Yala a ka nɔgɔn tuma bɛɛ ka i bangebagaw kan minɛ wa?— O ka gɛlɛn tuma dɔw la. Yala i b’a dɔn ko Yesu tun bɛ Jehova ani a bangebagaw kan minɛ wa?— A ka misali bɛ se ka i dɛmɛ ka i bangebagaw kan minɛ hali ni o man nɔgɔn. An k’a ɲini ka o misali dɔn ka ɲɛ.

Sani Yesu ka na dugukolo kan, a tun bɛ a Fa Jehova kɛrɛfɛ sankolo la. Nka bangebagaw fana tun bɛ Yesu la k’a to dugukolo kan. Olu tɔgɔ tun ye Yusufu ani Mariyama ye. Yala e b’a dɔn olu kɛra Yesu bangebagaw ye cogoya min na wa?—

Jehova ye Yesu ka ɲɛnamaya ta ka bɔ sankolo la, k’a bila Mariyama kɔnɔ, walasa Yesu ka bange ani ka ɲɛnamaya kɛ dugukolo kan. O tun ye kabako ye! Yesu kɔrɔbayara Mariyama kɔnɔ i n’a fɔ denyɛrɛnin tɔw bɛ kɔrɔbaya cogo min na u baw kɔnɔ. Kalo kɔnɔntɔn kɔfɛ, Yesu bangera. Mariyama ni a cɛ Yusufu kɛra Yesu bangebagaw ye o cogo de la dugukolo kan.

Tuma min na Yesu si tun tɛ tɛmɛ san 12 la dɔrɔn, a ye ko dɔ kɛ min b’a jira, a bɛ a Fa Jehova kanu ka se fo yɔrɔ min na. O kɛra tuma min na Yesu ni a bangebagaw tun ye taama jan kɛ ka taa Jerusalɛm Tɛmɛnkan seli la. U segin tuma selen, Yusufu ni Mariyama ma Yesu ye yɔrɔ si. Yala e b’a dɔn a tun bɛ yɔrɔ min na wa?—

Yusufu ni Mariyama ye u teliya ka segin Jerusalɛm ka Yesu ɲini fan bɛɛ. U jɔrɔ la kosɛbɛ ka d’a kan u ma se ka Yesu ye. Nka tile saba o kɔfɛ, u y’a sɔrɔ Alabatoso kɔnɔ! Yala i b’a dɔn kun min na Yesu tun bɛ Alabatoso kɔnɔ wa?— Ka d’a kan yen a tun bɛ se ka fɛnw kalan a Fa Jehova kan. A tun bɛ a Fa Jehova kanu, ani a tun bɛ a ɲini k’a dɔn a tun bɛ se k’a kodiya a ye cogo min na. Hali a kɔrɔbayalen, Yesu taara a fɛ ka Jehova kan minɛ. Yesu tun bɛ kanminɛli kɛ hali tuma min na o kɛli tun ka gɛlɛn a bolo, ani hali ni o tun bɛ tɔɔrɔ lase a ma. Yala Yesu tun ye Yusufu ani Mariyama fana kan minɛ wa?— Ɔwɔ, Bibulu b’a fɔ ko a ye o kɛ.

I bɛ se ka kalansira jumɛn sɔrɔ Yesu ka misaliya la?— I ka kan ka i bangebagaw kan minɛ hali ni o kɛli ka gɛlɛn. Yala i bɛna o kɛ wa?—