Maana 90nan

Yesu ni Samarikamuso bɛ kɔlɔnda la

YESU jɔra ka a lafiɲɛ kɔlɔnda dɔ la Samari. A ka kalandenw taara dugu kɔnɔ walisa ka dumuni san. Yesu bɛ ka kuma muso min fɛ, o nana ji bɔ kɔlɔn na. Yesu y’a fɔ muso ye ko: ‘Ji di ne ma ne ka n min.’

O balala kosɛbɛ muso la. I b’a dɔn mun na wa? Katuguni Yesu ye Yahutu ye, muso ye Samarika ye. Yahutu fanba tɛ Samarikaw fɛ. Hali u t’a fɛ ka kuma Samarikaw fɛ. Nka, Yesu bɛ mɔgɔ sugu bɛɛ fɛ. O kosɔn, a y’a fɔ muso ye ko: ‘Ni i tun b’a dɔn mɔgɔ min bɛ ka ji ɲini i fɛ k’a min, e de tun bɛna a ɲini a fɛ a ka ji di i ma. A tun na ɲɛnamaya ji di i ma fana.’

Muso ko: ‘Matigi, kɔlɔn ka dun, jurufilen yɛrɛ tɛ i bolo. E bɛna o ɲɛnamaya ji bɔ min?’

Yesu ko: ‘Ni i ye nin kɔlɔn ji min, minnɔgɔ bɛna i minɛ tuguni. Nka, ne bɛ ji min di, o bɛ se k’a to mɔgɔ ka ɲɛnamaya kɛ badaa.’

Muso ko: ‘Matigi, o ji di ne ma. O la sa, minnɔgɔ tɛna ne minɛ abada tun. Ne tɛna na yan yɔrɔ la tuguni ka ji bɔ.’

A kɛra muso kɔnɔ ko Yesu bɛ ka kuma ji yɛrɛ-yɛrɛ de kan. Nka, Yesu tun bɛ ka kuma tiɲɛ de kan min bɛ Ala ani a ka masaya ko kan. O tiɲɛ bɛ i ko ji min bɛ ɲɛnamaya di. A bɛ se ka ɲɛnamaya banbali di mɔgɔ ma.

O kɔfɛ, Yesu y’a fɔ muso ye ko: ‘Taa i cɛ wele ka na.’

Muso y’a jaabi: ‘Cɛ tɛ ne bolo.’

Yesu ko: ‘I ye tiɲɛ fɔ, bawo i ye cɛ duuru sɔrɔ. Nka e ni cɛ min bɛ ɲɔgɔn fɛ sisan, o tɛ i cɛ ye.’

Muso kabakoyara kosɛbɛ, bawo o ko bɛɛ tun ye tiɲɛ ye. Yesu ye o fɛnw dɔn cogo di? Ala de ye o fɛnw fɔ Yesu ye, bawo Ala tun ye layidu ta ka mɔgɔ min ci ka na diɲɛ kɔnɔ, o tun ye Yesu de  ye. O waati yɛrɛ la, Yesu ka kalandenw seginna ka na. A balala kosɛbɛ u la k’a ye ko Yesu bɛ ka kuma Samarikamuso dɔ fɛ.

Nin ko bɛ an kalan mun na? A b’a jira ko Yesu tun ka ɲi mɔgɔ bɛɛ ma, u siya mana kɛ fɛn o fɛn ye. An fana ka kan ka a ladege. An man kan k’a miiri ko mɔgɔ dɔw man ɲi bawo olu ye siya wɛrɛ mɔgɔw ye. Yesu b’a fɛ mɔgɔ bɛɛ ka tiɲɛ dɔn min bɛ na ni ɲɛnamaya banbali ye. A ka kan ka diya an ye fana ka mɔgɔw dɛmɛ u ka tiɲɛ dɔn.

Yuhana 4:​5-43; 17:⁠3.