan Bibulu la ani deliliw, olu ye bato walew ye an bɛ se ka minnu kɛ, n’an kelen don tuma min na. O la sa, sisan, an ka kuma fɛn dɔ kan bato ko la, an bɛ min kɛ jama la, n’o ye ka an ka dannayaw fɔ mɔgɔw ye. Tiɲɛ minnu bɛ Bibulu kɔnɔ, yala i delila ka olu dɔw fɔ mɔgɔw ye wa? N’i delila k’o kɛ, i ye bonyaba sɔrɔ ka bɔ Ala yɔrɔ. (Luka 1:74) An ye tiɲɛ minnu kalan Jehova Ala ko la, n’an bɛ olu fɔ mɔgɔw ye, an bɛ ka baara dɔ de kɛ min dira Krecɛn lakikaw bɛɛ ma, n’a nafa ka bon kosɛbɛ. O baara ye ka Ala ka Masaya kibaru duman waajuli kɛ.—Matiyu 24:14; 28:19, 20.

¹⁶ Ciden Paul tun bɛ a ka cidenyabaara filɛ fɛn sɔngɔ gɛlɛn ye. A ye o wele ko nafoloba. (2 Kɔrɛntekaw 4:7) I bɛ se ka baara bɛɛ  la ɲuman min kɛ, o ye ka kuma mɔgɔw fɛ Jehova Ala ani a kuntilenna kow kan. An bɛ baara kɛ Matigi min ye, o ka fisa ni matigi tɔw bɛɛ ye an tun bɛ se ka minnu sɔrɔ, ani an bɛ nafa minnu sɔrɔ o baara la, o ka fisa ni nafaw ye, an bɛ se ka minnu sɔrɔ baara wɛrɛ la. N’i ye i sen don o baara la, i bɛ mɔgɔ kɔnɔnajɛlenw dɛmɛ  ka gɛrɛ an sankolola Fa la ani ka sira ta min bɛ mɔgɔ lase ɲɛnamaya banbali la. Yala baara bɛ yen min bɛ mɔgɔ ni wasa ka tɛmɛ o kan wa? Ka fara o kan, ka seereya kɛ Jehova ani a ka Kuma ko la, o bɛ e yɛrɛ ka dannaya kologɛlɛya, ka dɔ fara i ka kanuya barika bonya kan ka ɲɛsin a ma. I bɛ i cɛsiri cogo min na o baara la, o nafa ka bon kosɛbɛ Jehova bolo. (Heburuw 6:10) Ni i bolo degunnen tora o baara la, o bɛna i dɛmɛ ka to Ala ka kanuya la.—1 Kɔrɛntekaw 15:58.

17. Mun na Krecɛn cidenyabaara ye baara kɔrɔtɔlen ye bi?

¹⁷ A nafa ka bon ka an hakili to a la ko Masaya waajuli baara ye baara kɔrɔtɔlenba de ye bi. Bibulu b’a fɔ ko: “Ala ka kuma fɔ ka i jija a la.” (2 Timote 4:2) Mun na kɔrɔtɔko don bi ka waajuli kɛ? Ala ka Kuma b’a fɔ an ye ko: “Matigi ka diminyaba donba surunyara. A surunyara, a bɛ teliya ka na.” (Sofoni 1:14) Ɔwɔ, Jehova bɛna dan sigi diɲɛ sigicogo la waati min na, o waati bɛ ka teliya ka na. Mɔgɔw ka kan ka lasɔmi. U mago bɛ k’a dɔn ko sisan de y’a waati ye ka Jehova sugandi i ko u ka Masakɛba. Laban ‘tɛna mɛn.’—Habakuk 2:3, BS.

18. Mun na an ka kan ka Jehova bato kɛnɛ kan an faralen Krecɛn sɛbɛw kan?

¹⁸ Jehova b’a fɛ an ka fara Krecɛn sɛbɛw kan ka ale bato kɛnɛ kan. O de kosɔn a ka Kuma b’a fɔ ko: “An ka an janto ɲɔgɔn na walisa ka ɲɔgɔn jija kanuya ni kɛwale ɲumanw kɛli la. An kana ɲɔgɔn lajɛli dabila i ko dɔw b’a kɛ cogo min na, nka an ka ɲɔgɔn laadi, janko aw b’a ye ko Matigi ka don surunyara.” (Heburuw 10:24, 25) N’an y’an lajɛ ni an batokɛɲɔgɔn tɔw ye Krecɛn lajɛw la, cogoya ɲuman bɛ kɛ an bolo ka Ala tanu ani k’a bato, an bɛ Ala min kanu. An bɛ ɲɔgɔn barika bonya fana, ka dusu don ɲɔgɔn kɔnɔ.

19. An bɛ se ka mun kɛ walisa kanuya min bɛ Krecɛn jɛkulu kɔnɔ, k’o bonya kosɛbɛ?

¹⁹ N’an bɛ fara Jehova batobaga tɔw kan, kanuya min bɛ anw ni olu cɛ, o na bonya ani teriya min bɛ an ni ɲɔgɔn cɛ jɛkulu kɔnɔ, o bɛ sinsin ka taa a fɛ. A nafa ka bon an ka ɲɔgɔn jogo ɲuman ɲini, i ko Jehova b’an jogo ɲuman ɲini cogo min na. An kana sigi n’a ye ko an batokɛɲɔgɔnw ka kɛ mɔgɔ dafalenw ye. I kana ɲinɛ ko bɛɛ ka taa-ɲɛ tɛ kelen ye alako ta fan fɛ, wa ko an  kelen-kelen bɛɛ bɛ fili. (Kolosekaw 3:13) A ɲini ka teriya sɛbɛ don e ni mɔgɔw cɛ minnu bɛ Jehova kanu kosɛbɛ, i bɛna a ye ko i bɛ ka taa ɲɛ alako ta fan fɛ. Mɔgɔ minnu ye i balimakɛw ni i balimamusow ye alako ta fan fɛ, e ni olu ka Jehova bato ɲɔgɔn fɛ, o bɛna i dɛmɛ ka to Ala ka kanuya la. Mɔgɔ minnu bɛ Jehova bato ni kantigiya ye ani minnu bɛ to a ka kanuya la, a bɛna mun kɛ olu ye?

20, 21. “Ɲɛnamaya sɛbɛ” ye mun ye? Mun na o ye jigiya ɲumanba ye?

²⁰ Jehova bɛ ɲɛnamaya de ni a batobaga kantigiw la. Nka, a bɛ ɲɛnamaya sugu jumɛn de ni u la? I k’a lajɛ: Yala i bɛ ɲɛnamaya lakika de la wa? Mɔgɔ fanba bɛna a fɔ ko ɔwɔ. Tiɲɛ don, an bɛ ka ninakili, ka dumuni kɛ ani ka ji min. O la sa, an bɛ ɲɛnamaya la. Ka fara o kan, an ka hɛrɛ bonyana kosɛbɛ waati minnu na an ka diɲɛlatigɛ kɔnɔ, laala, an y’a fɔ ko: “Sisan ne bɛ ɲɛnamaya yɛrɛ de la.” Nka, Bibulu b’a jira ko hadamaden si tɛ ka ɲɛnamaya diyabɔ, a kɔrɔ sɛbɛ la.

²¹ Ala ka Kuma bɛ dusu don an kɔnɔ ko an ka “ɲɛnamaya sɛbɛ . . . minɛ kosɛbɛ.” (1 Timote 6:19, BS) O kuma b’a jira ko “ɲɛnamaya sɛbɛ” ye fɛn ye an jigi b’a la ka min sɔrɔ don nataw la. N’an kɛra mɔgɔ dafalenw ye tuma min na, an bɛna ɲɛnamaya kɛ a kɔrɔ dafalen yɛrɛ la, bawo an bɛna ɲɛnamaya kɛ i ko Ala tun b’a fɛ an ka ɲɛnamaya kɛ cogo min na, tuma min na a ye Hadama ni Hawa da. An bɛna ɲɛnamaya kɛ tuma min na alijinɛ kɔnɔ dugukolo kan yan, ka kɛ mɔgɔ kɛnɛbagatɔ dafalenw ye, ka balo hɛrɛ ni lafiya la, o tuma de la sa, an bɛna “ɲɛnamaya sɛbɛ” dɔn, n’o ye ɲɛnamaya banbali ye. (1 Timote 6:12) Yala o tɛ jigiya ɲumanba ye wa?

22. An bɛ se ka “ɲɛnamaya sɛbɛ” minɛ kosɛbɛ cogo jumɛn na?

²² An bɛ se ka “ɲɛnamaya sɛbɛ minɛ kosɛbɛ” cogo jumɛn na? O hakilila kelen kɔnɔna na, Paul ye nin welekan bila Krecɛnw ma ko “u ka ko ɲuman kɛ” ani ko u “ka kɛwale ɲumanw caya.” (1 Timote 6:18, BS) A jɛlen don ko an ye tiɲɛ minnu dɔn Bibulu kɔnɔ, an ka kan ka olu sirataama. Nka, yala Paul tun b’a fɛ k’a fɔ  ko n’an ye kɛwale ɲumanw kɛ, an bɛ “ɲɛnamaya sɛbɛ sɔrɔ” wa? Ayi, bawo o jigiya sugu yɛrɛ sɔrɔli bɛ bɔ Ala ka “nɛɛma” de la. (Romɛkaw 5:15) Nka, mɔgɔ minnu bɛ u cɛsiri ni kantigiya ye Ala ka baara la, Jehova bɛ ɲilifɛn min di u ma, o ye “ɲɛnamaya sɛbɛ” ye. A b’a fɛ k’a ye ko i ye “ɲɛnamaya sɛbɛ” de sɔrɔ. Mɔgɔ minnu bɛ to Ala ka kanuya kɔnɔ, olu bɛ se ka sigi n’a ye ko u bɛna ɲɛnamaya kɛ fo abada hɛrɛ ni lafiya la.

23. Mun na a nafa ka bon ka to Ala ka kanuya la?

²³ An kelen-kelen bɛɛ ka kan k’an yɛrɛ ɲininka ko: ‘Yala ne bɛ Ala bato i ko a y’a ɲini an fɛ cogo min na Bibulu kɔnɔ wa?’ N’an b’an yɛrɛ sɛgɛsɛgɛ don o don walisa k’a dɔn ni o ɲininkali jaabi ye ɔwɔ ye, o tuma na sa, an bɛ sira ɲuman kan. An bɛ se ka da a la ko Jehova ye an dogoyɔrɔ ye. A bɛna a batobaga kantigiw lakana nin diɲɛ laban don ɲagaminenw kɔnɔna bɛɛ la. Jehova bɛna an kisi fana k’an ladon a ka diɲɛ kura nɔɔrɔma kɔnɔ, min ka surun sisan. O ye nisɔndiyaba ye ka kɛ yen o waati la dɛ! An ka nisɔndiya bɛna bonya kosɛbɛ k’a ye ko an ye ko minnu latigɛ nin laban donw na, olu tun ka ɲi! Ni e fana bɛ o ko suguw de latigɛ kabini sisan, i bɛna “ɲɛnamaya sɛbɛ” diyabɔ, Jehova Ala tun ye ɲɛnamaya sugu min ŋaniya an ye, kabini Hadama ni Hawa ka waati la fɔ abada.