Maana 101nan

U ye Yesu faga

E K’A filɛ kojuguba min bɛ ka kɛ! U ye Yesu faga. U y’a gengen jiri la. Pwɛntiw gengenna a bolow ni a senw na. Kun jumɛn na mɔgɔw sɔnna ka nin kɛ Yesu la?

Nin kow kɛra Yesu la bawo mɔgɔw tun bɛ yen minnu bɛ Yesu koniya kosɛbɛ. I bɛ o mɔgɔw dɔn wa? O mɔgɔw dɔ la kelen ye mɛlɛkɛjugu ye min tɔgɔ ye ko Sitanɛ-Sendonbaga. Ale de ye a kɛ Hadama ni Hawa ma Jehova ka kuma mɛn. Ale Sitanɛ kelen de fana ye Yesu juguw bila u ka nin kojuguba kɛ.

Sanni yɛrɛ Yesu tun ka gengen jiri la, a juguw ye kojugu sugu bɛɛ da a kan. I hakili jigin u nana a minɛ Jetisɛmanɛ nakɔ kɔnɔ cogo min na ka taa n’a ye. O juguw tun ye jɔni ye? Diinɛ ɲɛmɔgɔw de tun don. Ko min kɛra o kɔfɛ, an k’o lajɛ ɲɔgɔn fɛ.

Diinɛ ɲɛmɔgɔw ye Yesu minɛ tuma min na, a ka cidenw siranna kosɛbɛ. U bɛɛ bolila ka Yesu kelenpe to a juguw bolo. Nka ciden Piɛrɛ ni Yuhana tun ma taa yɔrɔ jan. U tilala ka tugu Yesu ni a juguw kɔ walisa k’a dɔn ko min bɛna kɛ Yesu la.

Sarakalasebagaw fɔlɔla ka taa ni Yesu ye cɛkɔrɔba dɔ fɛ min tɔgɔ ye ko Anɛ. Anɛ ye sarakalasebaga-kuntigi kɔrɔ ye. Nka, jama ma mɛn o yɔrɔ la. U tilala ka taa ni Yesu ye Kayifɛ ka so. Kayifɛ de ye sarakalasebaga-kuntigi ye sisan. Diinɛ ɲɛmɔgɔ caman tun ye ɲɔgɔn lajɛ a ka so.

Jama sigira Kayifɛ ka so yen yɔrɔ la walisa ka Yesu kiritigɛ. U ye mɔgɔw ladon o yɔrɔ la walisa u ka nkalonw da Yesu la. Diinɛ ɲɛmɔgɔ minnu tun bɛ yen, olu bɛɛ lajɛlen ko: ‘Yesu ka kan ka faga.’ U tilala ka daji tu Yesu ɲɛda la, k’a bugo ni u bolokurun ye.

O kow bɛɛ tun bɛ ka kɛ tuma min na, o y’a sɔrɔ Piɛrɛ tun bɛ dukɛnɛ na. Sufɛla tun don ani nɛnɛ tun bɛ. O kosɔn mɔgɔw ye tasuma mɛnɛ. Mɔgɔw bɛ ka u ja tasuma na tuma min na, baarakɛmuso dɔ ye Piɛrɛ lajɛ, ka tila k’a fɔ ko: ‘Nin cɛ fana ni Yesu tun bɛ ɲɔgɔn fɛ.’

Nka Piɛrɛ y’a jaabi ko: ‘Ayi, ne tɛ.’

 Siɲɛ saba, mɔgɔw y’a fɔ Piɛrɛ ye ko ale ni Yesu tun bɛ ɲɔgɔn fɛ, nka a siɲɛ saba bɛɛ la Piɛrɛ y’i dalacɛ a la, k’a fɔ ko tiɲɛ tɛ. Siɲɛ sabanan na, Piɛrɛ ye o fɔ dɔrɔn, Yesu y’i kɔ yɛlɛma ka Piɛrɛ lajɛ. Piɛrɛ nimisara kosɛbɛ a ka nkalontigɛ la. A taara kɛnɛma ka kasi.

Jumadon sɔgɔma, tile bɔra tuma min na dɔrɔn, sarakalasebagaw taara ni Yesu ye u ka lajɛkɛyɔrɔba la n’o ye kiritigɛyɔrɔba ye. O yɔrɔ la yen, u y’a fɔ u ni ɲɔgɔn cɛ, u tun bɛna min kɛ Yesu la. O kɔfɛ, u taara ni Yesu ye Pɔnse Pilate fɛ, n’o ye Jude gɔfɛrɛnɛrɛ ye.

Sarakalasebagaw taara Pilate fɛ k’a fɔ a ye ko: ‘Nin cɛ ye mɔgɔjugu de ye. A ka kan ka faga.’ Pilate ye Yesu ɲininka, ka tila k’a fɔ ko: ‘Ne ma jalakiyɔrɔ si ye nin cɛ la.’ O kosɔn, Pilate ye Yesu bila ka taa Hɛrɔde Antipasi fɛ. Hɛrɔde tun bɛ Galile jamana kunna, nka a tun nana waatinin kɛ Jerusalɛm. Hɛrɔde fana bolo, Yesu ma kojugu si kɛ. O kosɔn, Hɛrɔde ye Yesu bila ka na kokura Pilate fɛ.

Pilate tun b’a fɛ ka Yesu bila, nka Yesu juguw tun b’a fɛ Pilate ka kasoden wɛrɛ bila Yesu nɔ na. O kasoden tun ye nsonkɛ dɔ ye min tɔgɔ ko Barabasi. Midi waati la, Pilate ye Yesu labɔ kɛnɛma k’a fɔ jama ye ko: ‘Aw ka masakɛ filɛ!’ Nka sarakalasebaga-kuntigiw pɛrɛnna, k’a fɔ ko: ‘A faga! A faga!’ O la sa, Pilate ye Barabasi bila, nka a y’a to Yesu juguw ka taa n’a ye k’a faga.

O jumadon kelen, selifana waati la, Yesu gengenna jiri la. Kojugukɛla fila ni Yesu gengenna ɲɔgɔn fɛ. Kelen tun bɛ a kinin fɛ, tɔ kelen tun bɛ a numan fɛ. I tɛ se ka olu ye ja kan yan fo Yesu kelenpe dɔrɔn. Waati dɔɔnin dɔrɔn sani Yesu ka sa, kojugukɛla kelen y’a fɔ Yesu ko: ‘I hakili to ne la tuma min na i bɛna i ka masaya kɛ.’ Yesu y’a jaabi ko: ‘Ne bɛ layidu ta i ye, ko i bɛna kɛ ne fɛ Alijinɛ na.’

Yala o tɛ layidu ɲumanba ye wa? Yesu tun bɛ ka kuma alijinɛ min kan, i bɛ o dɔn wa? Ala tun ye alijinɛ fɔlɔ min da, o tun bɛ min? O tun bɛ dugukolo de kan. Tuma min na Yesu bɛna kɛ masakɛ ye sankolo la, a bɛna o kojugukɛla lana ɲɛnamaya la kokura walisa a ka alijinɛ kura diyabɔ dugukolo kan yan. Yala o t’an nisɔndiya wa?

Matiyu 26:​57-75; 27:​1-50; Luka 22:​54-71; 23:​1-49; Yuhana 18:​12-40; 19:​1-30.