Timote tun ye kamalennin ye mɔgɔ dɛmɛ tun ka di min ye. A taara dugu caman na walasa ka mɔgɔ wɛrɛw dɛmɛ. O de kosɔn, a ka ɲɛnamaya diyara kosɛbɛ. Yala e b’a fɛ ka o ko dɔn wa?—

Timote kɔrɔbayara dugu min kɔnɔ o tɔgɔ tun ye Lisitre ye. Tuma min na a tun ka dɔgɔ, a mamuso Lois ani a ba, Unise, ye a daminɛ k’a kalan Jehova ko la. Ikomi Timote kɔrɔbayara o kɔnɔna na, a tun ka di a ye ka mɔgɔ wɛrɛw dɛmɛ u ka Jehova dɔn.

Tuma min na Timote tun ye kamalennin ye, Paul ye a ɲini a fɛ a ka taamaw kɛ ni a ye ka taa waajuli kɛ yɔrɔ wɛrɛw la. Timote ko: ‘Ɔwɔ!’ A tun labɛnnen don ka taa ani ka mɔgɔ wɛrɛw dɛmɛ.

 Paul ni Timote taara Masedwane dugu dɔ la min tun bɛ wele ko Tesalonike. Walasa ka se yen, u tun bɛ sira jan taama u sen na, k’a sɔrɔ ka kurun ta. U selen kɔ yen, u ye mɔgɔ caman dɛmɛ u ka Jehova dɔn. Nka mɔgɔ dɔw dimina u kɔrɔ fo k’a ɲini ka u bana. O kama Paul ni Timote ye yen yɔrɔ bila ka taa waajuli kɛ yɔrɔ wɛrɛw la.

Kalo damadɔ o kɔfɛ, Paul ye a ɲini Timote fɛ a ka segin ka taa Tesalonike k’a lajɛ balimaw bɛ cogo di. A ye a ja gɛlɛya kosɛbɛ walasa ka segin ka taa o dugu faratima in na! Nka Timote taara ka d’a kan balima minnu tun bɛ yen, a tun bɛ jɔrɔ olu ka ko la. A kɔseginna Paul fɛ ni kibaru duman ye. Balima minnu tun bɛ Tesalonike, olu tun ka kɛnɛ kosɛbɛ!

Timote ye baara kɛ ni Paul ye san caman. Siɲɛ dɔ la, Paul ye a sɛbɛn ko Timote de tun ye maa ye, a tun bɛ se ka min ci ka jɛkuluw dɛmɛ. Timote ye Jehova ani mɔgɔw kanu.

Yala e bɛ mɔgɔw kanu ani a ka di i ye k’u dɛmɛ u ka Jehova dɔn wa?— Ni i bɛ o kɛ, i bɛ se ka nisɔndiyaba sɔrɔ ani ka i ka ɲɛnamaya diyabɔ, i n’a fɔ Timote y’a kɛ cogo min na!