Sa nsiranɛgɛlama
Maana 41nan
Sa nsiranɛgɛlama
YALA sa yɛrɛ-yɛrɛ de melekelen bɛ poto la wa? Ayi. Sa yɛrɛ-yɛrɛ tɛ. Sa don min dilanna ni nsiranɛgɛ ye. Jehova y’a fɔ Musa ye a ka o dilan, k’o dulon poto la mɔgɔw ka se k’o lajɛ, walisa u kana sa. Nka, i ɲɛ bɛ sa minnu na duguma, olu ye sa yɛrɛ-yɛrɛw de ye. U ye mɔgɔw kin, k’u bana. I b’a dɔn mun na wa?
O kɛra bawo Israɛlkaw ye Ala ni Musa kɔrɔfɔ. U diminnen y’a fɔ ko: ‘Mun na aw ye an labɔ Misira walisa an ka sa kungokolon kɔnɔ yan? Dumuni tɛ yan, ji tɛ yan. An tɛ se ka to manɛ dun dɔrɔn na fana.’
Manɛ ye dumuni duman de ye. Jehova de ye kabako kɛ, ka o dumuni di u ma. Ale de ye kabako kɛ ka ji fana di u ma. Jehova y’a mago don mɔgɔw la kosɛbɛ, nka mɔgɔw ma Jehova waleɲumandɔn o ko la. O kosɔn, Jehova ye nin sajuguw bila ka na walisa ka Israɛlkaw ɲangi. Saw ye u kin, u caman sara.
A laban na, mɔgɔw nana Musa ma k’a fɔ a ye ko: ‘An ye jurumu kɛ, bawo an ye Jehova kɔrɔfɔ, an ye e fana kɔrɔfɔ. Sisan, i ka Jehova deli a ka nin saw mabɔ an na.’
Musa ye Jehova deli mɔgɔw ye. Jehova y’a fɔ ko Musa ka nin sa nsiranɛgɛlama dilan, ka o dulon poto la. A y’a fɔ ko ni sa ye mɔgɔ o mɔgɔ kin, o tigi ka sa nsiranɛgɛlama filɛ. Ala y’a fɔ ko Musa k’a kɛ cogo min na, Musa y’a kɛ o cogo la ten tigitigi. Saw ye mɔgɔ minnu kin, ni olu tun ye sa nsiranɛgɛlama filɛ dɔrɔn, u tun bɛ kɛnɛya.
An bɛ kalansira bɔ o ko la. Saw ye Israɛlka minnu kin, sira dɔ la, an bɛɛ bɛ i ko olu. An bɛɛ ye sabagatɔw ye. N’i ye i ɲɛ fili fan o fan, i b’a ye ko mɔgɔw bɛ kɔrɔ, mɔgɔw bɛ bana, mɔgɔw bɛ sa. A bɛ ten, bawo an bɛɛ bɔra cɛ fɔlɔ ni muso fɔlɔ minnu na, Hadama ni Hawa, olu ye u kɔdon Jehova la. Nka, Jehova ye sira dayɛlɛ an ye walisa an ka se ka ɲɛnamaya kɛ badaa-badaa.
Jehova ye a Denkɛ Yesu Krista ci ka na dugukolo kan. Yesu tun bɛ min kɛ, o tun man di mɔgɔ caman ye. Olu fɛ, Yesu tun man ɲi. O kosɔn, u y’a dulon poto la, k’a faga o cogo la. Nka, tiɲɛ yɛrɛ la, Jehova sago tun don Yesu ka sa. Mun na? Ni an b’an jigi da Yesu kan, ani ni an bɛ tugu a sen nɔ na, an bɛ se ka ɲɛnamaya banbali sɔrɔ. An bɛna caman kalan o kan kɔfɛ.
Nɔnburuw 21:4-9; Yuhana 3:14, 15.
