Maana 106nan

U labɔra kaso la

E KA mɛlɛkɛ lajɛ min bɛ ka kasobon dayɛlɛ. A bɛ ka mɔgɔ minnu labɔ kaso la, olu ye Yesu ka cidenw ye. Fɛn min ye u lase kaso la, an ka o lajɛ ɲɔgɔn fɛ.

Hakili senu jiginnen kɔfɛ Yesu ka kalandenw kan, waati dɔɔnin dɔrɔn o kɔfɛ, nin ko kɛra: Don dɔ wulada fɛ, Piɛrɛ ni Yuhana taara Jerusalɛm Alabatoso la. O yɔrɔ la, cɛ dɔ tun bɛ o donda la yen min ye nabara ye kabini a wolotuma. Mɔgɔw tun bɛ to ka a ta don o don ka na a bila o yɔrɔ la, walisa mɔgɔ minnu bɛ don Alabatoso kɔnɔ, a ka wari deli olu fɛ. O nabara ye Piɛrɛ ni Yuhana ye tuma min na, a ye u deli wari la. Cidenw ye mun kɛ?

U ye u jɔ, ka faantancɛ lajɛ. Piɛrɛ tilala k’a fɔ ko: ‘Wari tɛ ne bolo, nka fɛn min bɛ ne bolo, ne b’o di i ma. Yesu tɔgɔ la, wuli ka taama! Piɛrɛ ye cɛ kininbolo minɛ. O yɔrɔnin bɛɛ la, cɛ y’i pan k’i jɔ, ka taama daminɛ.  Mɔgɔw ye o ye tuma min na, u kabakoyara, ka nisɔndiya kosɛbɛ bawo o dakabanako kɛra.

Piɛrɛ ko: ‘Ala ka sebagaya min ye Yesu lakunun, o barika de la an ye nin kabako kɛ.’ Piɛrɛ ni Yuhana tun bɛ ka o fɔ tuma min na, diinɛ ɲɛmɔgɔ dɔw nana. U diminna kosɛbɛ bawo Piɛrɛ ni Yuhana tun bɛ ka kuma Yesu lakununni kan. O de kosɔn, u ye Piɛrɛ ni Yuhana minɛ k’u don kaso la.

O dugujɛ, diinɛ ɲɛmɔgɔw ye ɲɔgɔnlajɛba dɔ kɛ. Piɛrɛ ni Yuhana ani cɛ min kɛnɛyara, olu bɛɛ minɛna ka na jɔ u ɲɛkɔrɔ. Diinɛ ɲɛmɔgɔw ye u ɲininka ko: ‘Aw ye nin kabako kɛ ni sebagaya jumɛn ye?’

Piɛrɛ ye u jaabi k’a jira u la ko Ala ka sebagaya min ye Yesu lakunun, o sebagaya kelen de barika la, u ye nin kabako kɛ. Sarakalasebagaw tun t’a dɔn u ka kan ka min kɛ tun, bawo o dakabanako min kɛra, u tun tɛ se k’o sɔsɔ. O kama, u ye kangari da cidenw ye ko u kana kuma Yesu ko la tuguni. U tilala ka u bila.

Donw bɛ ka tɛmɛ ani cidenw bɛ ka waajuli kɛ ka taa a fɛ Yesu ko la ani ka banabagatɔw kɛnɛya. O kabakow kibaruya jɛnsɛnna yɔrɔ caman na. O kosɔn, hali mɔgɔ minnu bɛ bɔ Jerusalɛm dafɛduguw la, olu nana ni u ka banabagatɔw ye walisa cidenw ka u kɛnɛya. Diinɛ ɲɛmɔgɔw ye o kow ye minkɛ, u keleyara. O kosɔn, u ye cidenw minɛ k’u don kaso la. Nka, cidenw ma mɛn kaso la.

I ko i ɲɛ b’a la cogo min na yan, sufɛ, Ala ka mɛlɛkɛ ye kasobon dayɛlɛ. A y’a fɔ u ye ko: ‘Aw ka taa ka aw jɔ Alabatoso kɔnɔ. Aw ka taa a fɛ ka kuma mɔgɔw fɛ, aw kana o dabila.’ O dugujɛ, diinɛ ɲɛmɔgɔw ye mɔgɔw ci kasobon la walisa ka taa cidenw nɔfɛ. Nka u sera yen tuma min na, u y’a ye ko cidenw tɛ yen. Nka kɔfɛ, u ye cidenw sɔrɔ mɔgɔw kalanni na Alabatoso kɔnɔ. U ye cidenw minɛ ka taa ni u ye u ka kiritigɛyɔrɔba la.

Diinɛ ɲɛmɔgɔw ko: ‘An m’a fɔ aw ye k’a gɛlɛya ko aw kana mɔgɔw kalan Yesu ko la tun wa? A filɛ, aw ye Jerusalɛm fa aw ka kalan na.’ Cidenw ye u jaabi ko: ‘Ala de ye kuntigi ye. An ka kan ka ale de ka kuma mɛn, sani an k’a fɔ ko an bɛ mɔgɔw ka kuma mɛn.’ O la sa, cidenw taara a fɛ ‘kibaru duman’ fɔli la. U ma o dabila. Yala o tɛ misali ɲuman ye min jirala an na, ni an ka kan k’a ladege wa?

Kɛwalew tilayɔrɔba 3 ka na 5 la.