Maana 8nan

Cɛ janmanjanba kɔgɔlenbaw bɛ dugukolo kan

NI I ye mɔgɔ dɔ natɔ ye i fan fɛ min kundama ni i ka so kundama bɛɛ ye kelen ye, e bɛna mun fɔ? I bɛna a fɔ k’o tigi ka jan kosɛbɛ dɛ! Waati dɔ kɛra cɛ janmanjanba kɔgɔlenbaw tun bɛ dugukolo kan. Bibulu b’a fɔ ko o cɛ janmanjanba kɔgɔlenbaw faw tun ye mɛlɛkɛw ye minnu bɔra sankolo la. Nka, o sera ka kɛ cogo di?

I b’a dɔn ko Sitanɛ ye mɛlɛkɛjugu ye min cɛsirilen don tuma bɛɛ ka na ni ɲagami ye yɔrɔ bɛɛ la. Sitanɛ y’a ɲini yɛrɛ ka Ala ka mɛlɛkɛw bila u ka kojugu kɛ. O mɛlɛkɛ dɔw labanna ka Sitanɛ lamɛn. Ala tun ye baara min di u ma sankolo la, u ma sɔn ka o kɛ tuguni. U nana dugukolo kan, k’u yɛrɛ kɛ i ko hadamadenw. I b’a dɔn mun na wa?

Bibulu b’a fɔ an ye ko u y’a ye ko muso cɛɲiw bɛ dugukolo kan. U tun b’a fɛ ka na sigi o musow fɛ. O de y’a to, u nana dugukolo kan, ka o musow furu. Nka, Bibulu y’a jira ko o mɛlɛkɛw ye o min kɛ, o tun man ɲi, bawo Ala ye mɛlɛkɛw da walisa u ka to sankolo la.

O mɛlɛkɛw ni u musow ye denw sɔrɔ tuma min na, o denw ni den tɔw tun tɛ kelen ye. I b’a sɔrɔ u denyɛninnama tun bɛ i ko denyɛnin tɔw. Nka, u tora ka janya ka taa a fɛ, ani ka kɔgɔ ka taa a fɛ, fo u labanna ka kɛ mɔgɔ janmanjanba kɔgɔlenbaw ye.

O cɛ janmanjanba kɔgɔlenbaw tun ka jugu. Ikomi u tun ka bon, ko barikaba fana tun bɛ u la, u tun bɛ mɔgɔw bugɔ, k’u jogin. U tun b’a ɲini ka mɔgɔw bɛɛ diyagoya ka kɛ mɔgɔjuguw ye i n’a fɔ olu yɛrɛw tun ka jugu cogo min na.

Henɔk sara. Nka mɔgɔ kelen tun bɛ dugukolo kan sisan min ka ɲi. A tɔgɔ ye ko Nuhun. Ala tun b’a fɛ Nuhun ka min kɛ, Nuhun tun bɛ o de kɛ tuma bɛɛ.

Don dɔ la, Ala y’a fɔ Nuhun ye ko waati sera ale Ala ka mɔgɔjuguw bɛɛ halaki. Nka, a bɛna Nuhun n’a ka denbaya ani bagan caman kisi. Ala ye o kɛ cogo min na, an k’o lajɛ ɲɔgɔn fɛ.

Jenɛse 6:1-8; Jude 6.